قومی ٹیم کے سابق کپتان شاہد آفریدی کا کہنا ہے کہ ٹیم کی قیادت کرنا اعزاز کی بات ہے لیکن یہ پھولوں کا بستر نہیں ہے۔
سوشل میڈیا پر شاہد آفریدی کا ایک ڈیجیٹل انٹرویو کلپ وائرل ہورہا ہے جس میں میزبان کی جانب سے سابق کرکٹر سے سوال کیا گیا کہ پاکستان ٹیم کی قیادت کا تجربہ کیسا ہے؟
شاہد آفریدی نے کہا کہ قومی ٹیم کی قیادت کرنا ایک اعزاز کی بات ہے لیکن میں یہ بات ہمیشہ کہتا ہوں کہ ٹیم کی قیادت کرنا آسان نہیں ہے یہ پھولوں کا بستر نہیں۔
انہوں نے کہا کہ اگر ٹیم اچھی کارکردگی نہ دے یا پھر کچھ بھی ہو تو تمام تر ذمہ داری کپتان پر ڈال دی جاتی ہے، اسی لیے میں کہتا ہوں کہ کپتان کی ذمہ داریاں زیادہ ہیں۔
سابق کپتان نے کہا کہ کپتانی میں آپ کو انصاف کرنا پڑتا ہے جو لڑکے ڈومیسٹک میں اچھا پرفارم کریں بطور کپتان آپ کو انہیں موقع فراہم کرنا ہوگا۔
شاہد آفریدی نے کہا کہ میرے دور میں کوئی کھلاڑی یہ نہیں کہہ سکتا کہ پرفارم کیا اور میں نے انہیں موقع نہیں دیا، اپنی کپتانی کے دورمیں ہر اس کھلاڑی کو ٹیم میں شامل کیا جس نے ڈومیسٹک میں پرفارم کیا تھا۔