ڈھاکا: بنگلہ دیشی آل راؤنڈر شکیب الحسن کے پاکستان کیخلاف دوسرے ٹیسٹ کھیلنے سے متعلق بی سی بی کا بیان آگیا۔
بنگلا دیش کرکٹ بورڈ کے نئے صدر فاروق احمد کا کہنا ہے کہ جب تک شکیب الحسن مجرم قرار نہیں پاتے کھیلتے رہیں گے، شکیب کو وطن واپس نہیں بلایا جائے گا۔
انہوں نے کہا کہ ایف آئی آر درج ہوئی اور ابھی ابتدائی مرحلے میں ہے بہت کچھ ہونا باقی ہے۔
فاروق احمد نے کہا کہ بنگلا دیش نے پاکستان کے بعد بھارت جانا ہے، ہم چاہتے ہیں وہ سیریز بھی کھیلیں، شکیب الحسن ہمارا کنٹریکٹڈ کھلاڑی ہے ہم قانونی معاونت کریں گے۔
میڈیا رپورٹ کے مطابق شکیب الحسن پاکستان کے خلاف سیریز کے بعد انگلینڈ جائیں گے، شکیب الحسن سرے کی جانب سے 4 روزہ میچ کھیلیں گے۔
بی سی بی نے پہلے ہی 5 سے 14 ستمبر تک شکیب الحسن کو این او سی جاری کیا ہوا ہے، بنگلا دیش نے بھارت میں 2 ٹیسٹ اور 3 ٹی ٹوئنٹی میچز کی سیریز کھیلنا ہے۔
واضح رہے کہ سابق بنگلا دیشی وزیراعظم شیخ حسینہ واجد کے استعفے اور ملک سے فرار ہونے کے بعد کے بعد عوامی لیگ سے تعلق رکھنے والے سابق رکن اسمبلی شکیب الحسن پر ڈھاکا میں قتل کا مقدمہ درج کیا گیا تھا۔