پاکستان کرکٹ ٹیم کے کپتان شان مسعود نے آسٹریلوی اوپنر وارنر کی چوری شدہ ٹیسٹ کیپ کی تلاش کے لیے حکومت آسٹریلیا کو جاسوس کی خدمات حاصل کرنے کا مشورہ دیا ہے۔
آسٹریلوی اوپنر ڈیوڈ وارنر جو اپنے کیریئر کا آخری ٹیسٹ میچ کھیل رہے ہیں۔ میچ سے قبل ان کی ٹیسٹ کیپ میلبرن سے سڈنی آتے ہوئے راستے میں چوری ہو گئی تھی جس پر انہوں نے چوروں کو کیپ واپسی پر اپنا بیگ دینے کی پرکشش پیشکش بھی کی تھی۔
گزشتہ روز سڈنی کرکٹ گراؤنڈ میں پریس کانفرنس کے دوران جب پاکستانی ٹیسٹ کپتان شان مسعود کو اس بارے میں بتایا گیا تو وہ بھی حیران رہے گئے ساتھ ہی انہوں نے حکومت آسٹریلیا کو قیمتی کیپ کی تلاش کے لیے جاسوس کی مدد لینے کا نادر مشورہ بھی دے ڈالا۔
شان مسعود نے آسٹریلوی حکومت سے بھی وارنر کی کیپ تلاش کرنے کی اپیل کرتے ہوئے کہا کہ آسٹریلوی حکومت کی طرف سے ملک گیر تلاش ہونی چاہیے اور کیپ کی واپسی کییلے بہترین جاسوسوں کی ضرورت بھی ہو سکتی ہے۔
پاکستانی کپتان نے کہا کہ کرکٹ میں ٹیسٹ فارمیٹ ایک عظیم درجہ رکھتی ہے اور ٹیسٹ کیپس خاص ہوتی ہیں، آسٹریلوی پلیئرز اپنی ٹیسٹ کیپس کی دیکھ بھال کرتے ہیں اور انہیں فخر سے پہنتے ہیں۔ یہ کسی بھی کرکٹر کے لیے سب سے قیمتی چیز ہے اور مجھے امید ہے کہ وارنر کی کیپ انہیں واپس مل جائے گی۔
شان مسعود نے وارنر کے حوالے سے گفتگو کرتےہوئے مزید کہا تھا کہ وہ ایک عظیم کھلاڑی ہیں جو اپنے ناقابل یقین کیریئر کے لیے عزت کے مستحق ہیں۔ وارنر اوپنرز کے لیے ایک مثال ہیں، اور میں ذاتی طور پر انہیں بیٹنگ کرتے دیکھنا پسند کرتا ہوں لیکن امید ہے کہ سڈنی میں زیادہ دیر تک ایسا نہیں ہوگا۔
آخری ٹیسٹ سے قبل وارنر کی قیمتی چیز چوری، آسٹریلوی اوپنر کی چوروں کو انوکھی پیشکش
یاد رہے کہ ڈیوڈ وارنر کی ٹیسٹ کیپ میلبرن سے سڈنی آتے ہوئے راستے میں کہیں چوری ہو گئی تھی جس کی اطلاع انہوں نے سوشل میڈیا کے ذریعے دی تھی اور چوری کو کیپ واپس دینے پر اپنا بیگ دینے کی پرکشش پیشکش بھی کی تھی۔
آسٹریلوی اوپنر نے اپنے ویڈیو کے کیپشن میں اپیل کی تھی ’میرے بیگ میں میری بیٹیوں کے لیے تحائف اور میری ’بیگی گرین‘ ٹیسٹ کیپ موجود تھی۔ میرا بیگ میرے سامان سے نکال لیا گیا ہے اور وہ سڈنی ایئرپورٹ نہیں پہنچ سکا ہے۔