کراچی : سندھ ہائیکورٹ نے سی ویو دو دریا سے ڈاکٹر سارہ کی لاش ملنے کےکیس میں ملزم شان سلیم کی ضمانت منظور کرلی اور دو لاکھ روپے کے مچلکے جمع کرانے کا حکم دے دیا۔
تفصیلات کے مطابق سندھ ہائیکورٹ میں سی ویو دو دریا سے ڈاکٹر سارہ کی لاش برآمدگی کیس کی سماعت ہوئی ، عدالت نے کہا کہ اگر ملزم شان سلیم کیس کے ٹرائل میں تاخیر کی وجہ بنے تو ضمانت واپس لی جاسکتی ہے۔
شیخ ثاقب وکیل ملزم نے کہا کہ ایڈیشنل ڈسٹرکٹ اینڈ سیشن جج جنوبی کی عدالت نے 18 اپریل کو ملزم کی ضمانت مسترد کردی تھی ، جس پر پولیس کا کہنا تھا کہ 6 جنوری 2023 کو ڈاکٹر سارہ کی نعش سی ویو دو دریا سے برآمد ہوئی تھی۔
وکیل ملزم نے کہا کہ مقتوفیہ نے خود کشی کی تھی ملزم پر لگائے گئے الزامات بے بنیاد ہیں تو شیخ ثاقب وکیل ملزم کا کہنا تھا واقعے کا کوئی عینی شاہد نہیں ہے۔
پراسکیویشن نے کہا کہ ملزم پر ڈاکٹر سارہ کے قتل کا الزام ہے مدعی مقدمہ نے ملزم کو نامزد کیا ہے ، ملزم نے اپنے دفتر میں لگے ہوئے کیمرون کی سی سی ٹی وی فوٹیج ڈیلیٹ کی تھی۔
پولیس کا کہنا ہے کہ متوفیہ کے اغواء اور قتل کا مقدمہ ساحل تھانے میں درج ہے، دلائل کے بعد عدالت کے ملزم شان سلیم کی ضمانت منظور کرلی ،عدالت نے ملزم شان سلیم کو دو لاکھ روپے کے مچلکے جمع کرانے کا حکم دے دیا۔
سندھ ہائیکورٹ نے ٹرائل کورٹ کو دو ماہ کیس نمٹانے کی ہدایت کردی۔
خیال رہے کراچی میں سی ویو کے قریب دو دریا کے مقام پر ایک لڑکی کی لاش ملی تھی ، جس کی شناخت ڈاکٹر سارہ ملک سے نام سے ہوئی تھی۔