اسلام آباد (22 اگست 2025): وزیر اعظم شہباز شریف آئندہ ہفتے چین کا دورہ کریں گے جہاں وہ ایس سی او اجلاس میں شریک ہوں گے۔
نائب وزیر اعظم و وزیر خارجہ اسحاق ڈار نے بتایا کہ شہباز شریف 30 اگست کو چین جائیں گے جس کا مقصد ایس سی او اجلاس میں شرکت کرنا ہے۔
اسحاق ڈار نے بتایا کہ او آئی سی وزرائے خارجہ کا ہنگامی اجلاس جدہ میں طلب کر لیا گیا یکم ستمبر کو ہوگا۔
قبل ازیں، سینئر صحافیوں سے گفتگو میں اسحاق ڈار کا کہنا تھا کہ پاکستان بھارت کے ساتھ مسئلہ کشمیر سمیت جامع مذاکرات کو تیار ہے، پاک بھارت جنگ بندی پر عمل جاری ہے جس کیلیے بھارت نے امریکا سے درخواست کی تھی۔
یہ بھی پڑھیں: اقوام متحدہ کے یوٹیوب چینل پر وزیراعظم شہباز شریف کا نیا ریکارڈ
اسحاق ڈار نے کہا کہ جنگ بندی کیلیے مجھے امریکا سے فون آیا تھا لیکن میں نے واضح کیا تھا کہ پاکستان جنگ چاہتا ہی نہیں تھا، ہم نے کسی سے نہیں کہا تھا کہ ہمیں بھارت کے ساتھ بٹھائیں، ہم سے کسی نیوٹرل مقام پر بٹھانے کی بات کی گئی تھی۔
نائب وزیر اعظم کا کہنا تھا کہ میں نے کہا تھا کہ اگر نیوٹرل مقام پر میٹنگ ہوگی تو کر لیں گے، واضح کیا تھا کہ بھارت کے ساتھ کسی ایک نکاتی ایجنڈے پر بات نہیں ہوگی، بھارت کے ساتھ مسئلہ کشمیر سمیت تمام تصفیہ طلب امور پر بات ہوگی۔
ان کا کہنا تھا کہ بھارت کی جانب سے بلاوجہ بیان بازی جاری رہتی ہے، امریکی وزیر خارجہ کا دورہ پاکستان ابھی شیڈول نہیں۔
اسحاق ڈار نے بتایا کہ بنگلا دیش کا میرا دورہ دو روزہ ہے دورے کا مقصد پاکستان اور بنگلا دیش کو مزید قریب لانا ہے۔