اسلام آباد: وزیر اعظم شہباز شریف نے مہنگائی کی شرح 44 ماہ کی کم ترین سطح پر آنے پر اظہار تشکر کیا اور ستمبر میں سالانہ شرح 6.9 فیصد ہونے پر معاشی ٹیم کی پذیرائی کی۔
اگست 2024 میں 34 ماہ میں پہلی مرتبہ پاکستان میں مہنگائی کی شرح 9.6 فیصد پر آئی جبکہ ستمبر 2024 میں گزشتہ 44 ماہ میں مہنگائی کی کم ترین شرح 6.9 فیصد ریکارڈ کی گئی۔
اس پر وزیر اعظم شہباز شریف نے خصوصی پیغام جاری کیا کہ اللہ کے فضل سے عوام سے کیے عہد کی پاسداری میں کامیابی ملنا شروع ہوگئی، مہنگائی کی شرح 6.9 فیصد ہونے سے عام آدمی کو ریلیف ملے گا۔
شہباز شریف نے کہا کہ پیٹرولیم مصنوعات کی قیمتوں میں بھی متواتر کمی سے عوام کو ریلیف مل رہا ہے، شرح سود کم ہونے سے ملک میں کاروباری سرگرمیوں میں اضافہ ہوگا، مہنگائی کی شرح کو 2025 تک 7 فیصد تک لانے کے ہدف قابل ستائش ہے۔
انہوں نے کہا کہ پہلے دن سے عوامی ریلیف کیلیے اقدامات کو اولین ترجیح بنایا، پاکستان کے ڈیفالٹ کی خواہش کرنے والوں کا منصوبہ ناکام ہوا، معیشت مستحکم، سفارتی تعلقات مضبوط اور عام آدمی کی خوشحالی کا سفر شروع ہو چکا۔
ان کا کہنا تھا کہ آئی ایم ایف پروگرام کے اجرا سے معیشت میں مزید استحکام آئے گا، پاکستان کی ترقی کا سفر 2018 میں جہاں رکا تھا وہیں سے دوبارہ شروع ہو چکا ہے۔
آج 44 ماہ کے بعد پاکستان میں ستمبر 2024 میں مہنگائی کی شرح میں نمایاں کمی دیکھی گئی۔ ادارہ شماریات نے اپنی رپورٹ میں بتایا کہ مہنگائی کی شرح 6.9 فیصد پر آگئی، اگست 2024 میں اس کی شرح 9.6 فیصد پر تھی۔
ماہرین نے رائے دی کہ افراط زر میں کمی کی بڑی وجہ عالمی اجناس اور توانائی کی قیمتوں میں کمی ہے، ڈالر کے مقابلے میں پاکستانی روپے کی قدر میں استحکام دیکھا گیا، اسٹیٹ بینک کی سخت مانیٹری پالیسی کی وجہ سے افراط زر میں کمی دیکھی جا رہی ہے۔