لندن : مسلم لیگ ن کے مرکزی رہنما میاں شہبازشریف نے کہا ہے کہ حکمرانوں نے قرضے لینے کا ریکارڈ توڑ دیا، اس وقت ملک قرضوں میں بری طرح جکڑا ہوا ہے۔
ان خیالات کا اظہار انہوں نے لندن میں پارک لین اپارٹمنٹس کے باہر میڈیا سے گفتگو کرتے ہوئے کیا، ن لیگ کے رہنما نے حکومت کی معاشی پالیسیوں پر تنقید کرتے ہوئے کہا کہ وزیر اعظم اپوزیشن کے بجائے معیشت پر زور لگاتے تو حالات بہتر ہوتے۔
انہوں نے کہا کہ گزشتہ ڈیڑھ سال میں اتنے قرضے لیے گئے کہ پچھلے سارے ریکارڈ ٹوٹ گئے، پاکستان کی معیشت حکمرانوں نے تباہ کردی۔
ن لیگ کے رہنما کا کہنا تھا کہ ملک میں زراعت اور صنعت تباہ ہوچکی ہے، پاکستان میں کروڑوں افراد بے روزگار ہوچکے ہیں،50لاکھ گھراور ایک کروڑ نوکریاں کہاں ہیں؟
ایک سوال کے جواب میں انہوں نے کہا کہ آرمی چیف کی مدت ملازمت میں توسیع کے نوٹیفکیشن میں جان بوجھ کرغلطیاں کی گئیں، شہبازشریف نے مزید کہا کہ آئیں سب مل برآمدات میں اضافہ کریں اور عوام کو روزگارفراہم کریں۔