سیاسی انتقام ہار گیا، اب مہنگائی کو شکست دینی ہے، شہباز شریف

لاہور: صدر مسلم لیگ (ن) شہباز شریف کا کہنا ہے کہ سیاسی انتقام ہار گیا، اب مہنگائی اور معاشی بدحالی کو شکست دینی ہے۔

شہباز شریف سے پارٹی رہنماؤں اور سابق اراکین قومی و صوبائی اسمبلی نے ملاقاتیں کیں جن میں عام انتخابات کی تیاریوں اور ایم کیو ایم و دیگر جماعتوں سے سیٹ ایڈجسٹمنٹ سے متعلق امور پر غور کیا گیا۔

اس موقع پر سابق وزیر اعظم نے کہا کہ سیاسی استحکام سے ہی معیشت اور عوام کے مسائل حل ہوں گے، عوام کے مفاد میں نواز شریف کی قیادت میں سب کو ساتھ لے کر چلیں گے۔

متعلقہ: (ن) لیگ نے دانیال عزیز کو شوکاز نوٹس جاری کر دیا

شہباز شریف نے کہا کہ عوام کو مہنگائی اور دیگر مسائل سے نجات دلانے کیلیے الیکشن بہت اہم ہیں، ہم الیکشن نہیں عوام اور پاکستان کے معاشی مفادات کی جنگ لڑنے جا رہے ہیں۔

انہوں نے کہا کہ گالیوں اور کردار کشی کے ہتھکنڈوں میں قوم کا قیمتی وقت اور وسائل برباد کیے، ہمارے خلاف شروع کیے گئے سیاسی انتقام کا نشانہ عوام اور ملک بن گئے، 4 سالہ تباہی کا سیاہ دور نہ آتا تو عوام مہنگائی اور ملک میں معاشی بدحالی کا برا وقت نہ آتا۔

ملاقاتوں کے دوران پارٹی رہنماؤں نے نواز شریف کی ایون فیلڈ ریفرنس میں بریت پر شہباز شریف کو مبارکباد بھی پیش کی۔