اسلام آباد: وزیر اعظم شہباز شریف کا کہنا ہے کہ آئندہ بجٹ میں عوام کیلیے ریلیف اور معیشت کی ترقی کو ترجیح دی جائے گی۔
وزیر اعظم شہباز شریف کی زیرِ صدارت صنعتی شعبے سے متعلق بجٹ تجاویز پر اجلاس ہوا جس میں اظہارِ خیال کرتے ہوئے انہوں نے کہا کہ صنعتی شعبے کی پیداوار اور برآمدات بڑھانے کیلیے اقدامات بجٹ کا حصہ ہوں گے، بذات خود یقینی بناؤں گا کہ صنعتی شعبے سے تجاویز بجٹ کا حصہ بنائی جائیں۔
اجلاس میں وزیر اعظم نے متعلقہ حکام کو ہدایت کی کہ برآمدی صنعتوں کی پیداوار میں رکاوٹوں کو دور کیا جائے۔
انہوں نے کہا کہ گزشتہ حکومت نے دانستہ طور پر سرمایہ کاری اور صنعتی ترقی کو روکا اور اقتدار بچانے کیلیے آئی ایم ایف معاہدہ توڑا جس کا خمیازہ عوام بالخصوص صنعتوں کو بھگتنا پڑا۔
ان کا کہنا تھا کہ قوموں کی زندگی میں مشکلات آتی ہیں اور پاکستانی قوم با ہمت قوم ہے، ہم سب مل کر معاشی مشکل سے بتدریج نکل رہے ہیں، حکومت قوم مل کر پاکستان کے بہتر حالات کیلیے محنت کر رہے ہیں۔
شہباز شریف نے کہا کہ 9 مئی کے واقعات نے شر پھیلایا بلکہ پاکستان کو معاشی نقصان پہنچایا، حکومت صنعتوں کو سستی توانائی دے کر پیداواری لاگت مزید کم کرے گی، حکومت یقینی بنائے گی کہ بینک چھوٹی صنعتوں کو آسان شرائط پر قرض دیں۔
اجلاس میں وزیر اعظم نے احد چیمہ کو صنعتکاروں کی تجاویز کو بجٹ میں شمولیت کیلیے تیار کرنے کی ہدایت بھی کی۔