پاکستان ریلویز کو کمپیوٹرائزڈ کرنے جا رہے ہیں، شیخ رشید

نوشہرہ: وفاقی وزیر ریلوے شیخ رشید احمد نے کہا کہ ریلوے کے تمام سسٹم کو کمپیوٹرائز کرنے جا رہے ہیں، ہم نے تمام ٹرینوں پر ٹریکر لگا دیے ہیں۔

تفصیلات کے مطابق نوشہرہ میں ڈرائی پورٹ کی افتتاحی تقریب سے خطاب کرتے ہوئے شیخ رشید احمد کا کہنا تھا کہ ملکی تاریخ میں پہلی بار فری ٹریک پالیسی لائے ہیں، رواں ماہ 11 مسافر ٹرینیں پرائیوٹ سیکٹر کو دے رہے ہیں۔

وفاقی وزیر کا کہنا تھا کہ دنیا فریٹ ٹرین سے کمائی کرتی ہے، پاکستان کی واحد ریلوے ہے جو مسافر ٹرین سے بھی کمائی کر رہی ہے، ریلوے کی آمدن میں گزشتہ سال 10 ارب روپے کا اضافہ ہوا۔

شیخ رشید نے کہا کہ ہم نے تمام ٹرینوں پر ٹریکر لگا دیے ہیں، ریلوے کے ایک گارڈ کے بیٹے نے 350 ٹرینوں پر ٹریکر لگائے۔

وفاقی وزیر کا تقریب سے خطاب کرتے ہوئے کہنا تھا کہ عمران خان میں سیاسی چالاکیاں نہیں ہیں، سیدھے آدمی ہیں، ساری دنیا کو یقین ہے کہ عمران خان ایک دیانت دار شخص ہے۔

شیخ رشید احمد کا کہنا تھا کہ ریلوے کے تمام سسٹم کو کمپیوٹرائز کرنے جا رہے ہیں، ملک میں ترقی کے لیے ایم ایل ون منصوبہ انتہائی اہم ہے، اس منصوبے سے ایک لاکھ لوگوں کو روزگار ملے گا۔

انہوں نے مزید کہا کہ پاکستان ریلوے کو رجسٹرز سے نکال کر جدت پر لے آئے ہیں، دنیا کی بڑی بڑی کمپنیاں رائل پام پر ٹینڈر خرید رہی ہیں۔