اسلام آباد: رہنما پاکستان تحریک انصاف (پی ٹی آئی) شبلی فراز کو دل کی تکلیف کے باعث اسپتال منتقل کر دیا گیا۔
ذرائع نے اے آر وائی نیوز کو بتایا کہ سینیٹ میں قائد حزب اختلاف کو سینے میں تکلیف ہوئی جس کے بعد انہیں اسپتال لے جایا گیا۔
اسپتال ذرائع کے مطابق شبلی فراز کو رات گئے پی آئی سی پشاور ہنگامی طور پر منتقل کیا گیا، ان کو دل کی تکلیف ہوئی جس کے بعد ابتدائی علاج کیا گیا۔
یہ بھی پڑھیں: شبلی فراز زخمی حالت میں اسپتال منتقل، طبیعت ناساز
مزید بتایا گیا کہ ڈاکٹرز نے پی ٹہ آئی رہنما کو آئندہ 24 گھنٹے نگرانی میں رکھنے کا فیصلہ کیا ہے، ڈاکٹرز آج ان کے آئندہ کے علاج سے متعلق مشاورت کریں گے۔
یاد رہے کہ مارچ 2023 میں پی ٹی آئی رہنما کو طبیعت ناسازی کے باعث اسپتال منتقل کیا گیا تھا۔ شبلی فراز توشہ خانہ کیس کی سماعت کے موقع پر اسلام آباد جوڈیشل کمپلیکس میں عمران خان کے ہمراہ تھے، بعد ازاں میڈیا پر ان کے اچانک غائب ہو جانے کی خبریں نشر ہوئی تھیں۔
بتایا گیا تھا کہ سابق وفاقی وزیر کو زخمی حالت میں اسپتال منتقل کیا گیا۔ ڈاکٹرز کا کہنا تھا کہ وہ تشدد سے زخمی ہوئے اور شیلنگ کے باعث پھیپھڑے متاثر ہوئے۔
پی ٹی آئی رہنماؤں عمر ایوب، اسد عمر اور سینیٹر فیصل سلیم نے شبلی فراز کی عیادت کی اور خیریت پوچھی تھی۔