ٹوکیو اولمپکس میں جاری کھیلوں کے مقابلوں میں حصہ لینے والی امریکا کی سیمون بائلز نے جمناسٹک میں کانسی کا تمغہ جیت لیا ہے۔
سیمون بائلز وہ امریکی ایتھلیٹ ہیں، جنہوں نے اولمپکس کے کچھ ایونٹس سے دستبرداری ظاہر کی تھی، جس کی وجہ بائلز ذہنی مسائل کا شکار تھیں اور جمناسٹک کے دوران ہوا میں اپنا توازن برقرار نہیں رکھ پا رہی تھیں۔
بعد ازاں انہوں نے تمام طبی مسائل کو بالائے طاق رکھتے ہوئے میدان میں اترنے کا فیصلہ کیا اور برانز میڈل حاصل کرنے میں کامیاب ہوگئیں، جمناسٹک کےاس ایونٹ میں چین کی چن چن گوان نے گولڈ میڈل جبکہ چین ہی کی شی جن ٹینگ نے سلور میڈل حاصل کیا۔
سیمون بائلز کو جمناسٹک کے کھیل کی تاریخ کی کامیاب ترین کھلاڑیوں میں شمار کیا جاتا ہت، انہوں نے ریو ڈی جنیرو میں دو ہزار سولہ میں ہونے والے اولمپکس میں سونے کے چار تمغے اور کانسی کا ایک تمغہ جیتا تھا۔
یہ بھی پڑھیں:ٹوکیو اولمپکس: آسٹریلوی خاتون ایتھلیٹ نے تاریخ رقم کردی
سپرنگ، ٹیکساس سے تعلق رکھنے والی بائلز نےعالمی چمپیئن شپ مقابلوں میں پچیس تمغے جیت رکھے ہیں، جن میں سے انیس سونے کے تمغے ہیں۔ جمناسٹک کی خواتین کھلاڑیوں کے لیے یہ ایک ریکارڈ ہے، اُن کی بنیادی خصوصیت تین مرتبہ گھومنا اور دو مرتبہ الٹی قلابازیاں لگانا ہے۔