تلہ گنگ: امیر جماعت اسلامی پاکستان سراج الحق کا کہنا ہے کہ ہمارے حکمرانوں کو کرپشن کے علاوہ اور کوئی کام نہیں آتا۔
جلسہ عام سے خطاب کرتے ہوئے سراج الحق نے کہا کہ مزید باریوں کے طلب گار سابقہ کارکردگی کا حساب دیں کیونکہ خاندانی بادشاہتوں کا دور ختم ہو چکا اور اب آقا غلام کی تقسیم نہیں چلے گی۔
سراج الحق نے کہا کہ ایک پاکستان میں دو نظام نہیں ہو سکتے، قوم 8 فروری کو جاگیرداروں اور سرمایہ داروں کا یومِ احتساب بنا دے، اقتدار میں آ کر ملک میں قرآن و سنت کا نظام نافذ کریں گے۔
امیر جماعت اسلامی پاکستان نے کہا کہ جماعت اسلامی ملک میں احتساب کا نظام نافذ کرے گی، آج ملک میں سود کا نظام ہے جو اللہ کے ساتھ جنگ کا اعلان ہے۔
انہوں نے کہا کہ پاکستان پیپلز پارٹی، مسلم لیگ (ن) اور پاکستان تحریک انصاف سمیت سب نے سود کا نظام دیا، اگر اللہ نے موقع دیا تو سب سے پہلے سود کا خاتمہ کیا جائے گا۔
ان کا کہنا تھا کہ جماعت اسلامی کشمیر کو آزاد کروائے گی، پیپلز پارٹی، (ن) لیگ اور پی ٹی آئی نے کشمیر کو آزاد کروانے کے بجائے بھارت سے دوستی کی۔
’امریکا، اسرائیل، بھارت کے مقابلے کیلیے جماعت اسلامی کو ووٹ دیں‘
دو روز قبل لوئر دیر میں اجتماع سے خطاب کرتے ہوئے امیر جماعت اسلامی پاکستان نے کہا تھا کہبدامنی اور معاشی بربادی کے خاتمے کا واحد راستہ 8 فروری کو بروقت انتخابات کا انعقاد ہے۔
سراج الحق نے کہا تھا کہ گیارہ سینیٹرز پچیس کروڑ عوام کی قسمت کا فیصلہ نہیں کر سکتے، نگراں حکومت جتنی دیر رہے گی قوم کی مصیبتوں میں اضافہ ہوگا۔
ان کا کہنا تھا کہ ملک کے مسائل کا واحد بروقت انتخابات میں ہے، ملک بچانا ہے تو آئین کے مطابق شفاف اور بروقت انتخابات کروانا ہوں گے۔
انہوں نے اپنے خطاب میں کہا تھا کہ امت کو متحد کرنے کیلیے قطر میں اسلامی ممالک کی تحریکوں کا اتفاق ہوا ہے، امریکا اسرائیل کے ساتھ فلسطینیوں کی نسل کشی میں برابر کا شریک ہے۔
امیر جماعت اسلامی پاکستان نے کہا تھا کہ 58 اسلامی ممالک اور پونے 2 ارب مسلمان فلسطینیوں کے قتل عام پر خاموش ہیں، امریکا، اسرائیل، بھارت و دیگر ملک دشمنوں کے مقابلے کیلیے عوام جماعت اسلامی کو ووٹ دیں۔
ان کا کہنا تھا کہ فلسطین کے معاملے پر امت مسلمہ کے حکمران امریکا اور اسرائیل کی صف میں کھڑے ہیں۔