سڈنی : آسٹریلوی ریاست تسمانیہ میں ایک چھوٹا مسافر طیارہ دوران پرواز پراسرار طور پر غائب ہوگیا، طیارے میں ایک بزرگ جوڑا سوار تھا۔
غیر ملکی میڈیا رپورٹ کے مطابق ایک چھوٹا طیارہ دوران پرواز اس وقت پراسرار طور پر غائب ہو گیا جب وہ تسمانیا سے نیو ساؤتھ ویلز کی جانب رواں دواں تھا۔
طیارے کے پائلٹ کی جانب سے کنٹرول ٹاور کو کوئی ہنگامی کال (مے ڈے) بھی موصول نہیں ہوئی اور نہ ہی اس نے کسی ریڈیو رابطے کے ذریعے کوئی اشارہ دیا۔
تاسمانیا پولیس کے مطابق مذکورہ طیارہ مقررہ وقت پر اپنی منزل پر نہیں پہنچ سکا تو اہلِ خانہ نے متعلقہ حکام کو مطلع کیا کہ طیارہ تاخیر کا شکار ہے، جس کے بعد بڑے پیمانے پر تلاش کا عمل شروع کردیا گیا۔
اس حوالے سے آسٹریلین میری ٹائم سیفٹی اتھارٹی حکام نے بتایا کہ دو نشستوں والا طیارہ بیس اسٹریٹ عبور کرتے ہوئے اچانک لاپتہ ہوا۔
طیارے میں ایک بزرگ جوڑا سوار تھا جن کی عمریں 60 اور 70 سال ہے، دونوں مسافروں کا تعلق تاسمانیا سے ہے جو اپنے عزیز و اقارب سے ملاقات کیلیے نیو ساؤتھ ویلز جا رہے تھے۔
پولیس کا کہنا ہے کہ طیارے کا پائلٹ ایک تجربہ کار ہوا باز ہے لیکن وہ جس طیارے میں سفر کر رہا تھا وہ اس کے لیے نسبتاً نیا تھا۔ آسٹریلین میری ٹائم سیفٹی اتھارٹی حکام کے مطابق طیارے کی تلاش جاری ہے۔