ممبئی: نامور بھارتی اداکارہ و سیاستدان پونم ڈھلون نے بالی وڈ اسٹار سوناکشی سنہا کی ان کے قریبی دوست ظہیر اقبال سے شادی کی تصدیق کر دی۔
میڈیا رپورٹس کے مطابق ہونم ڈھلون نے حالیہ انٹرویو میں انکشاف کیا کہ ان کو سوناکشی سنہا اور ظہیر اقبال کی شادی کا خوبصورت دعوت نامہ مل گیا۔
پونم ڈھلون نے کہا کہ سوناکشی سنہا اور ظہیر اقبال نے خود مجھے دعوت نامہ ارسال کیا اور میری نیک تمنائیں جوڑے کے ساتھ ہیں، بچپن سے سوناکشی کو جانتی ہوں اور بالی وڈ میں اس کا پورا سفر دیکھا ہے۔
انہوں نے کہا کہ میری دعا ہے سوناکشی خوش رہے، وہ بہت خوش مزاج لڑکی ہے۔
انٹرویو کے دوران کیمرے کی جانب دیکھتے ہوئے پونم ڈھلون نے کہا کہ ’ظہیر پلیز، تم سوناکشی کو ہمیشہ خوش رکھنا کیونکہ وہ بہت قیمتی لڑکی ہے‘۔
گزشتہ روز جوڑے کی شادی کا منفرد آڈیو دعوت نامہ سوشل میڈیا پر لیک ہونے کے بعد وائرل ہوا تھا۔ ڈیجیٹل دعوت نامے میں سوناکشی سنہا اور ظہیر اقبال نے اپنے 7 سالہ تعلقات کو شادی کے رشتے میں تبدیل کرنے کا اعلان کیا تھا۔
دعوت نامے میں بالی وڈ اداکارہ اور اس کے قریبی دوست کی آواز سنی جا سکتی ہے جو کہہ رہے ہیں کہ ’میرے جاسوس دوستوں اور فیملی میمبرز جو اس پیج تک رسائی حاصل کر سکے ہیں ان کو ہماری طرف سے ہائے‘۔
اس میں اداکارہ مزید کہتی ہیں کہ گزشتہ 7 سالوں سے ہم ایک ساتھ ہیں اور اس دوران ہمارے پیار اور خوشی نے ہمیں یہ فیصلہ لینے کے قابل بنا دیا کہ اب ہم ریومرڈ گرل فرینڈ اور بوائے فرینڈ سے آفیشل اہلیہ اور خاوند بن جائیں۔