ویڈیو : تیز رفتار بس اور کار میں خوفناک تصادم، دیکھنے والے دم بخود رہ گئے

بھارت میں تیز رفتار بس ڈرائیور سے بےقابو ہوکر کار سے جا ٹکرائی اور الٹ گئی، ٹریفک حادثے میں ایک نوجوان لڑکی ہلاک اور متعدد زخمی ہوگئے، جس کی ویڈیو سوشل میڈیا پر زیرِ گردش ہے۔

یہ اندوہناک ٹریفک حادثہ گزشتہ روز صبح کنجوانی بائی پاس جموں شہر کے مضافات میں پیش آیا، جس کا منظر جائے وقوعہ پر لگے سی سی ٹی وی کیمرے میں محفوظ ہوگیا۔

بھارتی میڈیا کے مطابق پولیس حکام کا کہنا ہے کہ تیز رفتاری کے باعث منی بس ڈرائیور کے کنٹرول سے باپر ہوگئی اور سامنے سے آنے والی کار سے ٹکرا کر الٹ گئی۔

سی سی ٹی وی فوٹیج میں دیکھا جاسکتا ہے کہ بس کتنی رفتار سے آرہی ہے اور کار سے ٹکرانے کے بعد اُلٹ کر سڑک پر دور تک پھسل جاتی ہے۔

مذکورہ ٹریفک حادثے میں بس میں سوار 18 سالہ طالبہ نے موقع پر ہی دم توڑ دیا جبکہ دیگر 8 افراد شدید زخمی ہوگئے جنہیں طبی امداد کیلئے قریبی اسپتال منتقل کیا گیا جہاں دو کی حالت تشویشناک بتائی جاتی ہے، زخمی طلبہ اسکول جا رہے تھے۔