لاہور (10 اگست 2025): محکمہ ریلوے نے سپیزنڈ میں ٹریک پر دھماکے کے بعد بلوچستان میں ٹرین آپریشن معطل کرنے کا اعلان کر دیا۔
وزیر ریلوے حنیف عباسی نے اپنے بیان میں بتایا کہ خراب حالات کی وجہ سے بلوچستان میں کچھ دنوں کیلیے ٹرین آپریشن معطل کیا ہے، 10 سے 13 اگست تک پشاور سے کوئٹہ جعفر ایکسریس ٹرین آپریشن معطل رہے گا۔
یہ بھی پڑھیں: کوئٹہ: سپیزنڈ کے قریب ریلوے ٹریک پر دھماکا
حنیف عباسی نے بتایا کہ 11 سے 14 اگست تک کوئٹہ سے پشاور جعفر ایکسپریس معطل رہے گی، کراچی سے کوئٹہ کے درمیان بولان میل آپریشن 10 سے 15 اگست تک معطل رہے گا۔
انہوں نے بتایا کہ سکیورٹی کلیئرنس کے بعد کوئٹہ سے ٹرین آپریشن شروع کیا جائے گا، دہشتگردوں کی بزدلانہ کارروائیاں ہمارے عزم کو کمزور نہیں کر سکتیں۔
آج صبح سپیزنڈ میں ریلوے ٹریک پر دھماکا ہوا جس کے باعث ٹرین کی 5 بوگیاں پٹری سے اتر گئیں۔
ریلوے حکام نے ٹریک پر دھماکے کی تصدیق کرتے ہوئے بتایا کہ یہ اُس وقت ہوا جب جعفر ایکسپریس گزر رہی تھی، دھماکے سے ٹرین کی 5 بوگیاں پٹری سے اتر گئیں۔
انہوں نے بتایا کہ واقعے میں کسی مسافر کے زخمی ہونے کی اطلاع نہیں ہے، ریلیف ٹرین کوئٹہ ریلوے اسٹیشن سے موقع پر روانہ کر دی گئی۔
تاہم اب ریلوے حکام کا کہنا ہے کہ سپیزنڈ دھماکے کے بعد ریلوے ٹریک کی بحالی کا کام جاری ہے، ڈی ریل بوگیوں کو ٹریک پر واپس لایا جا رہا ہے۔
انہوں نے بتایا کہ جعفر ایکسپریس کے مسافروں کو واپس کوئٹہ روانہ کر دیا گیا، پشاور سے آنے والی جعفر ایکسپریس کو سبی ریلوے اسٹیشن پر روک دیا گیا۔
ریلوے حکام کے مطابق سبی سے مسافروں کو براستہ سڑک کوئٹہ پہنچایا جائے گا، سبی پہنچنے والی جعفر ایکسپریس کو سبی سے واپس روانہ کر دیا گیا۔