کراچی: شہر قائد میں لاک ڈاؤن کی سختی کے حوالے سے کراچی پولیس چیف عمران یعقوب مہناس نے حکم نامہ جاری کردیا۔ عوام کو گھروں میں رہنے کی ہدایت کی گئی ہے۔
تفصیلات کے مطابق ایڈیشنل آئی جی کراچی نے لاک ڈاؤن پر سختی سے عمل درآمد کا حکم دے دیا اور کہا ایس او پیز کی خلاف ورزی پر نرمی نہیں ہوگی، شہر کی اہم شاہراہوں پر پوائنٹس بنائےجائیں گے، 8بجے کے بعد عوام غیرضروری باہر نہ نکلیں، مخصوص پوائنٹس پر غیرضروری نکلنے والوں کو روکا جائے گا۔
عمران یعقوب کا کہنا ہے کہ پولیس اہلکار عوام سے شائستگی سے پیش آئیں، عوام بھی پولیس سے مکمل تعاون کریں، 6بجے کے بعد کھلنے والی دکانوں کے خلاف کارروائی کی جائے۔
ایڈیشنل آئی جی کراچی نے مزید کہا کہ سینئرپولیس افسران خود اپنے علاقوں میں رہ کر عمل درآمد کرائیں۔
کراچی: لاک ڈاؤن مزید سخت، رات 8 بجے کے بعد گھر سے نکلنے والوں کے ساتھ کیا ہوگا؟ پولیس نے بتا دیا
واضح رہے کہ آج صبح کورونا ٹاسک فورس کا اجلاس ہوا جس کے بعد سندھ حکومت نے شہر قائد میں لاک ڈاؤن مزید سخت کرنے کا فیصلہ کیا۔ اس حوالے سے وزیراعلیٰ سندھ نے نیا حکم نامہ بھی جاری کردیا ہے۔ جس کا اطلاق کل سے کیا جائے گا۔ حکم نامے میں کہا گیا کہ شہریوں کو رات 8 بجےکے بعد غیرضروری گھومنے کی اجازت نہیں ہوگی۔