شوگر انڈسٹری میں ٹیکس چوری کے خاتمے کیلئے ایف بی آر کا اہم اقدام

اسلام آباد: فیڈرل بورڈ آف ریونیو شوگر انڈسٹری میں ٹیکس چوری کے خاتمہ کے حوالے سے پُرعزم ہے۔

تفصیلات کے مطابق ایف بی آر کا کہنا ہے کہ ایف بی آر کی فیلڈ فارمیشنز کی ٹیمیں ملک بھرکی شوگر ملز پر تعینات کردی گئی ہیں۔ چینی اُن نوٹیفائیڈ مصنوعات میں سے ایک ہے جس کی مانیٹرنگ کی جاتی ہے۔

ایف بی آر نے کہا کہ چینی کی پیداوار، فروخت، کلیئرنس، اسٹاک اور دیگر سرگرمیوں کی مانیٹرنگ ہوتی ہے۔

حکام نے بتایا کہ چینی کی تیار کردہ یا فراہم کردہ ہر بوری پر ٹیکس اسٹیمپ لگانا لازمی ہے۔ ٹیکس اسٹیمپ نہ ہونے پرمال ضبط کر لیا جائے گا، ڈیفالٹر کو 3 سال تک قید کی سزا دی جاسکتی ہے

ایف بی آر نے کہا کہ چینی پر سیلز ٹیکس چوری کی کسی بھی کوشش سے آہنی ہاتھوں سے نمٹا جائے گا۔ چینی چوری میں ملوث مل مالکان کے خلاف مقدمہ چلایا جائے گا۔