ورلڈ ٹیسٹ چیمپئن فائنل میں آسٹریلیا کے ہاتھوں بھارت کی شکست پر سابق کرکٹرز کی جانب سے روہت شرما الیون پر شدید تنقید کی جارہی ہے۔
بھارتی ٹیم کے سابق کپتان سنیل گواسکر بھی میچ کا تجزیہ کرتے ہوئے براہ راست نشریات میں ویرات کوہلی کے آؤٹ ہونے پر غصے میں آگئے۔
میزبان نے سنیل گواسکر سے سوال کیا کہ بھارت کے دو گیندوں پر تین کھلاڑی آؤٹ ہوئے خاص طور پر جیسے ویرات کی وکٹ گری تو انہوں نے وہ شاٹ کیسے کھیلا؟
جواب میں سنیل گواسکر نے کہا کہ ’وہ انتہائی برا شاٹ تھا، یہ آف اسٹمپ کے باہر ایک بہت ہی عام شاٹ تھا، شاید اسے اپنی نصف سنچری کی زیادہ فکر تھی کیونکہ اس کے لییے ایک رن درکار تھا یہ تب ہوتا ہے جب آپ کسی مائیل اسٹون کے نزدیک ہوتے ہیں۔‘
🤣🤣🤣🤣🤣 Sunny G has had enough. pic.twitter.com/gGI4P2oQQN
— ABVan (@ABVan) June 11, 2023
سنیل گواسکر نے کہا ‘آپ مجھ سے پوچھ رہی ہیں کہ اس نے یہ کیسے کیا، آپ کو یہ ویرات کوہلی سے پوچھنا چاہیے کہ انہوں نے یہ شاٹ کیوں کھیلا؟ ہم کئی بار یہ بات کرچکے ہیں کہ جب ہمیں میچ جیتنا ہو تب ایک لمبی اننگز کی ضرورت ہوتی ہے’۔
انہوں نے مزید کہا کہ کوہلی اتنی بات کرتا ہے کہ میچ کیسے جیتنا ہے، اس کے لیے لمبی اننگز کی ضرورت ہوتی ہے، پھر آپ یہ کیسے کرسکتے ہیں، جب گیند آف اسٹمپ کے باہر ہو تو آپ اسے کیسے کھیل سکتے ہیں؟
واضح رہے کہ ویرات کوہلی 49 رنز پر اسٹاک بولینڈ کی آف اسٹمپ سے باہر جاتی گیند کو کھیلا تھا اور سلپ میں اسمتھ کو کیچ دے بیٹھے تھے۔
یاد رہے کہ گزشتہ روز آسٹریلیا نے آئی سی سی ورلڈ ٹیسٹ چیمپئن شپ کے فائنل میں بھارت کو 209 رنز سے شکست دی تھی ۔فائنل کے آخری روز بھارتی ٹیم 444 رنز کے ہدف کے تعاقب میں 234 رنز بناکر آؤٹ ہو گئی، ٹیسٹ کے آخری روز بھارت کی 7 وکٹیں صرف 70 رنز پر گری تھیں۔