اسلام آباد: سپریم کورٹ نے ایک کیس میں قرار دیا کہ بچوں کی کفالت باپ کی ذمے داری ہے چاہے باپ کا کوئی روزگار نہ ہو۔
تفصیلات کے مطابق سپریم کورٹ نے بہاولپور کے رہائشی کی بچوں کی کفالت کی رقم کم کرنے کی درخواست خارج کر دی، عدالت نے ٹرائل کورٹ اور ہائی کورٹ کا فیصلہ برقرار رکھتے ہوئے دونوں بیٹیوں کو 15 ہزار ماہانہ دینے کا حکم دیا۔
بہاولپور کے رہائشی غلام دستگیر نے استدعا کی کہ میں تعلیم یافتہ نہیں ہوں، اور نہ ہی کوئی کام کرتا ہوں، فی بچہ 15 ہزار ادا نہیں کر سکتا۔
غلام دستگیر نے عدالت کو بتایا کہ میری سابق اہلیہ مجھے میری بوڑھی ماں سے الگ کرنا چاہتی تھی، جس پر اسے چھوڑ دیا، میں ماں کی خدمت کرنا چاہتا تھا۔
جسٹس سجاد علی شاہ نے کہا ماں کی خدمت کرنا آپ کی ذمے داری تھی، آپ کی سابقہ اہلیہ کی نہیں، اگر بیوی الگ رہنے کا مطالبہ کرے تو الگ رکھنا شوہر کی ذمہ داری ہے۔
جسٹس عمر عطا بندیال نے کہا کہ آپ جوان اور صحت مند ہیں، تو کام کیوں نہیں کرتے؟ دونوں بچیاں اسکول میں پڑھتی ہیں، ان کی کفالت آپ ہی نے کرنی ہے۔
واضح رہے کہ اس کیس کی سماعت جسٹس عمر عطا بندیال کی سربراہی میں سپریم کورٹ کے دو رکنی بینچ نے کی۔