کراچی : تھانے سے فرار ہونے والا ملزم پولیس فائرنگ سے ہلاک

کراچی (30 جولائی 2025) شہر قائد کے علاقے پاپوش نگر کے تھانے سے فرار ہونے والا ملزم پولیس اہلکار کی مبینہ فائرنگ سے ملزم ہلاک ہوگیا۔

اے آر وائی نیوز کی رپورٹ کے مطابق کراچی میں پاپوش نگر تھانے کے عقب میں پولیس کی فائرنگ سے مبینہ ملزم کی ہلاکت کا واقعہ سامنے آیا ہے۔

پولیس حکام کے مطابق ملزم عباس کو منشیات فروشی کے کیس میں پاپوش نگر تھانے کے اہلکاروں نے گرفتار کرکے لاک اپ کیا تھا اور پوچھ گچھ کیلیے لاک اپ سے تفتیشی افسر کے کمرے میں لے جایا گیا تھا۔

ملزم موقع پاتے ہی فرار ہونے کیلیے تھانہ پاپوش نگر کے تفتیشی افسر کے کمرے سے نکل کر بھاگا، مبینہ ملزم کے پیچھے پولیس اہلکار بھی بھاگا اور نہ رکنے پر اس پر پیچھے سے فائرنگ کی۔

ملزم کو پکڑنے کے دوران پولیس اہلکار کی چلائی گولی زیادہ خون بہہ جانے کی وجہ سے جان لیوا ثابت ہوئی، فائرنگ کرنے والے پولیس اہلکار سے مزید تفتیش کی جارہی ہے۔

پولیس حکام کا کہنا ہے کہ مبینہ ہلاک ملزم عباس کا کرمنل ریکارڈ سامنے آگیا ہے، پولیس کی فائرنگ سے ہلاک ہونے والے ملزم پر 5 سے زائد مقدمات درج تھے۔

مزید پڑھیں : 16 سالہ لڑکی کا قاتل پڑوسی نکلا، تہلکہ خیز انکشافات

کراچی کے علاقے ملیر کھوکھراپار میں لڑکی اریبہ کی لاش ملنے کا معمہ 20 دن میں حل ہوگیا۔ پولیس حکام کا کہنا ہے کہ 16 سالہ لڑکی اریبہ کے قتل میں ملوث پڑوسی ملزم محمد حذیفہ کو گرفتار کرلیا۔

ملزم نے اعترافی بیان میں کہا کہ 10 جولائی کو لڑکی کو زیادتی کا نشانہ بنایا، شور مچانے پر لڑکی کا منہ دبایا جس سے وہ مر گئی، لڑکی پڑوسن تھی، دوست کا پوچھنے میرے گھر آئی تھی۔