سویڈش زبان کی ڈکشنری 140 سال کی طویل محنت کے بعد مکمل کر لی گئی ہے اور آخری والیم چھپنے بھی بھیج دیا ہے لیکن اس میں بڑی خامی ہے۔
غیر ملکی میڈیا کے مطابق سویڈش زبان کی ڈکشنری 140 سال کی طویل محنت کے بعد مکمل کر لی گئی ہے۔ یہ لغت ادب کا نوبل انعام دینے والی سویڈش اکیڈمی کی جانب سے تیار کی گئی ہے جو 39 جلدوں اور 33 ہزار 111 صفحات پر مشتمل ہے۔
تاہم اس ڈکشنری کی بڑی خامی یہ ہے کہ اس میں موجودہ وقت میں رائج’’باربی ڈول، لیپ ٹاپ، ایپ،، کمپیوٹر‘‘ سمیت تقریباً 10 ہزار الفاظ شامل نہیں ہیں جن کے بارے میں انتظامیہ کا کہنا ہے کہ ان الفاظوں کو آئندہ سات سالوں میں ڈکشنری میں شامل کر لیا جائے گا۔
اس حوالے سے ڈکشنری کے ایڈیٹر کرسچن میٹسن کا کہنا ہے کہ سویڈش لغت کو 1883 میں شروع کیا گیا تھا اور اب ہم اس کو مکمل کر چکے ہیں۔ گزشتہ 140 سالوں میں 137 کُل وقتی ملازمین نے اس پر کام کرتے رہے ہیں۔
انہوں نے کہا کہ اہم سنگ میل تک پہنچنے کے باوجود کام ابھی مکمل نہیں ہوا ہے کیونکہ اے سے آر کی جلدیں اب اتنی پرانی ہو چکی ہیں کہ جدید الفاظ کو شامل کرنے کے لیے ان پر نظر ثانی کی ضرورت ہے۔
میٹسن نے کہا کہ ایسا ہی ایک لفظ ’الرجی‘ ہے جو سویڈش زبان میں 1920 کے آس پاس آیا لیکن اے والیم میں نہیں ہے کیونکہ یہ 1893 میں شائع ہوا تھا جب کہ ’باربی ڈول‘، ’ایپ‘ اور ’کمپیوٹر‘ ان 10 ہزار الفاظ میں شامل ہیں جو موجودہ لغت میں شامل نہیں تاہم اگلے سات سالوں میں انہیں شامل کر لیا جائے گا۔
لغت کے ایڈیٹر نے کہا کہ یہ ڈکشنری 1521 سے جدید دور تک سویڈش زبان کا ایک تاریخی ریکارڈ ہے۔ یہ آن لائن دستیاب ہے اور اس کی صرف 200 کے قریب کاپیاں شائع ہوئی ہیں، جن کا استعمال بنیادی طور پر محققین اور ماہرین لسانیات کرتے ہیں۔