سڈنی ٹیسٹ کے دوسرے روز آسٹریلیا نے اپنی پہلی اننگ میں دو وکٹوں کے نقصان پر 116 رنز بنا لیے ہیں جب کہ میچ خراب روشنی کے باعث رُکا ہوا ہے۔
پاکستان اور آسٹریلیا کے درمیان تین ٹیسٹ میچوں پر مشتمل سیریز کے دوسرے روز چائے سے وقفے سے قبل میزبان ٹیم نے پہلی اننگ میں دو وکٹوں کے نقصان پر 116 رنز بنا لیے ہیں جب میچ خراب روشنی کے باعث روک دیا گیا ہے۔ کینگروز کو شاہینوں کی برتری ختم کرنے کے لیے 197 رنز درکار ہیں۔
آسٹریلیا نے آج پنک ٹیسٹ کے دوسرے روز پہلی نا مکمل اننگ 6 رنز سے شروع کی اور اوپنرز نے ٹیم کو 70 رنز کا آغاز فراہم کیا۔ اس موقع پر اپنے کیریئر کا آخری ٹیسٹ کھیلنے والے ڈیوڈ وارنر 34 رنز بنا کر آؤٹ ہوگئے۔ انہیں آغا سلمان نے بابر اعظم کے ہاتھوں کیچ آؤٹ کرایا۔
دوسرے اوپنر عثمان خواجہ بھی 47 رنز پر عامر جمال کی وکٹ بن گئے۔ اس وقت آسٹریلوی ٹیم کا اسکور 108 رنز تھا۔ مارنوس لبوشن اور اسٹیون اسمتھ نے مل کر ٹیم کا اسکور 116 تک پہنچایا تھا کہ خراب روشنی کے باعث میچ کو روک دیا گیا جس کے بعد بارش شروع ہوگئی جس کے بعد پچ کو کورز کر دیا گیا ہے۔
آسٹریلیا کو پاکستان کی برتری ختم کرنے کے لیے اب بھی 197 رنز درکار ہیں اور اس کی 8 وکٹیں باقی ہیں۔
اس سے قبل سڈنی ٹیسٹ کے پہلے روز پاکستان ٹیم پہلی اننگ میں 313 رنز بنا کر آؤٹ ہو گئی تھی۔ ایک وقت میں صرف 96 رنز پر آدھی قومی ٹیم پویلین لوٹ چکی تھی لیکن عامر جمال کی تاریخ ساز شاندار اننگ، محمد رضوان اور آغا سلمان کی ذمے دارانہ بیٹنگ کے باعث پاکستان ٹیم پہلی اننگ میں 300 رنز کا ہندسہ پار کر سکی۔
عامر جمال نے نویں نمبر پر بیٹنگ کرتے ہوئے 82 رنز کی اننگ کھیلی۔ محمد رضوان نے 88 جب کہ آغا سلمان نے 53 رنز بنائے تھے۔ آسٹریلیا کی جانب سے سب سے کامیاب بولر ان کے کپتان پیٹ کمنز رہے تھے جنہوں نے پرتھ کی دونوں اننگز کے بعد سڈنی میں مسلسل تیسری اننگ میں 5 وکٹیں حاصل کیں۔
واضح رہے کہ تین ٹیسٹ پر مشتمل سیریز آئی سی سی ٹیسٹ چیمپئن شپ 2025 سائیکل کا حصہ ہے جس میں آسٹریلیا کو پہلے کی دو صفر کی فیصلہ کن برتری حاصل ہے جب کہ پاکستان کے پاس وائٹ واش سے کی ہزیمت سے بچنے اور کینگروز کی سرزمین پر جیت کا 29 سالہ قحط توڑنے کا یہ آخری موقع ہے۔