کراچی: ٹی ٹوئنٹی وہیل چیئر کرکٹ ایشیا کپ 2023 کا آغاز 4 اکتوبر سے نیپال میں ہورہا ہے جس میں مشترکہ میزبان پاکستان اور نیپال، بھارت، بنگلہ دیش اور سری لنکا کی ٹیمیں ایکشن میں نظر آئیں گی۔
ایونٹ میں 11 میچز کھیلے جائیں گے جب کہ ایشیا کپ کا فائنل 9 اکتوبر کو تریبھون یونیورسٹی انٹرنیشنل کرکٹ اسٹیڈیم کٹھمنڈو میں کھیلا جائے گا۔ دفاعی چیمپئن پاکستان دوسرے ٹی ٹوئنٹی وہیل چیئر کرکٹ ایشیا کپ 2023 کے لیے 2 اکتوبر کی صبح براستہ دبئی کھٹمنڈو، نیپال کے لیے روانہ ہوگا۔
پاکستانی ٹیم نیپال کیخلاف اپنی مہم کا آغاز کرے گی۔ قومی ٹیم کی قیادت محمد ذیشان کرینگے ۔ دیگر کھلاڑیوں میں عمران امین، ساجد علی عباسی، محمد فیض، محمد لطیف، احمد یار، موذن نواز (وکٹ کیپر) محسن تھبیل، عمر گل، محمد عدنان، محمد شاہد، مثل خان، آصف ندیم، ذوالفقار سواتی اور خالد شاہ شامل ہیں۔
تمام ٹیمیں 3 اکتوبر کو نیپال پہنچیں گی اور ایونٹ سے قبل ٹیموں کے کپتان پریس کانفرنس کریں گے۔ ٹی ٹوئنٹی وہیل چیئر کرکٹ ایشیا کپ 2023 کا آغاز رنگارنگ افتتاحی تقریب سے ہوگا۔
تما م میچز کی لائیو اسٹریمنگ پاکستان انٹرنیشنل کونسل آف وہیل چیئر کرکٹ (آئی سی ڈبلیو سی)، پاکستان وہیل چیئر کرکٹ کونسل کے یوٹیوب چینل پر ہوگی جب کہ ٹی وی چینل ایکشن اسپورٹس (نیپال) پر میچز براہ راست نشر کیےجائیں گے۔
خیال رہے کہ ٹی ٹوئنٹی وہیل چیئر کرکٹ ایشیا کپ 2023 کا انعقاد پاکستان میں ہونا تھا تاہم پاک بھارت تعلقات میں کشیدگی کی وجہ سے ایونٹ کو نیوٹرل وینیو نیپال منتقل کرنا پڑا۔