اسلام آباد: مسلم لیگ (نواز) کے رہنما دانیال عزیز نے کہا ہے کہ عمران خان کو وہ جگہ نہیں ملی جس کے لیے وہ تڑپ رہے ہیں اور اس کی سزا پورے ملک کو دے رہے ہیں۔
وہ اسلام آباد میں میڈیا سے بات کر رہے تھے، انہوں نے کہا کہ عمران خان جس عہدے کے حصول کے لیے بے چین ہیں وہ انہیں نہیں ملا تو ملک میں انتشار اور افراتفری پھیلانے لگے۔
انہوں نے کہا کہ بنی گالہ پراپرٹی ڈیل میں عمران خان کا نام ہے جمائما کا نہیں اور جمائما کے پیسوں کا منی ٹریل آپ دے سکتے ہیں اب آپ بھاگیں نہیں، دلیر بنیں اور جواب دیں۔
دانیال عزیز کا کہنا تھا کہ وزیر اعظم نے لکھ کر دیا تھا کہ کمیشن بنایا جائے لیکن عمران خان نے یہ اقدام مسترد کر دیا تھا اس کے باوجود وزیراعظم کے وکلاء ان کا اور ان کے اہل خانہ کا موقف عدالت میں پیش کر رہے ہیں۔
انہوں نے خیبر پختونخوا کی حکومت کو تنقید کا نشانہ بناتے ہوئے کہا کہ کے پی کے میں ڈھائی سال بعد احتساب کمیشن بنا لیکن اب تک کمیشن کا ڈی جی نہیں لگایا جا سکا جس سے تحریک انصاف کی سنجیدگی کا بھرپور اندازہ لگایا جا سکتا ہے۔
مسلم لیگی رہنما نے کہا کہ 13 تاریخ کو اسلام آباد ہائی کورٹ میں پتا لگے گا کہ کونسی جماعت حکم امتناع کے پیچھے چھپ رہی ہے اور کون سی جماعت الزامات کا جواب دینے عدالتوں کے چکر لگا رہی ہے۔
دانیال عزیز نے مزید کہا کہ تحریک انصاف کے چیئرمین کی تنقید سے فوج کے علاوہ کوئی بھی ادارہ محفوظ نہیں رہا ہے اور ان کی دھرنوں اور الزام تراشیوں سے بھری سیاست نے ملکی معیشت کو ناقابل تلافی نقصان پہنچایا ہے۔
