اسلام آباد : عالمی مالیاتی فنڈ (آئی ایم ایف) کے تکنیکی ماہرین کی ٹیم ٹیکس ریونیو اور ٹیکس نیٹ بڑھانے پر مشاورت کے لئے آئندہ ہفتے پاکستان آئے گی۔
تفصیلات کے مطابق عالمی مالیاتی فنڈ (آئی ایم ایف) کے ماہرین کی ٹیم آئندہ ہفتے پاکستان آئےگی، آئی ایم ایف ماہرین ٹیکس ریونیو ،ٹیکس نیٹ بڑھانے کیلئے مشاورت کریں گے۔
ذرائع نے بتایا کہ تکنیکی ماہرین کا وفد ایف بی آر کیساتھ تقریباً ایک ہفتہ ٹیکس پالیسی پر مشاورت کرے گا، ایف بی آر ،آئی ایم ایف تکنیکی وفد ٹیکس پالیسی میں ترامیم کیلئے اقدامات کریں گے، ٹیکس پالیسی میں ترامیم کا مقصدٹیکس نیٹ کووسیع کرنا ہے۔
ماہرین کی مشاورت کا مقصد زیادہ ٹیکس اکٹھا کرنا ہوگا، ریٹیلرز کیلئےاسکیم متعارف کرانے کا بنیادی ڈھانچہ بھی ملکرتیار کیا جائے گا اور مزید10لاکھ لوگوں کوٹیکس نیٹ میں لاکر ٹیکس دہندگان کی تعداد 60لاکھ تک پہنچائی جائے گی۔
تکنیکی وفد کےساتھ ملکرٹیکس پالیسی میں ترامیم تیارکی جائیں گی، تیار کی جانےوالی ٹیکس ترامیم آئندہ بجٹ میں نافذالعمل ہوں گی۔
ذرائع نے بتایا ہے کہ ٹیکس پالیسی اور انفورسمنٹ میں بہتری کے لئے تکنیکی وفدمعاونت کرے گا، آئی ایم ایف کے ماہرین کی ٹیم ایک ہفتےتک پاکستان میں قیام کرے گی تاہم آئی ایم ایف ٹیم کا موجودہ قرض پروگرام اور اس کی قسط سےکوئی تعلق نہیں۔