ARYNews.tv | Urdu – Har Lamha Bakhabar

Tag: آئین

  • شام کا نیا آئین لکھنے کے لیے کمیٹی قائم، خواتین بھی شامل

    شام کا نیا آئین لکھنے کے لیے کمیٹی قائم، خواتین بھی شامل

    حلب: شام میں نئی آئین سازی کے لیے 2 خواتین سمیت 7 رکنی کمیٹی قائم کر دی گئی۔

    غیر ملکی میڈیا رپورٹس کے مطابق شام میں آئین کے مسودے کی تیاری کے لیے سات رکنی کمیٹی قائم کی گئی ہے، جس میں دو خواتین کو بھی شامل کیا گیا ہے، کمیٹی کے قیام کا اعلان احمد الشرع نے اتوار کے روز کیا۔

    عبوری حکومت کے سربراہ احمد الشرع کا کہنا ہے کہ کمیٹی قومی مکالمے کے لیے ایک کانفرنس کا اہتمام کرے گی، جس میں ملک کے سیاسی مستقبل کا پروگرام ترتیب دیا جائے گا، اور نئے آئین کی تدوین کا اہتمام کیا جائے گا تاکہ ملک کے نظام کو قاعدے کے ساتھ آگے بڑھایا جا سکے۔

    شام کے مختلف آئین ہیں، جن میں پہلا 1930 کا شامی آئین ہے، تازہ ترین آئین 26 فروری 2012 سے 8 دسمبر 2024 تک اسد حکومت کے خاتمے تک نافذ تھا۔ 2012 کے آئین کو باضابطہ طور پر 29 جنوری 2025 کو معطل کر دیا گیا تھا اور اب ایک نیا آئین تشکیل دیا جا رہا ہے۔

    جنگ بندی کے پہلے مرحلے میں توسیع نہیں ہوگی، حماس نے واضح کردیا

    نئے شامی حکام 8 دسمبر کو بشار الاسد کی برطرفی کے بعد شام اور اس کے اداروں کی تعمیر نو پر توجہ مرکوز کیے ہوئے ہیں، جن کی آمد کے ساتھ ہی شام میں اسد کے خاندان کی نصف صدی سے زائد آہنی طاقت اور 13 سال کی تباہ کن خانہ جنگی کا خاتمہ ہوا۔

    آئین ساز کمیٹی ماہرین پر مشتمل ہے، جس کو شام میں ’’عبوری مرحلے کو منظم کرنے والے آئینی اعلامیے‘‘ کا مسودہ تیار کرنے کا کام سونپا گیا ہے، یہ کمیٹی صدر کو اپنی تجاویز پیش کرے گی، تاہم ٹائم فریم کی وضاحت نہیں کی گئی ہے۔ شام کے نئے حکام نے اسد دور کے آئین کو منسوخ کر دیا ہے، اور احمد الشرع نے کہا ہے کہ اسے دوبارہ لکھنے میں 3 سال لگ سکتے ہیں۔

  • بنگلہ دیش میں 1972 کا آئین ختم کرنے کا مطالبہ، نیا منشور تیار

    بنگلہ دیش میں 1972 کا آئین ختم کرنے کا مطالبہ، نیا منشور تیار

    بنگلہ دیش میں حسینہ واجد حکومت کے خاتمے کا سبب بننے والی طلبہ تنظیم نے ملکی آئین کو مجیبسٹ قرار دیتے ہوئے ختم کرنے کا مطالبہ کیا ہے۔

    غیر ملکی میڈیا کے مطابق اگست 2024 میں طلبہ احتجاج کے ذریعے حسینہ واجد کی شخصی آمریت کا خاتمہ کرنے والی طلبہ تنظیم ’اینٹی ڈسکرمنیشن اسٹوڈنٹس موومنٹ‘ نے 1972 کے آئین کو ختم کرنے کی تجویز پیش کی ہے۔

    طلبہ تنظیم نے اس آئین کو ’مُجیبسٹ‘ قرار دیتے ہوئے کہا ہے کہ یہ آئین ہندوستان کی ’جارحیت‘ کو ہوا دینے کا سبب بنا ہے۔

    رپورٹ کے مطابق مذکورہ تنظیم نے آئین میں از سرنو تشکیل دینے کے لیے ایک نیا منشور بھی تیار کر لیا ہے جسے 31 دسمبر (منگل) کو جاری کیا جائے گا۔

    طلبہ تنظیم کے اس مطالبے پر بی این پی نے اعتراض کرتے ہوئے اسے آئین کی تاریخ کو نظرانداز کرنے کے مترادف قرار دیا ہے اور کہا ہے کہ اگر آئین میں کوئی خامی ہے، تو اسے درست کیا جا سکتا ہے لیکن اسے ختم کرنا فاشزم کے مترادف ہوگا۔

    دوسری جانب، بنگلہ دیش کی موجودہ عبوری حکومت نے اس تجویز سے اپنے آپ کو الگ کر لیا ہے اور کہا کہ یہ ایک ذاتی اقدام ہے جس کا حکومت سے کوئی تعلق نہیں ہے۔

    دریں اثنا سابق وزیراعظم اور حسینہ واجد کی سخت سیاسی حریف بیگم خالدہ ضیا کی جماعت نے ابھی تک اس معاملے پر کوئی ردعمل نہیں دیا ہے۔

    https://urdu.arynews.tv/bangladeshi-politicians-claim-on-indian-states/

  • اب روبوٹ ’آئین‘ کے تحت کام کریں گے؟ جانیے کیسے ؟

    اب روبوٹ ’آئین‘ کے تحت کام کریں گے؟ جانیے کیسے ؟

    کیلیفورنیا : دنیا بھر میں مقبول ٹیکنالوجی کمپنی گوگل نے’روبوٹ آئین‘تحریر کرلیا جو روبوٹس سے ہونے والے نقصانات کو محدود کرنے کی کوشش کرے گا۔

    غیر ملکی خبر رساں ادارے کی رپورٹ کے مطابق کمپنی کو امید ہے کہ اس کا ڈیپ مائنڈ روبوٹکس ڈویژن ایک دن ایک ایسا ذاتی معاون روبوٹ تیار کرنے کے قابل ہو جائے گا جو دی گئی ہدایات پر عمل کر سکے۔

    گوگل پُر امید ہے کہ ایک روز ایسا مددگار روبوٹ بناسکے گا جو گھر صاف کرنے یا کھانا بنانے جیسے حکم کی تعمیل کرسکے لیکن بظاہر ایک سادہ سی درخواست روبوٹ کی سمجھ سے بالا ہونے کے ساتھ خطرناک ثابت ہوسکتی ہے یعنی کسی روبوٹ کو شاید یہ معلوم نہ ہو کہ گھر کو اس طریقے صاف نہیں کیا جانا چاہیے کہ گھر کے مالک کو نقصان پہنچے۔

    robotic

    کمپنی نے اب نئی پیش رفتوں کا ایک مجموعہ متعارف کروایا ہے، جس سے اسے امید ہے کہ ایسے روبوٹ تیار کرنا آسان ہوجائے گا جو (انسانوں کو) بغیر کوئی نقصان پہنچائے اس طرح کے کاموں میں مدد کر سکیں گے۔

    ان سسٹمز کا مقصد روبوٹس کو تیزی سے فیصلہ کرنے اور ان کے اطراف ماحول کے متعلق بہتر سمجھ اور سمت شناسی میں مدد دینا ہے۔

    اس کامیابی میں آٹو آر ٹی نامی نیا سسٹم شامل ہے جو انسانوں کے مقاصد سمجھنے کے لیے مصنوعی ذہانت کو استعمال کرتا ہے۔ یہ سسٹم ایسا لارج لینگوئج ماڈل (ایل ایل ایم) کو استعمال کرتے ہوئے کرتا ہے۔

    Constitution

    یہ سسٹم روبوٹ میں نصب کیمروں سے ڈیٹا لیتا ہے اور اس کو وژوئل لینگوئج ماڈل (وی ایل ایم) میں بھیج دیتا ہے، جو ماحول اور اس میں موجود چیزوں کو سمجھتے ہوئے الفاظ میں بیان کرسکتا ہے۔

    اس ڈیٹا کو بعد میں ایل ایل ایم میں بھیج دیا جاتا ہے جو ان الفاظ کو سمجھتا ہے، ممکنہ کاموں کی فہرست بناتا ہے اور پھر یہ فیصلہ کرتا ہے کہ کن کاموں کو انجام دیا جانا چاہیئے۔

    تاہم، گوگل نے یہ بھی واضح کیا کہ ان روبوٹس کو اپنی روز مرہ زندگی کا حصہ بنانے کے لیے لوگوں کو ضرورت ہوگی کہ اس بات کو یقینی بنائیں کہ یہ روبوٹ محفوظ رویہ اختیار کریں گے۔

  • ایک سال پہلے اپوزیشن نے پاکستان کو بچانے کے لیے آئین کا سہارا لیا: وزیر اعظم

    ایک سال پہلے اپوزیشن نے پاکستان کو بچانے کے لیے آئین کا سہارا لیا: وزیر اعظم

    اسلام آباد: وزیر اعظم پاکستان شہباز شریف کا کہنا ہے کہ ایک سال پہلے اپوزیشن نے پاکستان کو مشکل حالات سے بچانے کے لیے آئین کا سہارا لیا، اتحادی حکومت کو ایک سال ہوگیا ہے، مشکلات اور چیلنجز ہیں اس میں کوئی شک نہیں۔

    تفصیلات کے مطابق آئین پاکستان کی گولڈن جوبلی کے موقع پر منعقد ہونے والے قومی اسمبلی اجلاس میں وزیر اعظم شہباز شریف نے خطاب کرتے ہوئے کہا کہ آئین آج بھی زندہ سلامت ہے، دستور کا تحفہ دینے والے قائدین، جماعتوں اور ارکان کو خراج عقیدت پیش کرتے ہیں۔

    وزیر اعظم کا کہنا تھا کہ آئین یاد دلاتا ہے کہ 1955 میں نظریہ ضرورت کو ایجاد کیا گیا۔

    انہوں نے کہا کہ ایک سال پہلے اپوزیشن نے پاکستان کو مشکل حالات سے بچانے کے لیے آئین کا سہارا لیا، اتحادی حکومت کو ایک سال ہوگیا ہے، مشکلات اور چیلنجز ہیں اس میں کوئی شک نہیں۔

    وزیر اعظم کا کہنا تھا کہ ماضی میں ایک چیف جسٹس نے بغیر پوچھے ایک ڈکٹیٹر کو 3 سال کی رعایت دی، تمام جماعتوں نے اپنے منشور کے مطابق الیکشن میں جانا ہے، جب طے کرلیں کہ مل کر چلنا ہے تو بڑے بڑے معاملات حل ہو جاتے ہیں۔

  • بھٹو کا نواسہ آج اپنے نانا کا دیا گیا آئین توڑنے کے لیے تیار ہے، شاہ محمود

    بھٹو کا نواسہ آج اپنے نانا کا دیا گیا آئین توڑنے کے لیے تیار ہے، شاہ محمود

    پاکستان تحریک انصاف کے سینیئر وائس چیئرمین شاہ محمود قریشی نے کہا ہے کہ بھٹو آئین دے کر جاتا ہے اور نواسہ آج اسے توڑنے کیلئے بیٹھا ہے ۔

    اے آر وائی نیوز کے مطابق پی ٹی آئی کے مرکزی رہنما اور سابق وزیر خارجہ شاہ محمود قریشی نے اسلام آباد میں پریس کانفرنس کرتے ہوئے کہا ہے کہ پاکستان کی سیاسی، سپریم کورٹ کی تاریخ کا اہم دن ہے، جس میں ایک طرف وہ طبقہ ہے جو آئین پر حملہ آور ہوچکا ہے، دوسری طرف وہ طبقہ ہے جو انصاف کیلئے دستک دے رہا ہے۔

    الیکشن التوا کیس : سپریم کورٹ کا حکومتی اتحاد کے وکلا کو سننے سے انکار

    شاہ محمود قریشی نے کہا کہ چیف جسٹس آئین اور قانون کو سمجھتے ہیں، آج پوری قوم چیف جسٹس کیساتھ اظہاریکجہتی کررہی ہیں وکلا  اوربارز کا مؤقف سب کےسامنے ہےجنگل کے قانون کا ملک متحمل ہو نہیں سکتا۔

    پی ٹی آئی کے سینیئر وائس چیئرمین کا کہنا تھا کہ ن لیگ اور پیپلز پارٹی نے آئین بنانے میں کردار ادا کیا مگر افسوس ہو رہا ہے، آج بھٹو کے نام نہاد جانشین  آئین پر حملہ کر رہے ہیں، بھٹو آئین دےکر جاتا ہے اور نواسہ آج اسےتوڑنےکیلئے بیٹھا ہے، بس یہ فرق ہے بھٹو کی پیپلزپارٹی اور زرداری کی پیپلزپارٹی میں۔

  • حسین شہید سہروردی: شخصیت و خدمات پر ایک نظر

    حسین شہید سہروردی: شخصیت و خدمات پر ایک نظر

    عراق کے شہر سہرورد سے ہجرت کے بعد مغربی بنگال کو اپنا مستقر بنانے والے خاندان کی جن شخصیات نے علم و فنون سے لے کر سیاست کے میدان تک اپنی قابلیت اور صلاحیتوں کو منوایا ان میں ایک حسین شہید سہروردی بھی ہیں۔

    ان کا خاندان سلسلۂ تصوّف کے عظیم بزرگ شہاب الدّین سہروردی کے خاندان سے نسبت کی وجہ سے خود کو ‘‘سہروردی’’ کہلواتا تھا۔

    مختصر عرصے کے لیے حسین شہید سہروردی پاکستان میں وزارتِ عظمیٰ کے منصب پر فائز رہے. آج اس مدبّر اور فہیم سیاست داں کی برسی ہے۔ ان کی زندگی اور سیاسی سفر پر چند سطور پیشِ خدمت ہیں۔

    حسین شہید سہروردی کا خاندان علم و فنون کا شیدا اور تعلیم یافتہ گھرانوں میں شمار کیا جاتا تھا۔ حسین شہید سہروردی 1892 میں پیدا ہوئے۔

    ان کا گھرانا بنگال کے مدنا پور میں آباد تھا۔ ان کے والد کا نام زاہد سہروردی تھا جن کو بہت عزت اور احترام کی نظر سے دیکھا جاتا تھا۔ وہ کولکتہ، ہائی کورٹ کے جج تھے۔ عربی، فارسی، انگریزی اور اُردو پر عبور رکھتے تھے۔ والدہ کا نام خجستہ اختر بانو تھا جو ادب سے گہرا شغف رکھتی تھیں۔ کہا جاتا ہے کہ وہ اُردو زبان کے اوّلین ناول نگاروں میں سے ایک ہیں اور اس زمانے میں سینئر کیمبرج کا امتحان پاس کرنے والی پہلی مسلمان خاتون تھیں۔ حسین شہید سہروردی کے بڑے بھائی کا نام حسن شاہد سہروردی تھا اور یہ بھی علم و فنون کے شائق اور قابل شخص تھے۔

    اس ماحول کے پروردہ حسین شہید سہروردی نے تقسیم سے قبل سماجی حالات میں بہتری لانے کی کوششیں کیں اور سیاست میں حصّہ لینا شروع کیا تھا. پاکستان کی تحریکِ آزادی میں بھی ان کا اہم کردار رہا۔ 1956 سے 1957 تک پاکستان کے وزیراعظم رہنے والے حسین شہید سہروردی کو سیاسی اختلافات اور دباؤ بڑھنے پر یہ منصب چھوڑنا پڑا۔ اس دور میں‌ آئین تشکیل دینے کے حوالے سے بھی حسین شہید سہروردی کو یاد رکھا جائے گا. ان کا انتقال 1963 میں لبنان میں قیام کے دوران ہوا۔

  • حکومت آئین اور قانون کی بالادستی پر یقین رکھتی ہے، فردوس عاشق اعوان

    حکومت آئین اور قانون کی بالادستی پر یقین رکھتی ہے، فردوس عاشق اعوان

    اسلام آباد : معاون خصوصی برائے اطلاعات ونشریات فردوس عاشق اعوان کا کہنا ہے کہ وزیراعظم عمران خان نے کبھی بھی انتخابات میں ہارس ٹریڈنگ کی حمایت نہیں کی۔

    تفصیلات کے مطابق معاون خصوصی برائے اطلاعات ونشریات فردوس عاشق اعوان نے کہا کہ تحریک انصاف کی حکومت آئین اور قانون کی بالادستی پر یقین رکھتی ہے۔

    فردوس عاشق اعوان نے کہا کہ وزیراعظم عمران خان نے کبھی بھی انتخابات میں ہارس ٹریڈنگ کی حمایت نہیں کی اور سینیٹ کے چیئرمین کے خلاف عدم اعتماد کی تحریک کے دوران ایسے واقعے کی اطلاع نہیں۔

    معاون خصوصی برائے اطلاعات نے کہا کہ اپوزیشن کے پاس صادق سنجرانی کے خلاف عدم اعتماد کی تحریک لانے کی کوئی ٹھوس وجہ نہیں تھی۔

    فردوس عاشق اعوان نے کہا کہ وزیراعظم عمران خان صوبوں کو بااختیار بنانے کے خواہاں ہیں اور قومی مالیاتی کمیشن ایوارڈ کے بارے میں چاروں صوبوں کے درمیان پہلے ہی اتفاق رائے ہوچکا ہے۔

    لوگ ضمیر کی آواز پر موروثی غلامانہ سیاست مسترد کررہے ہیں، فردوس عاشق اعوان

    یاد رہے کہ گزشتہ روز معاون خصوصی برائے اطلاعات ونشریات فردوس عاشق اعوان کا کہنا تھا کہ 2013 میں ظل سبحانی نے جو دھاندلی کی تھی وہ راجکماری کیوں بھول گئیں؟۔

    معاون خصوصی برائے اطلاعات فروس عاشق اعوان کا کہنا تھا کہ ضمیرکی آواز پر لبیک کہنے والوں کے خلاف کس منہ سے بول رہے ہیں؟۔

  • نئے پاکستان میں اقلیتوں کے حقوق کو یقینی بنایا جائے گا، فردوس عاشق اعوان

    نئے پاکستان میں اقلیتوں کے حقوق کو یقینی بنایا جائے گا، فردوس عاشق اعوان

    اسلام آباد: معاون خصوصی برائے اطلاعات فردوس عاشق اعوان نے کہا کہ ملک کے آئین اور قانون میں اقلیتوں کو مساوی حقوق کی ضمانت فراہم کی گئی ہے۔

    تفصیلات کے مطابق معاون خصوصی برائے اطلاعات فردوس عاشق اعوان کا کہنا ہے کہ قومی پرچم کا سفید حصہ ملک میں موجود اقلیتوں کی عکاسی کرتا ہے۔

    انہوں نے کہا کہ ملک کے آئین اور قانون میں اقلیتوں کو مساوی حقوق کی ضمانت فراہم کی گئی ہے۔ نئے پاکستان میں اقلیتوں کے حقوق کو یقینی بنایا جائے گا۔

    فردوس عاشق اعوان نے کہا کہ آئندہ ماہ کی گیارہ تاریخ کو منائے جانے والے اقلیتوں کے دن کے موقع پر ملک کی ترقی وخوشحالی کے لیے ان کی خدمات کو یاد کیا جائے گا۔

    معاون خصوصی برائے اطلاعات نے سندھ کی صورت حال کا حوالہ دیتے ہوئے کہا کہ صوبائی حکومت مخالفین کے خلاف کارروائی کے منصوبے پر عمل پیرا ہے۔ انہوں نے کہا کہ حکومت سندھ کے یہ ہتھکنڈے جمہوریت کی نفی ہے۔

    فردوس عاشق اعوان نے جمعیت علمائے اسلام ف کے سربراہ پر تنقید کرتے ہوئے کہا کہ مولانا فضل الرحمن مدارس کے طلبا کو ڈھال کے طور پراستعمال کررہے ہیں۔

  • مصر کے آئین میں تبدیلی سے سیسی ’2030 تک اقتدار میں رہ سکتے ہیں

    مصر کے آئین میں تبدیلی سے سیسی ’2030 تک اقتدار میں رہ سکتے ہیں

    قاہرہ : مصر کی پارلیمان نے آئینی ترامیم منظور کی ہیں جن کے مطابق صدر عبدل فتع ال سیسی 2030 تک اقتدار میں رہ سکتے ہیں، مذکورہ ترامیم صدر سیسی کو عدلیہ پر مزید اختیارات دیں گی اور سیاست میں فوج کا کردار یقینی بنائیں گی۔

    تفصیلات کے مطابق 2022 میں اپنی دوسری چار سالہ مدت کے اختتام پر عہدہ صدارت سے سبکدوش ہونے والے صدر عبد الفتح السیسی نئی ترامیم کی منظوری کے بعد 2030 تک اقتدار سنبھال سکتے ہیں اور مذکورہ ترامیم کے باعث مدت اقتدار بھی چھ سال ہوجائے گی، انھیں ایک اور مدت کے لیے انتخابات میں کھڑے ہونے کی اجازت مل جائے گی۔

    غیر ملکی خبر رساں ادارے کا کہنا ہے کہ مصری حکومت کو پارلیمنٹ سے منظور ہونے والی ترامیم پر تیس روز کے اندر ریفرنڈم کرانا ہے۔

    غیر ملکی میڈیا کا کہنا تھا کہ نئی ترامیم صدر سیسی کو عدلیہ پر مزید اختیارات دیں گی اور سیاست میں فوج کا کردار بھی یقینی بنائیں گی، 2013 میں صدر سیسی نے مصر کے پہلے منتخب کردہ جمہوری صدر محمد مُرسی کے اقتدار کے خلاف جاری احتجاج کے پیشِ نظر فوج کی قیادت میں اقتدار حاصل کیا تھا۔

    انسانی حقوق کی تنظیموں کے مطابق ان کی نگرانی میں مخالف آوازوں کو دبانے کی بے مثال کوششیں کی گئی ہیں جس کے نتیجے میں ہزاروں افراد جیلوں میں قید ہیں۔

    غیر ملکی میڈیا کا کہنا ہے کہ عبد الفتح السیسی 2014 میں پہلی بار صدر منتخب ہوئے اور گذشتہ سال 97 فیصد ووٹ حاصل کرنے کے بعد انھیں دوبارہ صدر منتخب کیا گیا تھا۔

    برطانوی خبر رساں ادارے کا کہنا ہے کہ انھیں کسی سخت مقابلے کا سامنا نہیں کرنا پڑا کیونکہ ان کے اکثر ممکنہ حریفوں نے انتخابات میں حصہ نہیں لیا یا ان کو گرفتار کر لیا گیا۔

    پارلیمان میں بھی صدر سیسی کے حمایتیوں کا غلبہ ہے اور حزبِ اختلاف کی جماعتیں یہ کہہ کر اسے تنقید کا نشانہ بناتی ہیں کہ یہ ان کے اقدامات کی رسمی منظوری کا ہی کام کرتی ہے۔

    قانون ساز محمد حمید، جنھوں نے آئینی ترامیم کے لیے مہم چلائی، نے بتایا کہ سیسی ایسے صدر تھے جنھوں نے اہم سیاسی، اقتصادی اور حفاظتی اقدامات لیے اور لیبیا اور سوڈان جیسے ہمسائیہ ممالک میں جاری بدامنی کے پیشِ نظر انھیں اصلاحات کی اجازت دینی پڑی۔

    ان کا کہنا تھا کہ لیبرل ’ال دستور‘ پارٹی کے خالد داود نے اسے مضحکہ خیز کہہ کر مسترد کر دیا اور بتایا کہ یہ اصلاحات صدر سیسی کی جانب سے اقتدار پر قبضے کی کوشش کو ظاہر کرتی ہیں۔

  • پاکستان کا آئین اقلیتوں کو مکمل تحفظ فراہم کرتا ہے، پاکستانی سفیر اسد مجید

    پاکستان کا آئین اقلیتوں کو مکمل تحفظ فراہم کرتا ہے، پاکستانی سفیر اسد مجید

    واشنگٹن : امریکا میں تعینات پاکستانی سفیر کا عیسائی برادری کے مذہبی تہوار ایسٹر کی تقریب سے خطاب کرتے ہوئے کہنا تھا کہ پاکستان کا آئین اقلیتوں کو مکمل تحفظ فراہم کرتا ہے۔

    تفصیلات کے مطابق مسیحی برادری دنیا بھر میں اپنا مذہبی تہوار ایسٹر عقیدت و احترام منارہی ہے اس موقع پر امریکی دارالحکومت واشنگٹن میں واقع پاکستانی سفارت خانے میں ایسٹر کی تقریب منعقد ہوئی جس میں عیسائی و دیگر مذاہب کے افراد نے بھرپور شرکت کی۔

    ایسٹر کی تقریب سے خطاب کرتے ہوئے امریکا میں تعینات پاکستانی سفیر اسد مجید نے کہا کہ پاکستان تمام اقلیتوں کی بھرپور نمائندگی کرتا ہے، کرتارپور راہداری پاکستان کی جانب سے امن و محبت کا پیغام ہے، سکھ کمیونٹی کی شدید خواہش تھی کہ کرتارپور راہداری کھلے۔

    اسد مجید کا کہنا تھا کہ پاکستان میں سیکورٹی صورتحال انتہائی بہتر ہوچکی ہے، پاکستان سیاحت کے لئے بہترین ملک ہے، پاکستان نے اپنی ویزا پالیسی مکمل طور پر تبدیل کی ہے۔

    پاکستانی سفیر نے کہا کہ ملک میں مذہبی سیاحت کو بھی فروغ دے رہے ہیں، پاکستان تمام پڑوسی ممالک سے بہترین تعلقات چاہتا ہے، بھارت کے ساتھ امن اور افغانستان کو مستحکم دیکھنا چاہتے ہیں۔

    مزید پڑھیں : مسیحی  برادری ایسٹر کا تہوار کب مناتی ہے

    خیال رہے کہ مسیحی تہوار وں میں مرکزی اہمیت رکھنے والا تہوار ایسٹر 22 مارچ سے 25 اپریل کے درمیان ہر سال الگ الگ تاریخوں پر منایا جا تا ہے‘ 21 مارچ کے بعد آنے والے پہلے اتوار کے بعد آنے والے اتوار کو ایسٹر منایا جاتا ہے۔

    اس موقع پر عالمِ عیسائیت کی اہم ترین مذہبی تقریبات مشرق وسطیٰ میں یروشلم اورکیتھولک عیسائی عقیدے کے مرکز ویٹی کن میں منعقد ہوتی ہیں‘ کیتھلوک عیسائیوں کے مذہبی پیشوا پاپائے روم خصوصی دعا کرواتے ہیں۔