ARYNews.tv | Urdu – Har Lamha Bakhabar

Tag: آئی ایس پی آر

  • بلوچستان، فورسز کی گاڑی بارودی سرنگ سے ٹکرا گئی، افسر اور 5 سپاہی شہید

    بلوچستان، فورسز کی گاڑی بارودی سرنگ سے ٹکرا گئی، افسر اور 5 سپاہی شہید

    کوئٹہ: بلوچستان کے ضلع کیچ میں فورسز کی گاڑی دیسی ساختہ بارودی سرنگ سے ٹکرا گئی جس کے نتیجے میں افسر اور 5 سپاہی شہید ہوگئے۔

    پاک فوج کے شعبہ تعلقات عامہ (آئی ایس پی آر) کے مطابق بلوچستان کے ضلع کیچ کے علاقے بلیدہ میں فورسز کی گاڑی دیسی ساختہ بارودی سرنگ سے ٹکرا گئی جس کے نتیجے میں میجر ندیم اور 5 سپاہی شہید ہوگئے۔

    ڈی جی آئی ایس پی آر میجر جنرل بابر افتخار کے مطابق دیسی ساختہ بارودی مواد سے فورسز کی گاڑی کو ہدف بنایا گیا۔

    آئی ایس پی آر کے مطابق شہدا میں میجر ندیم عباس بھٹی، نائیک جمشید، لانس نائیک تیمور، لانس نائیک خضر حیات، سپاہی ساجد اور سپاہی ندیم شامل ہیں۔

    واضح رہے کہ گزشتہ سال دسمبر میں پاک افغان سرحد کے قریب بارودی سرنگ پھٹنے سے ایک فوجی جوان شہید اور 4 زخمی ہوگئے تھے۔

    آئی ایس پی آر کا کہنا تھا کہ دھماکے میں شہید ہونے والے فوجی جوان کی شناخت لانس نائیک تقدیر علی کے نام سے ہوئی ہے۔

    آئی ایس پی آر کا کہنا تھا کہ پاک افغان سرحد پر باڑ لگانے کے دوران فوجی جوان بارودی سرنگ کی زد میں آئے۔

    یاد رہے کہ گزشتہ سال ستمبر میں بھی پاک افغان سرحد پر بارودی سرنگ کے دھماکے میں پاک فوج کے افسر میجر عدیل شاہد اور سپاہی فراز حسین شہید ہوگئے تھے۔

  • بھارتی فوج کی ایل او سی پر بلااشتعال فائرنگ، 6 شہری زخمی

    بھارتی فوج کی ایل او سی پر بلااشتعال فائرنگ، 6 شہری زخمی

    راولپنڈی: بھارتی فوج نے ایک بار پھر لائن آف کنٹرول کی خلاف ورزی کرتے ہوئے آزاد کشمیر میں رکھ چکری اور نیزہ پیر سیکٹر پر بلااشتعال فائرنگ کی جس کے نتیجے میں 6 شہری زخمی ہوگئے۔

    پاک فوج کے شعبہ تعلقات عامہ (آئی ایس پی آر) کے مطابق بھارتی فوج نے جان بوجھ کر ایل او سی پر  شہری آبادی کو نشانہ بنایا، بھارتی فوج نے مارٹر، آرٹلری اور خود کار ہتھیاروں کا استعمال کیا، فائرنگ سے میندر، کرنی، ڈگوار گاؤں کے 6 شہری زخمی ہوئے۔

    آئی ایس پی آر کے مطابق زخمیوں میں تین بچیاں اور ایک خاتون بھی شامل ہیں، زخمیوں کو طبی امداد کے لیے قریبی اسپتالوں میں منتقل کردیا گیا ہے۔

    واضح رہے کہ 30 اپریل کو بھی بھارتی فوج نے کیلر اور رکھ چکری سیکٹرز پر بلا اشتعال فائرنگ کی تھی جس کے نتیجے میں لانس نائیک سمیت خاتون اور بچی شہید ہوگئی تھیں، پاک فوج کی جوابی کارروائی میں بھارتی فوج کا بھاری جانی نقصان ہوا تھا۔

    یاد رہے کہ اس سے قبل بھی بھارتی فوج کی شہری آبادی پر فائرنگ سے 16 سالہ لڑکی اور 52 سالہ خاتون شہید جبکہ 10سالہ بچہ اور 55 سالہ خاتون زخمی ہوئی تھیں۔

    لائن آف کنٹرول پر سیز فائر کی مسلسل خلاف ورزی پر پاکستان نے سینئربھارتی سفارت کار کو دفترخارجہ طلب کرکے شدید احتجاج ریکارڈ کرایا تھا۔

  • پاک فوج 3 لاکھ 50 ہزار امدادی پیکجز کی تقسیم میں مصروف ہے: آئی ایس پی آر

    پاک فوج 3 لاکھ 50 ہزار امدادی پیکجز کی تقسیم میں مصروف ہے: آئی ایس پی آر

    راولپنڈی: پاک فوج کے شعبہ تعلقات عامہ کے ادارے آئی ایس پی آر نے کہا ہے کہ پاک فوج 3 لاکھ 50 ہزار امدادی پیکجز کی تقسیم میں مصروف عمل ہے۔

    آئی ایس پی آر کے مطابق کرونا کی وبا کی روک تھام کے لیے پاک فوج شہری انتظامیہ کی معاونت کر رہی ہے، پاک فوج ساڑھے 3 لاکھ امدادی پیکجز کی تقسیم میں مصروف ہے۔

    آئی ایس پی آر کے اعلامیے میں کہا گیا ہے کہ یہ پیکجز کرونا متاثرین کے لیے پاک فوج کی تنخواہوں کے عطیات سے خریدے گئے، اور یہ ضرورت مندوں میں تقسیم کیے جا رہے ہیں، پاک فوج کے جوان ریلیف کے کاموں میں مصروف ہیں۔

    بتایا گیا کہ یہ پیکجز معذوروں، مزدوروں اور دیگر ضرورت مندوں میں تقسیم کیے جا رہے ہیں، چاروں صوبوں، آزاد کشمیر اور گلگت بلتستان میں پیکجز کی تقسیم جاری ہے۔

    خیال رہے کہ ملک بھر میں کرونا وائرس کے پھیلاؤ کو روکنے کے لیے لاک ڈاؤن لگایا گیا ہے، جس کی وجہ سے معیشت پر بھی برے اثرات پڑ رہے ہیں اور عام آدمی کی روزانہ اور ماہانہ آمدن بھی رک گئی ہے، جس سے وہ اشیائے ضروریہ کے لیے بھی محتاج ہو گئے ہیں۔

    واضح رہے کہ ملک میں کرونا کے کیسز کی تعداد تیزی سے بڑھ رہی ہے، مجموعی کیسز 14 ہزار 885 ہو گئے ہیں، جب کہ گزشتہ چوبیس گھنٹوں میں وائرس سے 26 اموات کے بعد مجموعی اموات 327 ہو گئی ہیں۔ پاکستان میں کرونا کے 11 ہزار 133 مریض زیر علاج ہیں جب کہ ملک میں 24 گھنٹوں کے دوران 806 کیسز رپورٹ ہوئے، 3 ہزار 425 مریض صحت یاب بھی ہو چکے ہیں۔

  • چین سے امدادی سامان کی دوسری کھیپ پاکستان پہنچ گئی، آئی ایس پی آر

    چین سے امدادی سامان کی دوسری کھیپ پاکستان پہنچ گئی، آئی ایس پی آر

    راولپنڈی: چین سے میڈیکل ایمرجنسی ریلیف کی دوسری کھیپ پاکستان پہنچ گئی۔

    پاک فوج کے شعبہ تعلقات عامہ (آئی ایس پی آر) کے مطابق چین سے میڈیکل ایمرجنسی ریلیف کی دوسری کھیپ پاکستان پہنچ گئی، جس میں ٹیسٹنگ کٹس، سرجیکل ماسک، این 95 ماسک شامل ہیں۔

    آئی ایس پی آر کے مطابق دوسری کھیپ میں وینٹی لیٹرز اور حفاظتی سوٹ بھی شامل ہیں۔

    آئی ایس پی آر کا کہنا ہے کہ چینی میڈیکل ٹیم کی قیادت میجر جنرل ہوآنگ کررہے ہیں، میڈیکل ٹیم ماہر ڈاکٹرز اور نرسنگ ماہرین پر مشتمل ہے، چینی میڈیکل ٹیم پاکستان میں دو ماہ قیام کرے گی۔

    واضح رہے کہ گزشتہ روز بھی قومی ایئرلائن پی آئی اے کا خصوصی کارگو طیارہ اور پاک فضائیہ کا خصوصی طیارہ چین سے امدادی سامان لے کر پاکستان پہنچا تھا۔

    این ڈی ایم اے کے ترجمان کا کہنا تھا کہ چین سےخریدےگئےطبی سامان کی ایک اورکھیپ پاکستان پہنچ گئی، پاک فضائیہ کاخصوصی طیارہ آئی ایل76سامان لیکراسلام آبادپہنچا، سامان میں20بائیوسیفٹی کیبینٹ،50ہزاروی ٹی ایم کٹس شامل ہیں۔

    ترجمان کا کہنا تھا کہ 116 نیوکلیائی ایسڈایکسٹرکشن کٹس،91بائیوٹیسٹنگ کٹس، 50ہزار کے این95ماسک شامل ہیں ، چند روز میں صوبوں، آزاد کشمیر،جی بی کو مزید حفاظتی کٹس، ٹیسٹنگ کٹس دیں گے۔

    یاد رہے تین روز قبل چین کی پرواز طبی سامان لے کر اسلام آباد ایئرپورٹ پہنچی تھی، طبی سامان میں ماسک، گلوز، سینیٹائزر، ٹیسٹنگ کٹس اور حفاظتی کٹس شامل تھیں۔

  • بھارت کا ایل او سی پر اشتعال انگیزیوں اور خلاف ورزیوں کا دعویٰ بےبنیاد ہے، آئی ایس پی آر

    بھارت کا ایل او سی پر اشتعال انگیزیوں اور خلاف ورزیوں کا دعویٰ بےبنیاد ہے، آئی ایس پی آر

    راولپنڈی: ڈی جی آئی ایس پی آر میجرجنرل بابر افتخار کا کہنا ہے کہ بھارت کا ایل او سی پر اشتعال انگیزیوں اور خلاف ورزیوں کا دعویٰ بےبنیاد ہے، بھارتی الزام تراشی مسائل سے عالمی توجہ ہٹانے کی کوشش ہے۔

    تفصیلات کے مطابق سماجی رابطے کی ویب سائٹ ٹویٹر پر اپنے پیغام میں ڈی جی آئی ایس پی آر نے بھارتی الزام تراشیاں مسترد کرتے ہوئے بھارتی15 کور کا بی بی سی کو انٹرویو حقائق کے منافی قرار دے دیا۔

    میجر جنرل بابر افتخار نے کہا کہ بھارتی الزام تراشی مقامی مسائل سے توجہ ہٹانے کی کوشش ہے، بھارت5 اگست کے غیر آئینی فیصلے اور صورتحال سے توجہ ہٹانا چاہتا ہے، بھارت کا سیزفائر کی خلاف ورزیوں اور دراندازی کا الزام مضحکہ خیز ہے۔

    ڈی جی آئی ایس پی آر کے مطابق پاکستان نے اقوام متحدہ کے مبصرگروپ کو کسی جگہ بھی جانےکی آزادی دے رکھی ہے، شفاف امور کار کے لیےعالمی مبصر کہیں جا کر بھی جائزہ لے سکتا ہے۔

    انہوں نے اپنے پیغام میں کہا کہ بھارتی قیادت کرونا وبا سے نمٹنے کی کوشش کرے،بھارتی قیادت پہلے ہی کرونا وبا سے متعلق غلط فیصلے کرچکی ہے۔

    میجر جنرل بابر افتخار کا کہنا تھا کہ پاکستان پر افراد مقبوضہ کشمیر میں داخل کرنے کا الزام بےبنیاد ہے، بھارتی حکومت مقبوضہ کشمیر میں بھی حالات بہتر کرنے پر توجہ دے،۔

  • ایل او سی پر فضائی حدود کی خلاف ورزی، پاک فوج نے بھارتی ڈرون مار گرایا

    ایل او سی پر فضائی حدود کی خلاف ورزی، پاک فوج نے بھارتی ڈرون مار گرایا

    راولپنڈی: آئی ایس پی آر نے کہا ہے کہ پاک فوج نے ایل او سی پر ایک بھارتی ڈرون کو مار گرایا ہے۔

    تفصیلات کے مطابق پاک فوج کے شعبہ تعلقات عامہ نے کہا ہے کہ بھارتی ڈرون نے ایک بار پھر لائن آف کنٹرول کے سنکھ سیکٹر پر فضائی حدود کی خلاف ورزی کی ہے۔

    آئی ایس پی آر نے کہا کہ بھارتی کواڈ کاپٹر پاکستانی علاقے کی نگرانی کے لیے بھیجا گیا تھا، جسے پاک فوج نے مار گرا دیا ہے۔ پاک فوج کے ادارے نے کہا کہ یہ بھارتی اقدام 2003 کے جنگ بندی معاہدے کی کھلی خلاف ورزی ہے۔

    خیال رہے کہ بھارتی فوج اس نوعیت کی خلاف ورزیاں متعدد بار کر چکی ہے، آئی ایس پی آر نے کہا کہ بھارتی کواڈ کاپٹر نے ایک بار پھر سنکھ سیکٹر پر ایل او سی کی خلاف ورزی کی اور پاکستانی حدود میں نگرانی کے لیے گھس آیا، جسے پاک فوج نے مار گرا دیا۔

    پاک فوج نے حدود کی خلاف ورزی پر بھارتی ڈرون مار گرایا

    یاد رہے کہ گزشتہ برس 16 مارچ کو بھی پاک فوج نے ایک بھارتی ڈرون مار گرایا تھا، آئی ایس پی آر کا کہنا تھا کہ بھارتی کواڈ کاپٹر رکھ چکری سیکٹر پر پاکستانی حدود میں 150 میٹر تک اندر آ گیا تھا۔

    اس سے قبل بھی 27 اکتوبر 2018 کو بھی پاک فوج نے ایل او سی کے علاقے رکھ چکر ی سیکٹر میں بھارتی ڈرون طیارہ مار گرایا تھا، پاک فوج کے نشانہ بازوں نے کام یابی سے ڈرون طیارے کو نشانہ بنانے کے بعد اس بھارتی کواڈ کاپٹر کے ملبے کو قبضے میں لے لیا تھا۔

  • سیکیورٹی فورسز کا شمالی وزیرستان اور مہمند میں آپریشن، 7 دہشت گرد مارے گئے

    سیکیورٹی فورسز کا شمالی وزیرستان اور مہمند میں آپریشن، 7 دہشت گرد مارے گئے

    راولپنڈی: سیکیورٹی فورسز کی جانب سے شمالی وزیرستان اور مہمند میں انٹیلی جنس بیسڈ آپریشن کے دوران 7 دہشت گرد مارے گئے۔

    پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے شمالی وزیرستان اور مہمند میں انٹیلی جنس بیسڈ آپریشن کیا جس کے نتیجے میں 7 دہشت گرد مارے گئے۔

    آئی ایس پی آر کے مطابق کارروائی شمالی وزیرستان کے عدل خیل گاؤں میں کی گئی، دہشت گرد علاقے سے فرار ہوتے ہوئے مارے گئے، دہشت گردوں سے اسلحہ، مواصلاتی آلات برآمد کرلیے گئے۔

    آئی ایس پی آر کا کہنا ہے کہ مہمند میں آپریشن کے دوران 3 دہشت گرد مارے گئے، دہشت گردوں سے بھارتی ادویات، لٹریچر اور دیگر سامان برآمد ہوا ہے۔

    مزید پڑھیں: ڈی آئی خان: سیکیورٹی فورسز کا آپریشن ،کرنل مجیب الرحمان شہید، 2 دہشت گرد ہلاک

    واضح رہے کہ 9 مارچ کو سیکیورٹی فورسز کی جانب سے خفیہ اطلاعات پر ٹانک کے قریب کارروائی میں 2 انتہائی مطلوب دہشت گرد مارے گئے تھے جبکہ کرنل مجیب الرحمان شہید ہوگئے تھے۔

    یاد رہے رواں سال جنوری میں سیکیورٹی فورسز کی شمالی وزیرستان میں کارروائی کے دوران 5 دہشت گرد ہلاک ہوئے جبکہ 2جوان شہید ہوگئے تھے، شہید ہونے والوں میں سپاہی محمد شمیم اور سپاہی اسد خان شامل تھے۔

  • کرونا وائرس: آرمی چیف کی تمام کمانڈرز کو ضروری اقدامات کرنے کی ہدایت

    کرونا وائرس: آرمی چیف کی تمام کمانڈرز کو ضروری اقدامات کرنے کی ہدایت

    راولپنڈی: آرمی چیف جنرل قمر جاوید باجوہ نے ملک میں کرونا وائرس کی صورت حال کے پیش نظر تمام کمانڈرز کو ضروری اقدامات کرنے کی ہدایت کر دی ہے۔

    آئی ایس پی آر کے مطابق آرمی چیف جنرل قمر جاوید باجوہ نے تمام کمانڈرز کو ضروری اقدامات کرنے کی ہدایت کی ہے، آرمی چیف نے کہا ہے کہ سول انتظامیہ سے کرونا وائرس کے سلسلے میں تعاون کے لیے فوری اقدامات کیے جائیں۔

    آرمی چیف کا کہنا ہے کہ مسلح افواج صورت حال سے نمٹنے کے لیے وفاق اور صوبائی انتظامیہ سے رابطے میں ہے۔

    پاک فوج کے شعبہ تعلقات عامہ کے مطابق کرونا وائرس کے پیش نظر مسلح افواج کی تمام میڈیکل سہولتیں متحرک ہیں، کرونا کی وبا پر قابو پانے کے لیے مسلح افواج کے تمام طبی مراکز بھی تیار ہیں، تمام بڑے فوجی اسپتالوں میں کرونا وائرس ٹیسٹ کے لیے لیبز قائم کر دی گئیں، اے ایف آئی پی راولپنڈی میں بھی سینٹرل ٹیسٹنگ لیب قائم کی گئی ہے۔

    کرونا وائرس: آرمی چیف نے اہم ہدایات جاری کر دیں

    خیال رہے کہ پاکستان میں کرونا وائرس کے مریضوں کی تعداد میں اضافہ ہو گیا ہے، پنجاب میں کرونا وائرس کے 6 کیسز کی تصدیق ہو گئی ہے، وزیر صحت پنجاب کا کہنا ہے کہ ڈی جی خان میں 736 زائرین قرنطینہ میں موجود ہیں، وزارت صحت پنجاب کی جانب سے شہریوں سے گھروں پر رہنے کی اپیل کر دی گئی۔ سندھ میں کرونا وائرس کے مریضوں کی تعداد 155 ہو گئی۔

  • آرمی چیف سے مصر کے وزیردفاع کی ملاقات، اہم امور پر تبادلہ خیال

    آرمی چیف سے مصر کے وزیردفاع کی ملاقات، اہم امور پر تبادلہ خیال

    راولپنڈی: پاک فوج کے شعبہ تعلقات عامہ( آئی ایس پی آر) نے کہا ہے کہ آرمی چیف جنرل قمر جاوید باجوہ سے مصر کے وزیردفاع جنرل محمد احمد ذکی نے ملاقات کی، اس دوران اہم امور پر تبادلہ خیال کیا گیا۔

    اے آر وائی نیوز کے مطابق آئی ایس پی آر کا کہنا ہے کہ جنرل قمرجاوید باجوہ اور جنرل محمد احمد ذکی کے درمیان ہونے والی ملاقات میں باہمی دلچسپی اور دفاعی تعاون پر بھی بات چیت ہوئی۔

    پاک فوج نے بتایا کہ ملاقات میں سیکیورٹی کے فروغ پر تبادلہ خیال ہوا جبکہ مصری وزیردفاع نے پاک فوج کی کامیابیوں کی تعریف بھی کی۔

    خیال رہے کہ گزشتہ روز آرمی چیف جنرل قمر جاوید باجوہ سے یورپی یونین کے وفد نے ملاقات کی تھی، اس دوران کشمیر صورت حال سمیت اہم امور پر تبادلہ خیال کیا گیا تھا۔

    آرمی چیف سے یورپی یونین کے وفد کی ملاقات، اہم امور پر تبادلہ خیال

    یاد رہے کہ 17 فروری کو آرمی چیف جنرل قمر جاوید باجوہ سے امریکی نمائندہ خصوصی زلمے خلیل زاد نے ملاقات کی تھی جس میں باہمی دلچسپی کے امور پر تبادلہ خیال کیا گیا تھا۔

  • ’بھارتی چوکی تباہ کرنے پر پاک فوج کو خراج تحسین پیش کرتے ہیں‘

    ’بھارتی چوکی تباہ کرنے پر پاک فوج کو خراج تحسین پیش کرتے ہیں‘

    مظفرآباد: وزیراعظم آزاد کشمیر فاروق حیدر نے ایل اوسی پر بھارتی افواج کی فائرنگ کی شدید مذمت کرتے ہوئے کہا کہ کشمیری بھارت کی بزدلانہ حرکتوں سے ڈرنے والے نہیں ہیں۔

    اے آر وائی نیوز کے مطابق راجہ فاروق حیدر نے بھارتی فائرنگ سے شہید ہونے والے شہری کو خراج عقیدت بھی پیش کیا۔ ان کا کہنا تھا کہ بھارتی فوج کی نہتے شہریوں پر فائرنگ کی شدید مذمت کرتے ہیں۔

    بھارتی فوج کی ایل او سی پر بلا اشتعال فائرنگ سے شہری شہید

    وزیراعظم آزاد کشمیر کا کہنا تھا کہ کشمیری بھارت کی بزدلانہ حرکتوں سے ڈرنے والے نہیں ہیں، بھارتی چوکی تباہ کرنے پر پاک فوج کو خراج تحسین پیش کرتے ہیں۔

    خیال رہے کہ پاک فوج کے شعبہ تعلقات عامہ کے مطابق بھارتی فوج کی جانب سے ایل او سی کی خلاف ورزی کی گئی، چری کوٹ سیکٹر پر بلااشتعال فائرنگ کے نتیجے میں شہری میر محمد شہید اور خاتون زخمی ہوگئی۔

    آئی ایس پی آر کے مطابق بھارتی فوج نے شہری آبادی پرآرٹلری اور مارٹر گولے داغے،بھارتی فوج کی بلااشتعال فائرنگ سے زخمی ہونے والی خاتون کو قریبی طبی مرکز منتقل کر دیا گیا۔