ARYNews.tv | Urdu – Har Lamha Bakhabar

Tag: آئی ایس پی آر

  • یوم کشمیر: پاک فوج نے خصوصی نغمہ جاری کردیا

    یوم کشمیر: پاک فوج نے خصوصی نغمہ جاری کردیا

    راولپنڈی: پاک فوج کے شعبہ تعلقات عامہ(آئی ایس پی آر) نے کشمیر ڈے کے موقع پر کشمیریوں سے اظہار یکجہتی کے لیے خصوصی ملی نغمہ جاری کردیا۔

    اے آر وائی نیوز کے مطابق آج دنیا بھر میں کشمیر ڈے منایا جارہا ہے، بھارتی فوج کی بربریت تلے زندگی گزارنے والے مظلوموں سے اظہار یکجہتی کے لیے پاکستان سمیت دیگر ممالک میں ریلیاں نکالی جائیں گی اور احتجاجی مظاہرہ بھی کیا جائے گا۔ مقبوضہ وادی میں کشمیر بنے گا پاکستان کے نعرے آج بھی گونج رہے ہیں۔

    کشمیر کی آواز بنتے ہوئے آئی ایس پی آر نے یوم یکجہتی کشمیر پر خصوصی ملی نغمہ جاری کردیا۔

    نغمے کے بول کچھ یوں ہیں

    ’’ ہے جاگ اٹھی وادی ساری۔۔۔کر فکر ذرا اپنے تو انجام کی‘‘

    ’’منزل میری آزادی ہے ۔۔۔ پرواہ نہیں چاہے جاتی ہے جان بھی‘‘

    ’’کشمیر ہوں میں، کشمیر ہوں میں ۔۔۔شہ رگ پاکستان کی‘‘

  • پاکستان نے غزنوی بیلسٹک میزائل کا کامیاب تجربہ کر لیا

    پاکستان نے غزنوی بیلسٹک میزائل کا کامیاب تجربہ کر لیا

    راولپنڈی: پاکستان نے مختلف نوعیت کے وار ہیڈ لے جانے کی صلاحیت کے حامل غزنوی بیلسٹک میزائل کا کامیاب تجربہ کر لیا۔

    آئی ایس پی آر کے مطابق پاکستان نے غزنوی بیلسٹک میزائل کا کامیاب تجربہ کر لیا ہے، یہ میزائل 290 کلو میٹر تک زمین سے زمین تک ہدف کو نشانہ بنا سکتا ہے، غزنوی بیلسٹک میزائل مختلف نوعیت کے وار ہیڈ لے جانے کی صلاحیت رکھتا ہے۔

    آئی ایس پی آر کا کہنا ہے کہ اس میزائل تجربے کا مقصد دن اور رات کے وقت آپریشنل تیاریوں کو جانچنا تھا، ڈی جی ایس پی ڈی لیفٹیننٹ جنرل ندیم ذکی منج نے تجربے کا مشاہدہ کیا، میزائل کے تجربے کے موقع پر چیئرمین نیسکام اور دیگر اعلیٰ عسکری حکام بھی موجود تھے۔

    صدر ڈاکٹر عارف علوی اور وزیر اعظم عمران خان نے کامیاب تجربے پر انجینئرز اور سائنس دانوں کو مبارک باد دی، چیئرمین جوائنٹ چیفس آف اسٹاف کمیٹی اور تینوں افواج کے سربراہان نے بھی ٹیم کو مبارک باد دی۔

    نئے غزنوی بیلسٹک میزائل کے تجربے کے بعد پاکستان کا دفاع اور بھی مضبوط ہو گیا ہے۔ یاد رہے کہ پاکستان نے زمین سے زمین تک مار کرنے والے بیلسٹک میزائل غزنوی کا اس سے قبل کامیاب تجربہ 29 اگست 2019 کو کیا تھا۔ اس سے قبل زمین سے زمین تک مار کرنے والے میزائل شاہین ٹو کا کامیاب تجربہ کیا گیا تھا، شاہین ٹو بیلسٹک میزائل 1500 کلو میٹر تک ہدف کامیابی سے نشانہ بنا سکتا ہے۔

  • برفباری کی تباہ کاریاں، پاک فوج کی امدادی سرگرمیاں جاری

    برفباری کی تباہ کاریاں، پاک فوج کی امدادی سرگرمیاں جاری

    راولپنڈی: پاک فوج کے شعبہ تعلقات عامہ(آئی ایس پی آر) کا کہنا ہے کہ وادی نیلم، گلگت اور بلوچستان میں شدید بارش وبرفباری سے متاثرہ علاقوں میں امدادی سرگرمیاں جارہی ہیں۔

    تفصیلات کے مطابق آئی آیس پی آر نے کہا ہے کہ متاثرہ علاقوں میں ریسکیو اور لوگوں کو ریلیف فراہم کیا جارہا ہے۔ آرمی ہیلی کاپٹر کے ذریعے امدادی سامان متاثرین تک پہنچ رہے ہیں۔

    متاثرین کو خیمے کمبل، راشن، ادویات اور تیار کھانا فراہم کیا گیا، فوجی جوانوں ایف ڈبلیو او اور سول انتظامیہ مشترکہ اقدامات کر رہی ہے۔ قراقرم ہائی وے، جگلوٹ اور اسکردو شاہراہ مختلف مقامات سے کھول دی گئی۔

    شدیدی برفباری اور برفانی تودہ گرنے سے ہلاکتیں، آرمی چیف کا جانی نقصان پر گہرے رنج وغم کا اظہار

    خیال رہے آزادکشمیر اور بلوچستان میں برفباری نے تباہی مچادی ہے، دو روز کے دوران آزاد کشمیر، گلگت بلتستان اور بلوچستان میں جاں بحق ہونے والوں کی تعداد 100 ہوگئی ہے ، برف باری سے متاثرہ علاقوں میں آپریشن جاری ہے اور پاک فوج کی ٹیمیں بھی امدادی کاموں میں مصروف ہیں۔

    وادی نیلم میں برفانی تودہ گرنے سے62 ہلاکتیں ہوئی جبکہ 56مکان تباہ ہوگئے، ترجمان صوبائی حکومت کا کہنا ہے کہ متاثرین کو کمبل، خوراک پہنچادی گئی، اسپتالوں اور اسکولوں میں عارضی شیلٹر فراہم کردیا گیا ہے۔

  • جرمن وزیر کا دورہ جی ایچ کیو، آرمی چیف سے خصوصی ملاقات

    جرمن وزیر کا دورہ جی ایچ کیو، آرمی چیف سے خصوصی ملاقات

    راولپنڈی: پاک فوج کے شعبہ تعلقات عامہ(آئی ایس پی آر) کا کہنا ہے کہ جرمنی کے فارن آفس کے وزیرمملکت مسٹرنیلز نے جی ایچ کیو کا دورہ کیا اور آرمی چیف جنرل قمرجاوید باجوہ سے ملاقات کی۔

    تفصیلات کے مطابق آرمی چیف جنرل قمر جاوید باجوہ سے جرمن وزیر مملکت نے ملاقات کی، اس دوران باہمی دلچسپی اور علاقائی سیکیورٹی پر تبادلہ خیال کیا گیا۔

    آئی ایس پی آر کا کہنا ہے کہ اس ملاقات کے دوران مختلف شعبوں میں باہمی تعاون کو بڑھانے پر بھی بات چیت کی گئی۔ دریں اثنا جرمن وزیرمملکت نے خطے میں امن واستحکام کے لیے پاکستان کے کردار کی تعریف کی۔

    خیال رہے کہ گزشتہ سال نومبر میں آرمی چیف جنرل قمرجاویدبا جوہ سے نیٹو کے ڈی جی لیفٹیننٹ جنرل ہانس ورنر نے ملاقات کی تھی اس دوران باہمی دلچسپی اور علاقائی سیکیورٹی صورت حال پر گفتگو ہوئی۔

    پاک فوج کا کہنا تھا کہ نیٹو کے ڈی جی نے خطے میں امن کے لیے پاک فوج کے کردار کی تعریف کی، اور پاکستان کی عسکری طاقت کو بھی سراہا، ملاقات میں باہمی دلچسپی کے امور پر اہم گفتگو ہوئی۔

  • مسلح افواج ہر بھارتی جارحیت کا جواب دینےکے لیے تیار ہیں،آئی ایس پی آر

    مسلح افواج ہر بھارتی جارحیت کا جواب دینےکے لیے تیار ہیں،آئی ایس پی آر

    راولپنڈی: پاک فوج کے ترجمان میجر جنرل آصف غفور کا کہنا ہے کہ مسلح افواج ہر بھارتی جارحیت کا جواب دینےکے لیے تیار ہیں۔

    تفصیلات کے مطابق ڈی جی آئی ایس پی آر میجر جنرل آصف غفور نے بھارتی آرمی چیف کے بیان پر ردعمل دیتے ہوئے کہا کہ ایل او سی پر جارحیت سے متعلق بھارتی آرمی چیف کا بیان معمول کی ہرزہ سرائی ہے۔

    میجر جنرل آصف غفور نے کہا کہ بھارتی آرمی چیف اپنے لوگوں کو خوش کرنے کے لیے بیانات دے رہے ہیں، بھارتی آرمی چیف کے بیانات داخلی حالات کو سنبھالا دینے کی کوشش ہیں۔

    ڈی جی آئی ایس پی آر نے اپنے بیان میں مزید کہا کہ مسلح افواج ہر بھارتی جارحیت کا جواب دینےکے لیے تیار ہیں۔

    یاد رہے کہ گزشتہ ہفتے ڈی جی آئی ایس پی آر کا کہنا تھا کہ منوج نروانے آرمی چیف کے عہدے پر نئے ہیں اور اپنی جگہ بنانے کی کوششوں میں مصروف ہیں لیکن وہ بھارتی فوج میں نئے نہیں آئے۔

    میجر جنرل آصف غفور کا کہنا تھا کہ بھارتی آرمی چیف کو خطے کے حالات اور پاکستان کی افواج کی قابلیت کا بخوبی علم ہے۔

  • آرمی چیف کا کراچی کور کی فارمیشنز کا دورہ

    آرمی چیف کا کراچی کور کی فارمیشنز کا دورہ

    راولپنڈی: آرمی چیف جنرل قمر جاوید باجوہ نے کراچی کور کی فارمیشنز کا دورہ کیا، آرمی چیف نے کراچی کور اور رینجرز کی تیاریوں کو سراہا۔

    پاک فوج کے شعبہ تعلقات عامہ آئی ایس پی آر کے مطابق پاک فوج کے سربراہ جنرل قمر جاوید باجوہ نے کراچی کور کی فارمیشنز کا دورہ کیا، آرمی چیف نے سرحدی علاقے میں کراچی کور، سندھ رینجرز کی مشقیں دیکھیں۔

    آئی ایس پی آر کے مطابق آرمی چیف جنرل قمر جاوید باجوہ نے روایتی خطرات کے خلاف کراچی کور اور رینجرز کی تیاریوں کو سراہا۔

    آرمی چیف کا ایس ایس جی ہیڈ کوارٹرز کا دورہ

    یاد رہے کہ گزشتہ ہفتے آرمی چیف جنرل قمر جاوید باجوہ نے ایس ایس جی ہیڈکوارٹرز کا دورہ کیا تھا۔ آرمی چیف کا کہنا تھا کہ ایس ایس جی کمانڈوز ہمارا فخر ہیں، قیام پاکستان سے لے کر اب تک کمانڈوز، افسروں اور جوانوں نے ملکی دفاع کے لیے بےشمار خدمات سرانجام دی ہیں۔

    جنرل قمر جاوید باجوہ کا کہنا تھا کہ ملک دشمن قوتوں کو ناکام کرتے ہوئے ملک میں استحکام لائے ہیں، کسی قیمت پر ملکی استحکام کو خراب نہیں ہونے دیں گے۔

  • ایل او سی پر فائرنگ سے 2 جوان شہید، پاک فوج کا منہ توڑ جواب، 3 بھارتی فوجی ہلاک

    ایل او سی پر فائرنگ سے 2 جوان شہید، پاک فوج کا منہ توڑ جواب، 3 بھارتی فوجی ہلاک

    راولپنڈی: لائن آف کنٹرول پر بھارتی اشتعال انگیزی کے سبب پاک فوج کے 2 جوان شہید ہو گئے جب کہ جوابی کارروائی میں پاک فوج نے 3 بھارتی فوجی مار دیے۔

    تفصیلات کے مطابق بھارتی فوج کی جانب سے ایل او سی پر اشتعال انگیزیاں بڑھتی جا رہی ہیں، ڈی جی آئی ایس پی آر نے کہا ہے کہ بھارتی فورسز نے حاجی پیر سیکٹر پر بلا اشتعال فائرنگ کی ہے جس کا بھرپور جواب دیا گیا۔

    آئی ایس پی آر کے مطابق پاک فوج نے حاجی پیر سیکٹر پر بھارتی اشتعال انگیزیوں کا منہ توڑ جواب دیا، پاک فوج کی جوابی کارروائی سے بھارتی چیک پوسٹ تباہ ہو گئی۔

    ڈی جی آئی ایس پی آر کی ٹویٹ کے مطابق پاک فوج کی جوابی کارروائی میں 3 بھارتی فوجی مارے گئے، مارے جانے والے بھارتی فوجیوں میں ایک صوبیدار بھی شامل ہے۔

    آئی ایس پی آر کا کہنا ہے کہ بھارتی اشتعال انگیزی سے دیوا سیکٹر پر پاک فوج کے 2 جوان بھی شہید ہوئے۔ شہید نائب صوبیدار کندیرو سکھر کی تحصیل پنو عاقل کا رہایشی تھا جب کہ شہید سپاہی محمد احسان کا تعلق جہلم کی تحصیل پنڈدادن خان سے تھا۔

  • بھارتی فوج کی ایل او سی پر فائرنگ، 2 شہری شہید، 2 زخمی

    بھارتی فوج کی ایل او سی پر فائرنگ، 2 شہری شہید، 2 زخمی

    راولپنڈی: بھارتی فوج نے لائن آف کنٹرول (ایل او سی) کی ایک مرتبہ پھر خلاف ورزی کرتے ہوئے بلا اشتعال فائرنگ کی ہے جس کے نتیجے میں 2 شہری شہید 2 زخمی ہوگئے۔

    پاک فوج کے شعبہ تعلقات عامہ( آئی ایس پی آر ) کے مطابق بھارتی فوج نے ایک بار پھر سیز فائر معاہدے کی خلاف ورزی کرتے ہوئے شہری آبادی کو نشانہ بنایا۔

    آئی ایس پی آر کے مطابق بھارتی فوج نے لائن آف کنٹرول پر لسوا گاؤں پر بلا اشتعال فائرنگ کی، فائرنگ کے نتیجے میں 2 شہری شہید اور 2 شہری زخمی ہوگئے۔

    آئی ایس پی آر کا کہنا ہے کہ شہید ہونے والوں میں 14سال کا شہریار اور 29 سال کا نوید شامل ہے جبکہ فائرنگ سے خاتون سمیت 2 افراد زخمی ہوئے ہیں۔

    پاک فوج کے شعبہ تعلقات عامہ کے مطابق پاک فوج نے دشمن کو منہ توڑ جواب دیا، پاک فوج کی جانب سے کی جانے والی جوابی کارروائی میں بھارتی چوکی تباہ اور بھاری جانی نقصان ہوا ہے۔

    یاد رہے کہ رواں سال اکتوبر میں بھارتی فوج نے ایل او سی کی خلاف ورزی کرتے ہوئے بلا اشتعال فائرنگ کی تھی جس کے نتیجے میں 3 شہری زخمی ہوگئے تھے۔ آئی ایس پی آر کے مطابق بھارتی فوج کی فائرنگ سے زخمی ہونے والے شہریوں کا تعلق ضلع بھمبرکے گاؤں مندیکا سے تھا

  • آرمی چیف سے امریکی سینیٹر لنزے گراہم کی ملاقات

    آرمی چیف سے امریکی سینیٹر لنزے گراہم کی ملاقات

    اسلام آباد: آرمی چیف جنرل قمر جاوید باجوہ سے امریکی سینیٹر لنزے گراہم کی ملاقات ہوئی، ملاقات میں افغان امن عمل سمیت خطے کی سیکیورٹی صورتحال پر تبادلہ خیال کیا گیا۔

    تفصیلات کے مطابق پاک فوج کے شعبہ تعلقات عامہ (آئی ایس پی آر) کے سربراہ میجر جنرل آصف غفور نے سماجی رابطے کی ویب سائٹ ٹویٹر پر ٹویٹ کرتے ہوئے بتایا کہ امریکی سینیٹر لنزے گراہم نے جی ایچ کیو کا دورہ کیا جہاں آرمی چیف جنرل قمر جاوید باجوہ سے ان کی ملاقات ہوئی ہے۔

    ڈی جی آئی ایس پی آر کے مطابق ملاقات میں افغان امن عمل سمیت خطے کی سیکیورٹی صورتحال پر تبادلہ خیال کیا گیا۔ امریکی سینیٹر نے امن و استحکام کے لیے پاکستان کی کاوشوں کو سراہا۔

    خیال رہے کہ امریکی سینیٹر لنزے گراہم آج ہی 10 رکنی اعلیٰ سطح وفد کے ہمراہ پاکستان پہنچے ہیں، وفد کی سربراہی سینیٹر گراہم کر رہے ہیں۔

    وزیر اعظم عمران خان کی بحرین روانگی سے قبل امریکی سینیٹر نے ان سے بھی ملاقات کی، جس میں وزیر خارجہ شاہ محمود قریشی بھی موجود رہے۔ ملاقات میں دونوں ممالک کے وفد بھی شامل تھے۔

    ملاقات کے دوران وزیر اعظم نے بھارت میں مسلمانوں کے ساتھ ناروا سلوک کا معاملہ اٹھایا، وزیر اعظم کا کہنا تھا کہ اقلیتوں کے خلاف بھارتی حکومت امتیازی پالیسیاں اپنا رہی ہے۔

    انہوں نے کہا تھا کہ خطے میں امن کا بگاڑ روکنے کے لیے امریکا کی مستقل توجہ ضروری ہے۔ امن، خوشحالی اور ترقی کے لیے پاکستان اور امریکا میں شراکت داری اہم ہے۔

  • ملک میں اقتصادی ترقی فورسز کی کوششوں سے ممکن ہوئی: آرمی چیف

    ملک میں اقتصادی ترقی فورسز کی کوششوں سے ممکن ہوئی: آرمی چیف

    پشاور: آرمی چیف جنرل قمر جاوید باجوہ نے فرنٹیئر کور ہیڈ کوارٹرز کے دورے کے دوران کہا کہ وطن کے لیے جانیں قربان کرنے والے شہدا کو سلام پیش کرتے ہیں۔ ملک میں اقتصادی ترقی فورسز کی کوششوں سے ممکن ہوئی۔

    تفصیلات کے مطابق پاک فوج کے شعبہ تعلقات عامہ آئی ایس پی آر کا کہنا ہے کہ آرمی چیف جنرل قمر جاوید باجوہ نے فرنٹیئر کور ہیڈ کوارٹرز کا دورہ کیا۔ آرمی چیف نے یادگار شہدا پرحاضری دی اور پھول چڑھائے۔

    آئی ایس پی آر کے مطابق آرمی چیف نے فرنٹیئر کور میوزیم اور فورٹ گیلری کا بھی دورہ کیا۔

    اس موقع پر آرمی چیف نے کہا کہ خیبر پختونخواہ بالخصوص فاٹا میں امن کے لیے فرنٹیئر کور کا اہم کردار ہے، وطن کے لیے جانیں قربان کرنے والے شہدا کو سلام پیش کرتے ہیں۔

    انہوں نے کہا کہ ملک میں سماجی و اقتصادی ترقی فورسز کی کوششوں سےممکن ہوئی، ملک میں دیرپا امن و استحکام کے لیے اقدامات جاری رکھیں گے۔

    گزشتہ روز آرمی چیف نے آرمرڈ کور سینٹر نوشہرہ کا دورہ کیا تھا اور کرنل کمانڈنٹ کے بیجز لگانے کی تقریب میں لیفٹیننٹ جنرل سرفراز ستار کو کرنل کمانڈنٹ آرمرڈ کور کے بیجز لگائے۔

    آرمی چیف نے روایتی اور غیر روایتی جنگ میں آرمرڈ کور کی کارکردگی کو بھی سراہا تھا۔