Tag: آئی ایس پی آر

راولپنڈی : ترجمان آئی ایس پی آر نے کہا ہے فلیگ میٹنگ میں پاکستان نے کلی جہانگیر اور کلی لقمان خالی کرنے کے افغانستان کے مطالبے کو مسترد کردیا ہے۔

آئی ایس پی آر کے مطابق آج پاکستان اور افغانستان کے درمیان فلیگ میٹنگ فرینڈشپ گیٹ چمن پر ہوئی، پاکستانی وفدکی قیادت ڈی آئی جی ایف سی بلوچستان نے کی، جس میں سرحدی تنازعات پر تبادلہ خیال کیا گیا اور کسی بھی نتیجے پر پہنچنے تک سیز فائر پر اتفاق کیا گیا۔

آئی ایس پی آر کا کہنا تھا کہ فلیگ میٹنگ میں افغان وفد نے پاکستان کو چمن کے سرحدی علاقے کلی جہانگیر اور کلی لقمان کو خالی کرنے کا مطالبہ کیا جسے مسترد کرتے ہوئے پاکستانی وفد نے موقف اختیار کیا کہ ہمارے فوجی پاکستان کی سرحدی حدود میں تعینات ہیں اور یہ علاقے پاکستانی حدود میں ہی آتے ہیں۔

واضح رہے کہ چمن میں مردم شماری کے موقع پر افغان فورسز کی جانب سے مقامی آبادی پر فائرنگ اور مکانات پر قبضے کی کوشش کی گئی جسے پاکستانی فورسز نے ناکام بنایا۔

پاکستان کی سیکیورٹی فورسز نے فوری کارروائی کرتے ہوئے افغان فوج کو پسپائی پر مجبور کیا جس کے نتیجے میں 50 افغان فوجی ہلاک اور 100 سے زائد زخمی ہوئے تھے۔

راولپنڈی : ترجمان آئی ایس پی آر کا کہنا ہے کہ آج اقوام متحدہ کے فوجی مبصر کو جی ایچ کیو مدعو کر کے بھارتی اشتعال انگیزیوں پر احتجاج ریکارڈ کروایا گیا ہے۔

ترجمان آئی ایس پی آر کے مطابق اقوام متحدہ فوجی مبصرگروپ نے جی ایچ کیو راولپنڈی کا دورہ کیا جہاں اقوام متحدہ کے فوجی مبصرین کو لائن آف کنٹرول پر بھارتی اشتعال انگیزی سے متعلق بریفنگ دی گئی۔

آئی ایس پی آر کے ترجمان نے کہا کہ اقوام متحدہ کےفوجی مبصرگروپ کوایل اوسی کی صورت حال پر بریفنگ بھی دی گئی اور پاک فوج کی جانب سے ایل اوسی پر بھارتی اشتعال انگیزیوں پر احتجاج بھی ریکارڈ کرایا گیا۔

اقوام متحدہ کے فوجی مبصر گروپ کو بتایا گیا کہ لائن آف کنٹرول پر بھارتی فوج چھوٹے ہتھیار، آٹومیٹک اور بھاری ہتھیار استعمال کررہی ہے
اور آج بھی سبزکوٹ، ٹانڈر، کھوئی رٹہ، کوٹ کٹیرا، کریلا، بروہ سیکٹرز پر اشتعال انگیزی کی گئی جس کے نتیجے میں ایک شہری شہید اور 15 زخمی ہوئے۔

ترجمان آئی ایس پی آر کا کہنا تھا کہ اس موقع پر اقوام متحدہ کے مبصرین کو بتایا گیا کہ لائن آف کنٹرول پر بھارتی فوج ہیوی مارٹر فیلڈ آرٹلری استعمال کررہی ہے اور مقامی آبادی کے نہتے شہریوں کو نشانہ بنارہی ہے۔