خیبر ایجنسی: وفاق کے زیر انتظام قبائلی علاقے خیبر ایجنسی میں پاک افغان سرحدی علاقے وادی راجگال میں پاک فوج نے دہشت گردوں کے ٹھکانوں پر فضائی بمباری کی جس میں متعدد دہشت گرد ہلاک اور ان کے کئی ٹھکانے تباہ ہوگئے۔
پاک فوج کے شعبہ تعلقات عامہ آئی ایس پی آر کے مطابق مذکورہ کارروائی خیبر ایجنسی میں گزشتہ رات کی گئی۔
آئی ایس پی آر کا کہنا ہے کہ کارروائی کالعدم لشکر اسلام کے سرغنہ منگل باغ کی موجودگی کی اطلاع پر کی گئی۔ فضائی بمباری میں متعدد دہشت گرد ہلاک ہوئے۔
کارروائی میں دہشت گردوں کے متعدد ٹھکانے تباہ بھی ہوئے۔
یاد رہے کہ گزشتہ رات خیبر ایجنسی میں ہی دہشت گردوں نے سرحد پار سے ایف سی کی چیک پوسٹ پر حملہ کیا تھا جسے پاک فوج نے بروقت ناکام بناتے ہوئے منہ توڑ جواب دیا۔
فوج کی کارروائی میں 6 دہشت گرد ہلاک ہوئے جبکہ 2 ایف سی اہلکار شہید ہوئے۔
اس سے قبل گزشتہ روز ہی خیبر پختونخواہ کے علاقے شبقدر میں دہشت گردوں نے ایف سی سینٹر پر بھی حملہ کیا۔ سیکورٹی فورسز نے اس حملے کو بھی ناکام بناتے ہوئے 2 خود کش بمباروں کو ہلاک کردیا۔
ڈی پی او سہیل خالد کے مطابق دہشت گردوں کے ساتھ فائرنگ کے تبادلے میں ایک اہلکار شہید جبکہ 2 زخمی بھی ہوئے جنہیں طبی امداد کے لیے اسپتال منتقل کر دیا گیا۔
راولپنڈی : آئی ایس پی آر کا کہناہےکہ خیبرایجنسی میں ایف سی چیک پوسٹ پر دہشت گردوں کےحملے کوناکام بناتے ہوئے2اہلکار شہید جبکہ 6دہشت گرد مارے گئے۔
تفصیلات کےمطابق وفاق کے زیر انتظام قبائلی علاقے خیبرایجنسی میں دہشت گردوں کے سرحد پار سے ایف سی چیک پوسٹ پرحملے کاپاک فوج نے منہ توڑ جواب دیتے ہوئے 6دہشت گردوں کوہلاک کردیا۔
پاک فوج کے شعبہ تعلقات عامہ آئی ایس پی آر کےمطابق دہشت گردوں سے فائرنگ کے تبادلے میں 2ایف سی اہلکار شہید ہوئے۔
خیال رہےکہ اس سے قبل خیبرپختونخواہ کےعلاقےشبقدر میں ایف سی سینٹر پردہشت گردوں کےحملے کو سیکورٹی فورسز نے ناکام بناتے ہوئےدوخودکش بمبارں کو ہلاک کیاتھا۔
ڈی پی اوسہیل خالدکے مطابق دہشت گردوں کےساتھ فائرنگ کے تبادلے میں ایک اہلکار شہیدجبکہ 2 زخمی ہوگئےجنہیں طبی امداد کے لیے اسپتال منتقل کردیاگیاہے۔
یاد رہےکہ گزشتہ ماہ خیبرپختونخواہ کے ضلع چارسدہ کے علاقے تنگی میں کچہری گیٹ کے قریب 2 دھماکے ہوئےتھےجس کے نتیجے میں 3 دہشت گرد ہلاک اور 7 افراد جاں بحق ہوئےتھے۔
اسلام آباد:سیکیورٹی فورسز پر حملے میں ملوث تین دہشت گردوں کو فوجی عدالتوں کی سزا کے تحت پھانسی دے دی گئی، دہشت گردوں کو ہائی سیکیورٹی جیل ساہیوال میں پھانسی دی گئی.
پھانسی پانے والوں میں سید زمان‘ شوالے اورمحمد ذیشان شامل ہیں، تینوں دہشت گرد سیکیورٹی اداروں کے اہلکاروں پرحملوں میں ملوث تھے۔
آئی ایس پی آرنے مزید تفصیلات فراہم کرتے ہوئے بتایا کہ سیدزمان اورذیشان کاتعلق کالعدم حرکت الجہاد اسلامی سے تھا، شوالے کا تعلق کالعدم تحریک طالبان سےتھا، تینوں دہشت گردوں نےاپنےجرائم کااعتراف کیا تھا۔
فوجی عدالتوں کا قیام
واضح رہے کہ آئی ایس پی آر کے اعداد و شمار کے مطابق فوجی عدالتوں نے حکومت کی جانب سے مقرر کردہ دو سالہ مدت کے دوران 274 مقدمات کی سماعت مکمل کرنے کے بعد فیصلے سنائے ہیں، جن میں سے 161 مقدمات میں مجرموں کو سزائے موت سنائی گئی اور 113 مقدمات میں مجرموں کو قید کی سزا ہوئی۔
یاد رہے کہ 16 دسمبر 2014 کو سانحہ پشاور کے بعد سیاسی جماعتوں نے اتفاق رائے کے تحت آئین میں ترمیم کرکے فوجی عدالتوں کے قیام کی راہ ہموار کی تھی تاکہ ملک سے مکمل طور پر جلد از جلد دہشت گردی کا خاتمہ کیا جائے.
راولپنڈی : ملک کے مختلف شہروں میں آپریشن ردالفساد کے تحت کارروائیاں جاری ہیں، آپریشن میں 2 افغانیوں سمیت 21 مشتبہ افراد کو گرفتار کیا گیا۔
تفصیلات کے مطابق ملک کے چپے چپے میں آپریشن ردالفساد کامیابی سے جاری ہے، ملک بھر میں آپریشن ردالفساد کے تحت دہشت گردوں اور ان کے سہولت کاروں کو تلاش کیا جارہا ہے۔ جرائم ہپیشہ افراد کی گرفتاری اوران سے بھاری تعداد میں اسلحہ بھی برآمد کیا گیا ہے۔
پاک فوج کے شعبہ تعلقات عامہ آئی ایس پی آر کے مطابق ملک کے مختلف شہروں میں آپریشن ردالفساد کے تحت کارروائیاں بھرپور طریقے سے جاری ہیں۔
جرائم پیشہ اور غیر قانونی تارکین وطن کیخلاف آپریشن میں 2افغانیوں سمیت21مشتبہ افراد کوحراست میں لیا گیا ہے، گرفتار شدگان سے گولہ بارود،اسلحہ اور نفرت انگیز مواد قبضے میں لے لیا گیا۔
مذکورہ آپریشن اسلام آباد، راولپنڈی، ڈی جی خان اور لاہور کے علاقوں میں کیا گیا۔ اس کے علاوہ سیالکوٹ، راجن پوراور رحیم یارخان میں بھی آپریشن کیا گیا۔
راولپنڈی : بھارتی فوج نے لائن آف کنٹرول کی ایک بار پھر خلاف ورزی کرتے ہوئے چری کوٹ سیکٹر پر بلااشتعال فائرنگ کی ہے، جس کے نتیجے میں ایک بزرگ اور بچی شدید زخمی ہوگئے۔
تفصیلات کے مطابق بھارتی فوج نے ایک بار پھر لائن آف کنٹرول پر جنگ بندی کے معاہدے کی خلاف ورزی کرتے ہوئے شری کوٹ سیکٹرپربلا اشتعال فائرنگ کردی۔
پاک فوج کے شعبہ تعلقات عامہ آئی ایس پی آر کی جانب سے جاری بیان کے مطابق بھارتی فوج نے چفارگاؤں کی شہری آبادی کونشانہ بنایا، بھارتی فائرنگ سے 60 سالہ شہری اور15 سالہ لڑکی زخمی ہوئے۔۔
زخمیوں کوعلاج کے لیے سول اسپتال عباس پورمنتقل کردیا گیا پاک فوج کی بھرپورجوابی کارروائی پردشمن کی توپیں خاموش ہوگئیں۔
یاد رہے کہ اس سے قبل بھی بھارتی فوج نے بلا اشتعال فائرنگ کرکے آزاد جموں و کشمیر کے ضلع کوٹلی میں خواتین کو زخمی کردیا تھا۔
اس کےعلاوہ بھی متعدد بار بھارتی فوج کی جانب سے لائن آف کنٹرول اور ورکنگ باونڈری کی خلاف ورزی کی جا چکی ہے۔
راولپنڈی : ملک بھر میں آپریشن ردالفساد کے دوران 26 مشتبہ افراد کو حراست میں لے لیا گیا ہے جن میں 13 افغان شہری بھی شامل ہیں۔
تفصیلات کے مطابق ملک بھر میں جاری دہشت گردوں کے خلاف جنگ میں آپریشن رد الفساد کے تحت کا رروائیاں جاری ہیں جس کے دوران
مختلف علاوں سے 20 مشتبہ افراد کو گرفتار کیا گیا ہے۔
آئی ایس پی آر کے ترجمان کے مطابق ملک بھر جاری آپریشن ردالفساد کے تحت قانون نافذ کرنے والے اداروں کی جانب سے مشترکہ سرچ آپریشن کے دوران لاہور، ڈی جی خان، صادق آباد ، اسلام آباد ، اٹک اور نارووال میں کیے گئے جس کے دوران کئی سو لوگوں کے کوائف کی جانچ پڑتال کی گئی۔
سرچ آپریشن کے دوران نامکمل کوائف رکھنے پر 26 مشتبہ افراد کو حراست میں لے لیا گیا جن میں سے 26 افغان باشندے ہیں، زیرِ حراست افراد کے قبظے سے بھاری مقدار میں اسلحہ اور گولہ و بارود بھی برآمد کیا گیا ہے۔
واضح رہے گزشتہ ماہ لاہور میں کود کش دھماکے میں درجنوں افراد کی ہلاکت میں افغانستان میں موجود قوتوں کے ملوث ہونے پر پاک فوج کی جانب سے آپریشن رد الفساد کا آغاز کیا گیا تھا جس کے پہلے ہی روز پاک افغان بارڈ پر موجود دہشت گردی کی ٹریننگ کے کیمپوں کو تباہ کردیا گیا تھا۔
راولپنڈی: آرمی چیف جنرل قمر باجوہ نے کہا ہے دشمن کے عزائم کو قوم خاک ملانے کے لیے پوری قوم پاک فوج کے ساتھ سیسہ پلائی دیوار کی طرح کھڑی ہے، پاک فوج کے بہادور جوانوں اور دلیر عوام کی قربانیاں رائیگاں نہیں جائیں گی۔
ڈی جی آئی ایس پی آر کے مطابق یہ بات آرمی چیف جنرل قمر باجوہ نے جی ایچ کیو میں منعقد ہونے والی 200 ویں کور کمانڈرز کانفرنس کی صدارت کرتے ہوئے اپنے خطاب میں کہی۔
CCC held at GHQ. Reviewed geo-pol and IS situation incl Pak-Afg bdr/ LOC. Op RuF, NAP, Mil Courts, Population Census & Dawn Leaks discussed. pic.twitter.com/NGpzkhIDne
— Maj Gen Asif Ghafoor (@OfficialDGISPR) March 9, 2017
کور کمانڈرز کانفرنس میں ملک کے داخلی اور خارجی سیکیورٹی معاملات سمیت پاک افغان سرحد، لائن آف کنٹرول پر بھارتی فوج کی اشتعال انگیزی پر غور و خوص کیا گیا جب کی آرمی چیف نے اپنے دورہ قطر اور عرب امارات کی تفصیلات سے بھی شرکاء کو آگاہ کیا اس کے علاوہ اجلاس میں قانون نافذ کرنے والے اداروں بہ شمول مقامی پولیس اور رینجرز کی جانب سے پی ایس ایل فائنل کے موقع پر خدمات کو سراہا گیا۔
اجلاس میں آپریشن رد الفساد کے تحت کی گئی کارروائیوں کا بھی جائزہ لیا گیا اور اب تک کی پیش رفت پر اطمینان کااظہار کیا گیا جب کہ نیشنل ایکشن پلان کے تحت مقرر کیے گئے اہداف کے حوالے سے بھی تفصیلی تبادلہ خیال کیا گیا اور اس کی رفتار اور کامیابیوں پر اطمینان کا اظہار کرتے ہوئے اہم فیصلے کیے گئے۔
اس موقع پر آرمی چیف جنرل قمر باجوہ کا کہنا تھا کہ آپریشن رد الفساد دہشت گردوں اور ان کے سہولت کاروں کے خلاف ملک کے ہر حصے میں کامیابی کے ساتھ کیا جا رہا ہے جو کسی خاص رنگ، نسل یا ذبان بولنے والوں کے خلاف قطعی نہیں ہے اور ایسا تاثر دینے والے درست نہیں۔
اجلاس میں مردم شماری کے حوالے سے پاک فوج کی خدمات کا بھی جائزہ لیا گیا اور فیصلہ کیا گیا کہ مردم شماری کو پُر امن، شفاف اور محفوظ بنانے کے لیے ہرقسم کے اقدامات کیے جائیں گے جب کہ ڈان لیکس، فوجی عدالتیں اور ان عدالتوں کی جانب سے دی گئی پھانسی کی سزاؤں پر بھی تبادلہ خیال کیا گیا اور مزید فعالیت کے لیے اہم فیصلے کیے گئے۔
راولپنڈی: سینئر ملٹری قیادت نے آرمی چیف کی جانب سے پاکستان میں متعین افغان سفیر سے ٹیلی فون پر رابطہ کر کے کابل فوجی اسپتال میں خودکش دھماکے کی شدید الفاظ میں مذمت کی اور زخمیوں کے علاج و معالجے کی پیش کش بھی کی۔
آئی ایس پی آر کی جانب سے جاری کردہ اعلامیے میں کہا گیا ہے کہ سینئر ملٹری آفیسر نے پاکستان میں متعین افغان سفیر کو ٹیلی فون کیااورانہیں آرمی چیف جنرل قمرجاوید باجوہ کاپیغام پہنچایا۔
ڈی جی آئی ایس پی آر کے مطابق اپنے پیغام میں آرمی چیف نے کابل میں فوجی اسپتال پرخودکش حملےپر افسوس کا اظہار کیااورافغان حکومت کو ہر قسم کی مدد زخمیوں کے پاکستان میں علاج کی بھی پیشکش کی۔
افغان سفیر نے آرمی چیف کے بیان کو سراہا اور اُن کے تعاون پر شکریہ ادا کیا۔
یاد رہے گزشتہ روز کابل کے فوجی اسپتال میں اسلامی شدت پسند جماعت کے مسلح کارندے ڈاکٹرز کا روپ دھار کر اسپتال میں داخل ہوئے اور فائرنگ کر کے 32 افراد کو موت کے گھاٹ اتار دیا تھا۔
راولپنڈی: پاک فوج کے ترجمان میجر جنرل آصف غفور نے کہا ہے کہ پاکستان کی بقاء اور حکومتی رٹ کو بحال کرنے کے لیے آپریشن ضرب عضب شروع کیا گیا جس کا مقصد دہشت گردوں کا صفایا تھا تاہم آپریشن ردالفساد کا مقصد ملک سے غیر قانونی اسلحے کا خاتمہ ہے، پی ایس ایل کا فائنل ہو یا پھر کوئی اور ایونٹ سیکیورٹی کی ذمہ داری پاک فوج کی ہے۔
اے آر وائی نیوز سے گفتگو کرتے ہوئے ڈی جی آئی ایس پی آر میجر جنرل آصف غفور نے کہا کہ آپریشن ردالفساد کا ایک ہی مقصد فساد کو رد کرنا ہے، نئے آپریشن کا مقصد پاکستان کے استحکام کو مزید مضبوط کرنا ہے اور اس کے لیے تمام اداروں کو نیشنل ایکشن پلان کے تحت اپنا کردار ادا کرنا ہوگا۔
ڈائریکٹر جنرل نے کہا کہ آپریشن ردالفساد کا کوئی ٹائم فریم نہیں تاہم اس کا مقصد ملک سے غیر قانونی اسلحے کا خاتمہ ہے جبکہ آپریشن ضرب عضب کا مقصد شمالی وزیرستان سمیت ملک بھر سے دہشت گردوں کا خاتمہ تھا، آپریشن ردالفساد فوج، رینجرز یا پولیس کا نہیں بلکہ پاکستان کا ہے اور اس میں تمام اداروں کو اپنا اپنا کردار ادا کرنا ہوگا۔
انہوں نے کہا کہ دہشت گردی کے خلاف جنگ فوج نے نہیں بلکہ پاکستانی عوام نے جیتی، پاک فوج نے صرف کلیئرنس کا کام کیا جس کے بعد اب تمام ادارے وزیرستان میں اپنا کام بخوبی ادا کررہے ہیں۔ آصف غفور نے کہا کہ پاکستان میں استحکام کی خاطر تمام اداروں کو ایک دوسرے کی مدد کرنا چاہیے کیونکہ ہم سب کو مل کر ملک کے کونے کونے میں ریاست کی رٹ کو بحال رکھنا ہے۔
ترجمان پاک فوج نے کہا ہے کہ پاکستان میں ہونے والی حالیہ دہشت گردی کی ذمہ داری افغانستان سے قبول کی گئی، پاک افغان تعلقات میں کشیدگی کا فائدہ دشمن اٹھاتے ہیں کیونکہ افغانستان میں موجود دہشت گردوں کو بھارتی خفیہ ایجنسی را سمیت دیگر اداروں کی حمایت حاصل ہے ۔
میجر جنرل نے کہا کہ پاک افغان سرحد کا فیصلہ انتہائی اقدام ہے کیونکہ دہشت گردوں نے افغانستان میں محفوظ پناہ گاہیں بنا رکھی ہیں، افغان حکومت اگر پاکستان کے ساتھ اپنے تعلقات بہتر نہیں بنائے گی تو اس کا فائدہ دشمن کو اور نقصان دونوں ممالک کو ہوگا کیونکہ سرحد پر ابھی تک مضبوط میکنزم تیار نہیں ہوسکا۔
میجر جنرل آصف غفور نے کہا کہ افغان سرزمین پر موجود دہشت گردوں کو را کی مدد کے حوالے سے بات چیت سیاسی پلیٹ فارم سے ہی اجاگر کیا جاسکتا ہے، ہمیں کسی صوبے میں نہیں بلکہ پورے پاکستان میں امن قائم کرنا ہے جبکہ دہشت گردوں کا کوئی ملک یا صوبہ نہیں ہوتا اور وہ متحد قوموں کو لڑوانے کے لیے پروپیگنڈے کرتے ہیں۔
ڈی جی آئی ایس پی آر نے عوام اور میڈیا سے اپیل کی کہ وہ جھوٹے پروپیگنڈوں کے حوالے سے پاک فوج کا ساتھ دیں تاکہ جلد ہی اس قسم کی بے بنیاد باتوں کا خاتمہ ہوسکے اور ملک سے دہشت گردی مکمل ختم ہوجائے، آصف غفور نے کہا کہ جلد ہی جھوٹے پروپیگنڈوں کا خاتمہ کردیا جائے گا کیونکہ عوام اور پاک فوج متحد ہوکر دہشت گردوں کے تفرقے کے خلاف برسرپیکار ہوں گے اور ملک سے دہشت گردی ختم کرنے میں اپنا کردار ادا کریں گے۔
لاہور میں پی ایس ایل فائنل کے حوالے سے ڈی جی آئی ایس پی آر نے کہا کہ جس جگہ ٹاسک دیا جائے گا وہاں پاک فوج کے جوان اپنی ذمہ داریاں پوری طریقے سے انجام دیں گے، پاکستان سپرلیگ ہو یا کوئی اور ایونٹ سیکیورٹی فراہم کرنا ہے پاک فوج کی ذمہ داری ہے۔
راولپنڈی: ترجمان پاک فوج نے کہا ہے کہ واٹس ایپ سے جاری ہونے والے دہشت گردی سے متعلق پیغام کا تعلق آئی ایس پی آر سے نہیں، عوام اس قسم کے جھوٹے پیغامات کو آگے نہ بڑھائیں۔
پاک فوج کے تعلقات عامہ سے جاری بیان میں کہا گیا ہے کہ سوشل میڈیاپرخطرات سےمتعلق پیغامات سے پاک فوج کا کوئی تعلق نہیں، آئی ایس پی آر کے پیغامات آفیشل پیج اورویب سائٹ پرجاری کیے جاتے ہیں۔
آئی ایس پی آر اعلامیے میں کہا گیا ہے کہ دہشت گردی سے متعلق کسی بھی قسم کی خبر واٹس ایپ کے ذریعے نشر نہیں کی گئی عوام اس قسم کے جھوٹے پیغامات کو آگے نہ بڑھائیں اور اسے مسترد کردیں۔
ترجمان پاک فوج نے عوام سے اپیل کی ہے کہ وہ موصول ہونے والے پیغامات کی تصدیق کے لیے ویب سائٹ یا آفیشل پیچ پر جائیں اور آئندہ کسی بھی قسم کے جھوٹے پیغامات آگے بھیجنے سے قبل ٹوئٹر اور فیس بک اکاؤنٹ سے اس کی تصدیق کرلیں۔
خیال رہے گزشتہ دنوں آئی ایس پی آر کے نام سے ایک جھوٹا پیغام جاری کیاگیا تھا، جس میں عوام سے اپیل کی گئی تھی کہ وہ دہشت گردی کے ممکنہ حملوں کے پیش نظر رش والی جگہ کا رخ نہ کریں اور بازار وغیرہ احتیاط سے جائیں۔
