اسلام آباد : عالمی مالیاتی فنڈ (آئی ایم ایف) کے وفد نے پاکستانی معاشی ٹیم کے اقدامات کو سراہتے ہوئے روز دیا کہ پاکستان کو تمام اہداف پر سختی سے عملدرآمد کرنا ہے۔
تفصیلات کے مطابق نگران وزیرخزانہ ڈاکٹر شمشاد اختر سے عالمی مالیاتی فنڈ (آئی ایم ایف) وفد کا تعارفی سیشن ہوا ، ایف بی آر حکام بھی آئی ایم ایف وفد سے تعارفی سیشن میں شریک ہوئے جبکہ گورنراسٹیٹ بینک آئی ایم ایف وفد سے ملاقات کے بعد روانہ ہوگئے۔
نگران وزیرخزانہ نے بتایا کہ قرض پروگرام کے تحت تمام اہداف پر عملدرآمد ہورہا ہے اور قرض پروگرام میں رہتے ہوئے تمام اہداف پرعملدرآمد کریں گے، اقتصادی جائزے تک آئی ایم ایف کی تمام شرائط پر عملدرآمد ہو چکا ہے۔
آئی ایم ایف مشن کو ابتدائی طور پر اہداف پر عملدرآمد کی رپورٹ پیش کردی گئی ، آئی ایم ایف وفد نے معاشی ٹیم کے اقدامات کو سراہتے ہوئے کہا کہ پاکستان کو تمام اہداف پر سختی سے عملدرآمد کرنا ہے۔
خیال رہے آئی ایم ایف سے مذاکرات کا آغاز آج ہوگیا ہے ، پہلے مرحلے میں ٹیکنیکل مذاکرات میں ڈیٹا شیئرنگ ہوگی، وزیر خزانہ شمشاد اختر مذاکرات میں پاکستانی ٹیم کی سربراہی کررہی ہے جبکہ پاکستان کیلئے مشن چیف نیتھن پورٹر آئی ایم ایف ٹیم کی سربراہی کررہے ہیں۔
ذرائع وزارت خزانہ کا کہنا تھا کہ پاکستان نے تمام اہداف حاصل کرلیے، پاکستان کامیابی سے پہلے جائزے کی تکمیل کیلئے پرامید ہیں، آئی ایم ایف کیلئے پہلی سہ ماہی کارکردگی قابل قبول ہونا ضروری ہے، جائزے کی کامیابی پر پاکستان کو تقریبا 70کروڑ ڈالرز کی قسط ملےگی۔
