اسلام آباد : عالمی مالیاتی فنڈ ( آئی ایم ایف) کا کہنا ہے کہ نئی حکومت سے نئے قرض پروگرام پر آئندہ مہینوں میں بات ہوگی، جس کے لئے پاکستان کو معاشی اہداف پرمزیداقدامات کرنے ہوں گے۔
تفصیلات کے مطابق عالمی مالیاتی فنڈ ( آئی ایم ایف) نے پاکستان سے مذاکرات کا اعلامیے جاری کردیا۔
آئی ایم ایف نے کہا حکومت نے نئے قرض پروگرام کے حصول میں دلچسپی ظاہر کر دی، پاکستان سےمیڈیم ٹرم فنڈ سپورٹڈ پروگرام پر مذاکرات کریں گے، پاکستان کے ساتھ مذاکرات آنے والے مہینوں میں شروع ہوں گے.
اعلامیے میں کہا گیا کہ نئے قرض پروگرام کے لیے پاکستان کو زرمبادلہ کے ذخائر بہتر بنانا ہوں گے، ا نجی شعبے کی شراکت داری بڑھانا ہوگی، سرکاری اداروں کی کارکردگی بہتر بنانا ہوگی۔
آئی ایم ایف نے بتایا کہ نئے قرض پروگرام کے لیے سرکاری اداروں میں اصلاحات کرنی ہوں گی، انسانی وسائل پر سرمایہ کاری بڑھانا ہوگی، نئے وسائل پر سرمایہ کاری بڑھنے سے معاشی ترقی بڑھ سکتی ہے۔
اعلامیے میں کہا ہے کہ پاکستان آئی ایم ایف سے نیا وسط مدتی قرض پروگرام لینا چاہتا ہے، نئے قرض پروگرام کیلئے پاکستان کو معاشی اہداف پر مزید اقدامات کرنے ہوں گے۔
آئی ایم ایف کے مطابق پاکستان کو ٹیکس بنیاد کو وسیع کرنا ہوگا، پبلک فنانس مضبوط کرنے کیلئے اقدامات کرنے ہوں گے اور غریب اور نادار طبقے کے تحفظ دینا ہوگا ساتھ ہی غریب طبقات کی سماجی امداد کے اخراجات پر توجہ دینی ہوگی۔
اعلامیے میں مزید کہنا تھا کہ نئی منتخب حکومت کو توانائی شعبے میں اصلاحات کرنی ہوں گی، پاکستان کو بجلی کی ترسیل اور تقسیم کے نظام کو بہتر بنانا ہوگا،کیپٹیو پاور ڈیمانڈ کو گرڈ میں منتقل کرنا ہوگا، آئی ایم ایف اعلامیہ
اس کے علاوہ تقسیم کار کمپنیوں کی گورننس اور انتظام کو مضبوط بنانا ہوگا اور بجلی چوری روکنے کیلئےمزید مؤثر کوششیں کرناہوں گی۔
