کراچی: بلیک کمپنی میں سزا پانے والے پولیس اہلکاروں نے بحالی کے لیے نئے آئی جی سندھ رفعت مختار کی منت سماجت شروع کر دی۔
تفصیلات کے مطابق گارڈن ہیڈ کوارٹر میں بی کمپنی اہلکاروں کی آئی جی سندھ رفعت مختار سے ملاقات کی ویڈیو سامنے آ گئی، آئی جی سندھ سے بی کمپنی اہلکاروں کا سامنا جمعہ کو گارڈن ہیڈ کوارٹر میں شہید اہل کار عادل کی نماز جنازہ کے بعد ہوا تھا۔
بی کمپنی پولیس افسران اور اہلکار نے آئی جی سے مکالمہ کرتے ہوئے کہا ’’ہمارے چھوٹے چھوٹے بچے ہیں ہم ذلیل ہو چکے ہیں، ہمارے ساتھ انصاف کیا جائے، ہم یہاں سڑکوں پر سورہے ہیں، اللہ نے اپ کو مسیحا بنا کر بھیجا ہے، ہم آپ کے پاؤں پڑتے ہیں۔‘‘
آئی جی سندھ رفعت مختار نے کہا ’’ہم فورس ہیں کبھی بھی کسی کے پاؤں پڑنے کی ضرورت نہیں ہے، اللہ عزت دیتا ہے، تم اگر اپنے آپ کو ذلیل سمجھو گے تو ذلیل ہوگے۔‘‘
آئی جی سندھ نے اہلکاروں سے سوال کیا کہ اللہ یا آزماتا ہے یا مصیبت میں ڈالتا ہے، تم آزمائش کا سامنا کر رہے یا مصیبت کا؟ جس پر اہلکار نے کہا کہ ہم آزماِئش کا شکار ہیں، آئی جی سندھ نے جواب دیا ’’اللہ آزمائش اپنے خاص بندوں کی کرتا ہے۔‘‘
ذرائع کا کہنا ہے کہ آئی جی سندھ نے بلیک کمپنی کے حوالے سے اعلیٰ پولیس افسران سے تفصیلی بریفنگ مانگ لی ہے، بی کمپنی اہلکاروں کو محکمانہ انکوائری سے گزارا جائے گا، اور انکوائری میں کلیئر اہلکاروں کو بحال کر دیا جائے گا۔ واضح رہے کہ بی کمپنی میں موجود افسران اور اہلکاروں پر دوران سروس منظم جرائم کی سرپرستی کے الزامات ہیں۔
