انٹرنیشنل کرکٹ کونسل (آئی سی سی) نے ویمنز ون ڈے ورلڈ کپ کیلئے ریکارڈ انعامی رقم کا اعلان کیا ہے جو انعامی رقم کے لحاظ سے تاریخی ہے۔
آئی سی سی کی گورننگ باڈی کی جانب سے جاری اعلان کے مطابق ویمن ورلڈکپ کی مجموعی انعامی رقم 13.88 ملین ڈالر(پاکستانی روپوں میں 3.928 ارب روپے) رکھی گئی ہے۔
یہ انعامی رقم 2022 کے ایڈیشن میں پیش کی گئی 3.5 ملین ڈالر کی انعامی رقم سے تقریباً چار گنا زیادہ ہے، ورلڈ کپ کی فاتح ٹیم کو 4.48 ملین ڈالر اور رنر اپ کو 2.24 ملین ڈالر ملیں گے۔
آئی سی سی کے مطابق سیمی فائنلسٹ ٹیموں کو 1.12 ملین ڈالر کی انعامی رقم ملے گی، آٹھ ٹیموں پر مشتمل یہ مقابلہ بھارت اور سری لنکا کے مشترکہ میزبانی میں 30 ستمبر سے شروع ہوگا۔
ٹورنامنٹ کے ہر میچ میں اب بھاری انعامات دیے جائے گے، ٹورنامنٹ میں شریک ہر ٹیم کو کم از کم 250,000 ڈالر (پاکستانی روپوں میں 70.7 ملین روپے) ملیں گے، اور گروپ اسٹیج کی ہر فاتح ٹیم کو 34,314 ڈالر کا اضافی انعام ملے گا۔
پانچویں اور چھٹی پوزیشن حاصل کرنے والی ٹیموں کو 700,000 ڈالر (پاکستانی روپوں میں 198.1 ملین روپے) حاصل کریں گی، جبکہ ساتویں اور آٹھویں پوزیشن والی ٹیمیں بالترتیب 280,000 ڈالر (پاکستانی روپوں میں 79.2 ملین روپے) حاصل کریں گی۔
کراچی: انٹرنیشنل کرکٹ کونسل ( آئی سی سی ) کی جانب سے نئی ون ڈے انٹرنیشنل رینکنگ جاری کردی گئی ہے۔
انٹرنیشنل کرکٹ کونسل ( آئی سی سی ) کی جانب سے جاری نئی او ڈی آئی رینکنگ میں پاکستان ایک درجے گر کر 3465 پوائنٹس کے ساتھ چوتھے سے پانچویں نمبر پہنچ گیا۔
بھارت 4,471 پوائنٹس کے ساتھ بدستور پہلی پوزیشن پر قابض ہے، نیوزی لینڈ 4,160 پوائنٹس کے ساتھ دوسرے، آسٹریلیا 3,473 پوائنٹس کے ساتھ تیسرے نمبر پر ہے۔
پاکستان کو پیچھے چھوڑتے ہوئے سری لنکن کرکٹ ٹیم نے 4,009 پوائنٹس کے ساتھ چوتھی پوزیشن سنبھال لی۔
جنوبی افریقہ چھٹے اور افغانستان ساتویں نمبر پر موجود ہے، ویسٹ انڈیز کی ٹیم ایک درجہ ترقی پاکر نویں نمبر پر پہنچ گئی جبکہ بنگلہ دیش ایک درجہ تنزلی کے بعد دسویں نمبر پر پہنچ گیا۔
دوسری جانب پاکستان اور ویسٹ انڈیز کے درمیان ون ڈے سیریز کا تیسرا اور فیصلہ کن میچ آج کھیلا جائے گا۔
انٹرنیشنل کرکٹ کونسل (آئی سی سی) نے کرکٹ میں نئے قوانین متعارف کروادیے۔
آئی سی سی نے نئے قوانین کے تحت کرکٹ کی پلیئنگ کنڈیشنز میں کئی تبدیلیاں کر دی ہیں۔
گیند پر تھوک کا استعمال
جان بوجھ کرگیند پرتھوک کے استعمال پر گیند تبدیل نہیں کیا جائےگا، تھوک کے استعمال کے بعدگیند کی ساخت میں تبدیلی پر امپائر بیٹنگ سائیڈ کو 5 رنز دے سکتا ہے۔
جان بوجھ کر شارٹ رن لینے پر 5 پنالٹی رنز
جان بوجھ کر شارٹ رن لینے پر بیٹنگ سائیڈ پر 5 پنالٹی رنز کے ساتھ اسٹرائیک کا فیصلہ بولنگ سائیڈ کرے گی، امپائر بولنگ سائیڈ سے مشورہ کرے گا کہ شارٹ رن کے بعد وہ کس بیٹر کو اسٹرائیک پر لینا چاہیں گے۔
اسٹاپ کلاک
انٹرنیشنل کرکٹ کونسل نے وائٹ بال کے بعد ٹیسٹ میچوں میں بھی اسٹاپ کلاک قانوں نافذ کردیا ہے، ٹیموں کو اگلا اوور ایک منٹ کے اندر شروع کرنا ہوگا۔ اگلا اوورایک منٹ کے اندر نہ شروع ہوا تو امپائرز دو وارننگ دیں گے تیسری دفعہ میں بیٹنگ سائیڈ کو پانچ پنیلٹی رن مل جائیں گے، آئی سی سی کے مطابق اسٹاپ کلاک رول سےوائٹ بال میچوں میں وقت کی بچت ہوئی ہے۔
اسٹاپ کلاک کا رول آئی سی سی ورلڈ ٹیسٹ چیمپئن شپ کے نئے سائیکل پرلاگو ہوچکا ہے۔
فیئرنس آف کیچ کے ریویو
آئی سی سی نے فیئرنس آف کیچ کےریویو میں بھی تبدیلی کردی، اس تبدیلی کے ذریعے اگرامپائرکو کیچ پکڑنے پرشک ہو تو تھرڈ امپائر نوبال کے ساتھ کیچ کو بھی ریویو میں چیک کرےگا۔
اس سے قبل تھرڈ امپائرپہلےنوبال چیک کرتا تھا اور نوبال کی صورت میں کیچ کا ریویو چھوڑ دیا جاتا تھا۔
نئے رولز کے مطابق نوبال پر فیئر کیچ کی صورت میں بیٹنگ سائیڈ کو نوبال کا ایک رن ملے گا، فیئر کیچ نہ ہونے کی صورت میں بیٹنگ سائیڈ نے جتنے رنز لیے ہوں اُتنے ہی ملیں گے۔
آئی سی سی نے ویمنز ورلڈ کپ کوالیفائر ٹورنامنٹ کے اختتام پر ٹیم آف دی ٹورنامنٹ کا اعلان کر دیا پاکستان کی فاطمہ ثنا کو کپتان مقرر کیا گیا ہے۔
پاکستان کی میزبان میں کھیلے جانے والے آئی سی سی ویمنز ورلڈ کپ کوالیفائر ٹورنامنٹ کے اختتام کے بعد انٹرنیشنل کرکٹ کونسل نے ٹورنامنٹ کی بہترین ٹیم کا اعلان کر دیا ہے۔ پاکستان کی فاطمہ ثنا کپتان مقرر، چار گرین شرٹس کھلاڑی شامل ہیں۔
آئی سی سی ویمنز ورلڈ کپ کوالیفائر ٹیم آف کی ٹورنامنٹ میں پاکستان کے علاوہ بنگلہ دیش، ویسٹ انڈیز اور اسکاٹ لینڈ کی کھلاڑی بھی شامل کی گئی ہیں۔
ٹیم میں سب سے زیادہ پاکستان کی 4 کھلاڑی شامل کی گئیں۔ ان میں فاطمہ ثنا (کپتان) کے علاوہ منیبہ علی، نشرہ سندھو، سعدیہ اقبال شامل ہیں۔
ویسٹ انڈیز کی تین کھلاڑی ہیلے میتھیوز، عالیہ علین اور شنیل ہنری، بنگلہ دیش کی شرمین اختر اور نگار سلطانہ جب کہ اسکاٹ لینڈ کی کیتھرین برائس اور کیتھرین فریزر شامل تھیں۔
واضح رہے کہ لاہور میں ہونے والےآئی سی سی ویمنز ورلڈ کپ کوالیفائر میں پاکستان سمیت 6 ٹیموں بنگلہ دیش، ویسٹ انڈیز، اسکاٹ لینڈ، آئرلینڈ اور تھائی لینڈ کی ٹیموں نے شرکت کی۔
ٹورنامنٹ میں پاکستان ٹیم نے شاندار کارکردگی کا مظاہرہ کیا اور نا قابل شکست رہتے ہوئے اپنے تمام میچز جیتے اور رواں برس بھارت میں ہونے والے ورلڈ کپ کے لی کوالیفائی کیا۔
ٹورنامنٹ میں بنگلہ دیش اور ویسٹ انڈیز کی ٹیموں نے تین، تین میچز جیتے تاہم بہتر رن ریٹ کی بنیاد پر بنگلہ دیش نے میگا ایونٹ کے لیے کوالیفائی کیا۔
آئی سی سی ویمنز ورلڈ کپ رواں برس ستمبر اکتوبر میں بھارت میں کھیلا جائے گا۔ پی سی بی اور آئی سی سی معاہدے کے تحت پاکستان ٹیم اپنے تمام میچز ہائبرڈ ماڈل کے تحت نیوٹرل وینیو پر کھیلے گی۔
انٹرنیشنل کرکٹ کونسل نے اہم قدم اٹھاتے ہوئے جلاوطن افغان خواتین کرکٹرز کی مدد کیلئے ٹاسک فورس قائم کردی ہے۔
آئی سی سی نے اپنے بیان میں کہا کہ جلاوطن افغان خواتین کرکٹرز کو مالی طور پر سپورٹ کرنے کے ساتھ ساتھ انھیں کوچنگ سپورٹ بھی دی جائےگی، بھارت کے سابق کرکٹر ساروو گنگولی کو ٹاسک فورس کا سربراہ مقرر کیا گیا ہے۔
آئی سی سی نے بتایا کہ افغانستان کے حامد حسن، ٹیمبا باوما، ڈیسمنڈ ہینز، وی وی ایس لکشمن اور جوناتھن ٹراٹ ٹاسک فورس کے ممبرز ہونگے۔
گزشتہ سال سابق افغان ویمنز کرکٹرز کی جانب سے آئی سی سی سے افغان پناہ گزینوں کی ٹیم بنانے کی درخواست کی گئی تھی۔
آسٹریلیا میں مقیم سابق افغان ویمنز کرکٹرز نے آئی سی سی کو لکھے گئے خط میں کہا تھا کہ ورلڈکپ میں افغان ٹیم نے شاندار کارکردگی دکھائی لیکن افسوس کہ خواتین ٹیم اپنے ملک کی نمائندگی نہیں کرسکتیں۔
انحوں نے لکھا تھا کہ آئی سی سی آسٹریلیا میں پناہ گزین ویمن ٹیم بنانے میں مدد کرے، افغان پناہ گزین ٹیم بنانے سے ہمیں بارڈر کے بغیر کھیلنے کا موقع ملے گا۔
منیلا: فلپائن کے سابق صدر روڈریگو ڈوٹرٹے کو گرفتار کر لیا گیا ہے، ان کی گرفتاری کا وارنٹ بین الاقوامی فوجداری عدالت (آئی سی سی) نے جاری کیا تھا۔
روئٹرز کے مطابق فلپائن نے سابق صدر روڈریگو ڈوٹرٹے کو آئی سی سی کے وارنٹ پر آج منگل کو گرفتار کر لیا ہے، وارنٹ عالمی عدالت کی جانب سے بدنام زمانہ خوں ریز ’منشیات کے خلاف جنگ‘ میں ہزاروں افراد کی ہلاکت کی تحقیقات کے بعد جاری کیا گیا ہے۔
سابق صدر پر الزام ہے کہ ان کی نام نہاد ’منشیات کے خلاف جنگ‘ کے دوران ’انسانیت کے خلاف جرائم‘ کیے گئے تھے، فلپائن کی حکومت کے مطابق ڈوٹرٹے کو منگل کو منیلا ایئرپورٹ پر ہانگ کانگ سے ان کی آمد پر حراست میں لیا گیا، حکومت کو آئی سی سی کی درخواست انٹرپول کے ذریعے موصول ہوئی تھی۔
2016 سے 2022 تک فلپائن کی قیادت کرنے والے سابق صدر روڈریگو کو اگر ہیگ منتقل کیا جاتا ہے، تو وہ ایشیا کے پہلے ایسے سابق سربراہ مملکت بن جائیں گے، جن پر آئی سی سی میں مقدمہ چل رہا ہے۔
ڈوٹرٹے نے بار بار کہا ہے کہ انھوں نے پولیس کو صرف اپنے دفاع میں قتل کرنے کو کہا تھا، اور کریک ڈاؤن کا دفاع کرتے ہوئے متعدد بار کہا کہ اگر اس کا مطلب فلپائن کو منشیات سے نجات دلانا ہے تو وہ اس جرم میں ’’جیل میں سڑنے‘‘ کو تیار ہیں۔
ان پر الزام ہے کہ انھوں نے اپنی انسداد منشیات کی وحشیانہ مہم کے دوران مشتبہ افراد کو ان کے قانونی حق سے محروم رکھا، اور ہزاروں افراد بے دریغ قتل کیے، حتیٰ کہ بچے بھی مارے گئے۔ گرفتاری کے وقت سابق صدر نے گرفتاری کی قانونی حیثیت پر سوال اٹھایا، ان کی بیٹی ویرونیکا نے سوشل میڈیا پر ایک ویڈیو پوسٹ کی، جس میں انھوں نے سوال کیا ’’قانون کیا ہے اور میں نے کون سا جرم کیا ہے؟‘‘
دبئی: چیمپئنزٹرافی 2025 کی اختتامی تقریب سے پاکستانی آفیشل غائب رہے، پوڈیم پر کوئی بھی پاکستانی آفیشل دکھائی نہیں دیا۔
تفصیلات کے مطابق چیمپئنزٹرافی 2025 کا میزبان پاکستان ہی اختتامی تقریب سے غائب ہوگیا، ذرائع نے بتایا کہ پی سی بی کے چیف آپریٹنگ آفیسر سمیر احمد اسٹیڈیم میں موجود تھے، تاہم انھیں آئی سی سی کی جانب سے مدعو نہیں کیا گیا۔
آئی سی سی چیمپئنز ٹرافی 2025میں قومی ٹیم کی شکست کے بعد شائقین کرکٹ سخت مایوسی کا شکار ہیں، ایسی صورتحال میں دیگر ممالک کے میچز کے دوران بھی شائقین کرکٹ میدانوں کا رخ نہیں کررہے۔
اے آر وائی کے پروگرام ہرلمحہ پرجوش میں گفتگو کرتے ہوئے سینئر اسپورٹس جرنلسٹ شاہد ہاشمی نے کہا کہ اتنا بڑا آئی سی سی چیمپئنز ٹرافی کا ٹورنامنٹ ہورہا ہے، کل انگلینڈ اور ساؤتھ افریقہ کے کھلاڑی کھیل رہے تھے، آپ کو چاہئے تھا کہ نئی جنریشن اسکول اور کالجز کے طلباء کو بلا کر فری میں ٹکٹس دے کر 20ہزار بچے بٹھا دیتے۔
وہ بچے کم از کم جوفرا آرچر کو بالنگ کراتے ہوئے دیکھتے، ان بچوں میں بھی لگن پیدا ہوتی کہ جب یہ فاسٹ بالنگ کراسکتا ہے تو میں بھی فاسٹ بالر بنوں گا، وہ دیکھتے لیونگسٹن کس طرح بیٹنگ کررہا ہے، ہم بھی ایسے بیٹنگ کریں گے۔
شاہد ہاشمی نے کہا کہ آپ نے کراؤڈ لانے کی کوئی کوشش ہی نہیں کی اور ہمیں پوری دنیا میں بدنامی کا سامنا کرنا پڑرہا ہے، کہ چیمپئنز ٹرافی کرارہے ہیں، لیکن کراؤڈ تو لا نہیں سکے۔۔
دوسری جانب پاکستانی ٹیم کی آئی سی سی ایونٹ کے اہم میچ میں بھارت کے ہاتھوں شرمناک شکست پر سابق کرکٹرز کی جانب سے تنقید کا سلسلہ جاری ہے۔
اے آر وائی نیوز کے اسپورٹس پروگرام ہر لمحہ پرجوش میں گفتگو کرتے ہوئے تجزیہ کار نجیب الحسنین نے کہا کہ ’پاکستان ٹیم کی رسوائی اور ہمارے کوچ صاحب کی ڈھٹائی‘ ہیڈ کوچ عاقب جاوید کی پریس کانفرنس پر بات کرتے ہوئے نجیب الحسنین نے متعدد سوال اُٹھائے۔
اسپورٹس تجزیہ کار نجیب الحسنین نے کہا کہ ”پاکستانی ٹیم کے ہیڈ کوچ عاقب جاوید کہہ رہے کہ یہ نا تجربہ کار ٹیم ہے“۔ اس ٹیم میں کتنے ایونٹس میں آپ کے مین پلیئرز وہی ہیں جنہوں نے آئی سی سی کے پچھلے ایونٹس کھیلے ہیں؟ کیا یہ پہلی بار کھیل رہے تھے؟ کیا یہ جو ہوا ہے پہلی بار ہورہا تھا؟
نجیب الحسنین کا کہنا تھا کہ آپ اپنے نام نہاد سپر اسٹارز کو کیوں ڈیفینڈ کررہے ہیں؟ انہوں نے کہا کہ ہر کوئی یہی کہہ رہا ہے کہ ہم نے ٹیم ہی غلط پک کی ہے، انہوں نے کہا کہ آپ انڈیا سے ہار کے باہر نہیں ہوئے ہیں، آپ کی جب سلیکشن ہوئی تھی، آپ تبھی باہر ہوگئے تھے۔
نجیب الحسنین نے کہا کہ آپ کہہ رہے ہیں کہ ہم نے سعود کو اس لئے لیا کہ وہ ان کنڈیشنز میں اسپن اچھی کھیلتا ہے، تو آپ نے اسپنر کیوں نہیں لئے؟ سفیان مقیم کہا ہے؟ اگر یہ بیسٹ آپشن ہے تو سفیان مقیم کو کیوں نہیں لے کر گئے۔
سفیان کو ٹرائی سیریز میں بھی نہیں لیا گیا، کس نے یہ مشورہ دیا تھا، اگر وہ ٹرائی سیریز میں ہوتا تو جج ہوجاتا اور پھر ٹیم میں آجاتا، آپشن آپ نے اپنے خود ختم کئے ہیں، سفیان کی خاطر کسی کو بھی ڈراپ کیا جاسکتا تھا۔
انٹرنیشنل کرکٹ کونسل (آئی سی سی) نے پاکستان کرکٹ ٹیم کا نیا پرومو اپنے سوشل میڈیا پلیٹ فارم پر جاری کردیا۔
آئی سی سی چیمپئنز ٹرافی کے آغاز میں بہت کم وقت رہ گیا ہے۔ ٹورنامنٹ کا افتتاحی میچ 19 فروری کو کراچی کے نیشنل اسٹیڈیم میں دفاعی چیمپئن پاکستان اور نیوزی لینڈ کے درمیان کھیلا جائے گا۔
انٹرنیشنل کرکٹ کونسل (آئی سی سی) کی جانب سے جاری کئے گئے نئے پرومو میں پاکستانی کرکٹرز نے چیمپئنز ٹرافی کی نئی کٹ زیب تن کر رکھی ہے۔
قومی کرکٹ ٹیم کے جارح مزاج اوپننگ بیٹر فخر زمان، سلمان علی آغا، کپتان محمدرضوان پرومو ویڈیو میں انٹری دیتے نظر آرہے ہیں۔
قومی ٹیم کے فاسٹ بالر شاہین آفریدی، نسیم شاہ اور بابراعظم ویڈیو پرومو میں اپنے اپنے انداز میں سیلیبریشن کرتے نظر آئے جبکہ عثمان خان ویڈیو پرومو میں پاکستانی پرچم کوخراج عقیدت پیش کررہے ہیں۔
واضح رہے کہ گزشتہ ماہ انٹرنیشنل کرکٹ کونسل (آئی سی سی) نے چیمپئنز ٹرافی کا آفیشل پرومو جاری کیا تھا، اس پرومو میں شریک تمام ممالک کے کھلاڑی شامل ہیں تاہم پاکستانی کرکٹرز نمایاں ہیں۔
اس پرومو میں مشہور بالی ووڈ فلم سیریز مشن امپوسیبل کا اسٹائل اپناتے ہوئے کھلاڑیوں کو عمارت کی چھت سے ٹرافی کی طرف بڑھتے اور اسے حاصل کرنے کی جدوجہد کرتے دکھایا گیا گیا ہے۔
اس پرومو میں پاکستانی کرکٹرز شاہین شاہ آفریدی، شاداب خان، بھارت کے ہاردیک پانڈیا، انگلینڈ کے فل سالٹ اور افغانستان کے محمد نبی نمایاں ہیں۔
آئی سی سی نے کوڈ آف کنڈکٹ کی خلاف ورزی کرنے پر 3 پاکستانی کھلاڑیوں پر جرمانہ عائد کردیا ہے۔
رپورٹس کے مطابق آئی سی سی نے کوڈ آف کنڈکٹ کی خلاف ورزی کرنے پر قومی ٹیم کے فاسٹ بولر شاہین آفریدی، سعودشکیل اور کامران غلام پرجرمانہ عائد کیا ہے۔
جنوبی افریقہ کیخلاف میچ میں تینوں کھلاڑی ضابطہ اخلاق کی خلاف ورزی کے مرتکب ہوئے، شاہین آفریدی پرمیچ فیس کا 25، کامران غلام اور سعودی شکیل پر میچ فیس کا 10 فیصدجرمانہ عائدکیا گیا ہے۔
واضح رہے کہ گزشتہ روز پاکستان اور جنوبی افریقا کے درمیان ون ڈے میچ کے دوران فاسٹ بولر شاہین آفریدی اور میتھیو بریٹزی میں گرما گرمی ہوگئی تھی، جس کی ویڈیو سوشل میڈیا پر وائرل ہوگئی تھی۔
شاہین آفریدی نے میتھیو کو ڈاٹ بال کروائی، میتھیو نے بیٹ دکھایا جس پر شاہین نے جملے کسے۔
شاہین کی اگلی گیند پر میتھیو نے رن لینے کے دوران شاہین کو ٹکر ماری پھر دونوں ایک دوسرے کی طرف بڑھے تو کھلاڑیوں اور امپائر نے بیچ بچاؤ کروایا۔
اس کے بعد ٹیمبا باوما کے رن آؤٹ ہونے کے بعد سعود شکیل کی جانب سے پرجوش انداز منایا۔
باوما نے بیک ورڈ پوائنٹ پر لینتھ ڈیلیوری کھیلی اور فوری سنگل لینے کی کوشش کی لیکن ساتھی کھلاڑی نے ہچکچاہٹ کا مظاہرہ کیا اور باوما پچ کے بیچ میں پھنس گئے، بیک ورڈ پوائنٹ پر موجود سعود شکیل نے گیند کو اسٹمپ کی طرف تھرو کیا اور تھرڈ امپائر نے انہیں رن آؤٹ قرار دیا۔
سعود شکیل کو خاص جارحانہ انداز میں جشن مناتے ہوئے چیخے اور جنوبی افریقی کپتان کو گھورتے ہوئے دیکھا گیا۔
