Tag: آئی سی سی مینز

امریکہ میں کرکٹ کے فروغ  کیلے سرگرم کردار ادا کرنے والے پاکستانی امریکی بزنس ٹائیکون تنویر احمد بھی امریکی ٹیم سے پاکستان کی شکست پر برس پڑے۔

تفصیلات کے مطابق ڈیلاس میں کھیلے گئے آئی سی سی مینز ٹی ٹوئنٹی ورلڈکپ میں امریکا نے پاکستان کو سپر اوور میں شکست دے کر بڑا اپ سیٹ کردیا اور ایونٹ میں مسلسل دوسری کامیابی حاصل کرلی۔

امریکا نے سپر اوور میں پاکستان کو جیت کیلئے 19 رنز کا ہدف دیا، قومی ٹیم صرف 13 رنز بناسکی، ڈیلس میں گروپ اے کے کھیلے گئے میچ میں امریکا کے کپتان مونانک پٹیل نے ٹاس جیت کر پاکستان کو پہلے بیٹنگ کی دعوت دی تھی۔

پاکستان نے مقررہ 20 اوورز میں 7 وکٹوں کے نقصان پر 159 رنز بنائے تھے، کپتان بابر اعظم 44 اور شاداب 40 رنز کے ساتھ نمایاں رہے تھے۔

امریکا کو میچ جیتنے کے لیے آخری گیند پر 5 رنز درکار تھے، امریکی بیٹر نتیش کمار نے حارث رؤف کو چوکا مارا اور میچ برابر ہوگیا جس کے بعد سپر اوور کھیلا گیا۔

پاکستان کی شکست پر امریکا میں کرکٹ کے فروغ کیلے سرگرم کردار ادا کرنے والے پاکستانی امریکی بزنس ٹائیکون تنویر احمد نے پاکستانی کرکٹ ٹیم کی امریکی کرکٹ ٹیم کے ہاتھوں شکست کو ٹیم مینجمنٹ اور پاکستان کرکٹ بورڈ کیلے سبق قرار دیا ہے۔

ٹیکساس کے شہر ڈیلاس میں میچ کے بعد گفتگو کرتے ہوئے ان کا کہنا تھا کہ انہوں نے پی سی بی کو مشورہ دیا تھا کہ پاکستانی ٹیم کو ورلڈ کپ سے 15 روز پہلے ٹیکساس بھیج دیں، پریکٹس کیلئے گراونڈ کی سہولت ہم فراہم کریں گے۔