ARYNews.tv | Urdu – Har Lamha Bakhabar

Tag: آئی فون 16

  • آئی فون 16 کی فروخت پر پابندی عائد

    آئی فون 16 کی فروخت پر پابندی عائد

    ایپل آئی فون 16 کی فروخت پر انڈونیشیا میں پابندی عائد کردی گئی، مقامی قوانین کی خلاف ورزی کی وجہ سے کمپنی کے خلاف ایکشن لیا گیا۔

    انڈونیشا کے وزارت صنعت نے اپنے بیان میں کہا کہ بڑی ٹیکالوجیکل کمپنی ایپل کو انڈونیشیا میں اپنے آئی فون 16 اسمارٹ فونز فروخت کرنے کی اجازت نہیں ہوگی کیونکہ کمپنی نے مقامی طور پر بنائے گئے اجزا کے استعمال سے متعلق ملک کے قوانین کی پابندی نہیں کی۔

    وزارت کے ترجمان فیبری ہینڈری انتونی نے کہا کہ انڈونیشیا میں مقامی طور پر فروخت ہونے والے کچھ اسمارٹ فونز میں مقامی طور پر تیار کردہ کم از کم 40 فیصد پرزوں کو شامل ہونے چاہیئں اور آئی فون 16 نے اس عمل کی خلاف ورزی کی ہے۔

    انھوں نے کہا کہ درآمد شدہ آئی فون 16 ہارڈویئرز کی ملک میں مارکیٹنگ نہیں کی جا سکتی، کیونکہ ایپل انڈونیشیا نے مقامی کانٹینٹ سرٹیفیکیشن حاصل کرنے کے لیے اپنی سرمایہ کاری کے وعدے کو پورا نہیں کیا۔

    فیبری ہینڈری انتونی نے مزید کہا کہ صارفین ذاتی استعمال کے لیے اب بھی بیرون ملک سے آئی فون خرید کر لاسکتے ہیں بشرط کے انھوں نے ضروری ٹیکس ادا کیے ہوں۔

    ایپل نے فوری طور پر اس معاملے پر کسی قسم کا تبصرہ نہیں کیا ہے، کمپنی کی جانب سے آئی فون 16 فون پہلی بار ستمبر میں لانچ کیا گیا تھا۔

  • بھارت میں آئی فون 16 سیریز کی فروخت شروع، قیمت کیا ہے؟

    بھارت میں آئی فون 16 سیریز کی فروخت شروع، قیمت کیا ہے؟

    ممبئی: آج سے بھارت میں بھی معروف ٹیکنالوجی کمپنی ایپل نے اپنی نئی آئی فون 16 سیریز کی فروخت کا آغاز کردیا ہے۔

    غیر ملکی ذرائع ابلاغ کے مطابق یہ سیریز 9 ستمبر 2024 کو کمپنی کے سالانہ ایونٹ ’اِٹس گلو ٹائم‘ میں مصنوعی ذہانت (اے آئی) کی خصوصیات کے ساتھ متعارف کروائی گئی تھی۔

    فروخت کے آغاز سے قبل ہی ممبئی کے بی کے سی (باندرا کرلا کمپلیکس) میں واقع اسٹور پر خریداروں ہجوم اُمڈ آیا تھا اور کئی لوگ اسٹور کے کھلنے کا بے چینی سے انتظار کر رہے تھے جبکہ ملک کے دیگر شہروں میں بھی لوگ آئی فون 16 خریدنے کے لئے کوششوں میں مصروف ہیں۔

    بھارتی میڈیا رپورٹس کے مطابق ایک صارف کا کہنا تھا کہ گزشتہ 21 گھنٹوں سے قطار میں کھڑا ہوں۔ میں کل صبح 11 بجے یہاں پہنچا تھا اور آج صبح 8 بجے اسٹور میں داخل ہونے والا پہلا شخص ہوں گا۔ میں اس فون کے لیے بہت پرجوش ہوں اور اس کے لیے ممبئی کا ماحول بھی بالکل نیا ہے۔

    بھارت میں آئی فون 16 اور آئی فون 16 پلس کو پانچ رنگوں الٹرامرین، ٹیل، پنک، سفید اور سیاہ میں صارفین کے لئے پیش کیا گیا ہے۔

    ان ماڈلز میں 128GB ،256GB، اور 512GB اسٹوریج کے اختیارات موجود ہیں۔ آئی فون 16 کی ابتدائی قیمت 79,900 روپے اور آئی فون 16 پلس کی ابتدائی قیمت 89,900 روپے رکھی گئی ہے۔

    آئی فون 16 پرو میکس (256GB) کی قیمت 1,44,900 روپے ہے جبکہ آئی فون 16 پرو (128GB) کی ابتدائی قیمت 1,19,900 روپے ہے۔

    دبئی میں پہلے فضائی ٹیکسی اسٹیشن کی تعمیر کے منصوبے پر کام کا آغاز

    خصوصیات کی اگر بات کی جائے تو اس میں کیمرہ کیپچر بٹن دیا گیا ہے جس کی مدد سے صارف ایک کلک میں کیمرہ کو کھول سکتے ہیں اور تصاویر لے سکتے ہیں۔ اس کے علاوہ آئی فون 16 میں 6.1 انچ اور آئی فون 16 پلس میں 6.7 انچ کا ڈسپلے دیا گیا ہے، جس کی برائٹنس 2000 نٹس تک ہے۔

  • آئی فون 16 کی لانچنگ کی تاریخ کا اعلان کردیا گیا

    آئی فون 16 کی لانچنگ کی تاریخ کا اعلان کردیا گیا

    کیلیفورنیا : امریکی ٹیکنالوجی کمپنی ’ایپل‘ نے نئی آئی فون ڈیوائسز اور ایپل واچ کے نئے ماڈلز کی تقریب رونمائی کا اعلان کردیا ہے۔

    کمپنی کی جانب سے نئی جنریشن کی فلیگ شپ ڈیوائس کی رونمائی کیلیفورنیا میں قائم ہیڈ کوارٹرز میں 9 ستمبر کو منعقد ہونے والی ایک تقریب میں کرنے کی تصدیق کی گئی ہے۔

    ایپل کی ویب سائٹ پر جاری پیغام کے مطابق رواں برس ’ایپل ایونٹ‘ 9 ستمبر کو امریکی وقت کے مطابق صبح 10 بجے منعقد ہوگا۔ پاکستانی وقت کے مطابق یہ تقریب رات 10 بجے شروع ہوگی۔

    ایپل پارک میں منعقد ہونے والی یہ براہ راست تقریب ایپل کی ویب سائٹ، ایپل ٹی وی اور ایپل کے یوٹیوب چینل پر دیکھی جا سکے گی۔

    Iphone 16

    اس سے قبل یہ خبر سامنے آئی تھی کہ ایپل 10 ستمبر کو اپنے ایونٹ کا اعلان کرے گا، اور یہ کہنا غلط نہیں ہوگا کہ ایپل نے ایک دن پہلے کا اعلان کر کے کافی ٹیک ایکسپرٹس کو ’سرپرائز‘ دیا ہے۔

    9 ستمبر کو ہونے والی تقریب میں آئی فون 16، آئی فون 16 پلس، آئی فون 16 پرو اور آئی فون 16 پرو میکس متعارف کرائے جائیں گے اور ان سب کی خاس بات یہ ہے کہ ان ڈیوائسز کے ڈسپلے پہلے سے زیادہ بڑے ہوں گے۔

    آئی فون 16 میں 6.1 انچ، آئی فون 16 پلس میں 6.7 انچ، آئی فون 16 پرو میں 6.3 انچ جبکہ آئی فون 16 پرو میکس میں 6.9 انچ کا ڈسپلے دیا جائے گا۔

    Apple iPhone

    اس کے علاوہ ان ڈیوائسز میں نیا ڈیزائن کردہ کیمرا بمپ اور ایک نئے رنگ کا اضافہ کیا گیا ہے۔ اس سال کے ایپل ورژن کو iOS 18 کہا جارہا ہے جس میں ایپل انٹیلی جنس یا آرٹی فیشل انٹیلی جنس (اے آئی) فیچرز کا اعلان بھی کیا جائے گا۔ تاہم یہ فیچرز ڈیوائسز کی رونمائی کے کچھ عرصہ بعد لانچ کیے جائیں گے۔

    دیگر فون ساز حریفوں کے برعکس ایپل اپنے فون میں پیش کیے جانے فیچرز کی معلومات خفیہ رکھتا ہے۔

    عموماً نئے آئی فونز میں تیز رفتار چپس اور بہتر کیمرہ سمیت کئی چیزیں شامل ہوتی ہیں لیکن بلومبرگ کی فنانشل وائر کے مطابق آئی فون 16 کے ڈیزائن میں کوئی بنیادی تبدیلی نہیں کی جارہی۔

  • آئی فون 16 موبائل فونز کی دنیا میں کیا انقلاب لانے آ رہا ہے؟

    آئی فون 16 موبائل فونز کی دنیا میں کیا انقلاب لانے آ رہا ہے؟

    ایپل کے نئے آنے والے آئی فون کے بارے میں لیکس کا سلسلہ جاری ہے جس کو متوقع طور پر آئی فون 16 کہا جائے گا۔

    نئے اور جدید فون استعمال کرنے کا شوق رکھنے والوں کو صبر کا مظاہرہ کرتے ہوئے تھوڑا انتظار کرنا پڑے گا کیونکہ نئے اور زبردست فیچر کے ساتھ آئی فون 16 رواں سال ماہ ستمبر میں مارکیٹ میں دستیاب ہوگا۔

    غیر ملکی خبر رساں ادارے کی رپورٹ کے مطابق آئی فون 16 میں کیپچر بٹن کے اضافے کو خوش آئند قرار دیا جارہا ہے جو فوٹوز اور ویڈیوز بنانے کے شوقین افراد کیلئے یقیناً خوشی اور اطمینان کا باعث ہوگا۔

    اس نئے کیپچر بٹن کو موبائل فون کے دائیں جانب ایک خاص حکمت عملی کے تحتنصب کیا گیا ہے تاکہ صارفین کے لیے فوٹو گرافی اور ویڈیو گرافی کے تجربے کو کامیاب بنایا جاسکے۔

    اس بٹن کی بدولت اب صارفین کو مکمل شاٹ لینے کے لیے اسکرین پر لگاتار ٹیپ کرنے کی ضرورت نہیں ہوگی بلکہ صارف کیپچر بٹن کے ایک کلک کی مدد سے باآسانی تصاویر بنانے اور ویڈیوز ریکارڈ کرسکیں گے۔

    اس کے علاوہ ایپل اپنے موجودہ ’ایکشن بٹن‘کی فعالیت کو بڑھانے کے لیے بھی کام کررہی ہے۔ یہ بٹن ڈیوائس کے بائیں کنارے پر والیوم کنٹرول کے اوپر نصب ہے۔

    ذرائع کے مطابق کیپچر بٹن کو آئی فون 16 کے کنارے پر پاور بٹن کے قریب اس لیے بنایا گیا ہے تاکہ صارف کا کیمرا پر کنٹرول بہتر ہوسکے۔ اس کے علاوہ کیپچر بٹن کے ذریعے تصویر اور ویڈیو بنانے کے لیے فوکس اور زوم لیول کو ایڈجسٹ کرنے میں بھی مدد ملے گی۔

  • آئی فون 16 میں کون سے نئے ڈیزائن متعارف کیے جائیں گے؟

    آئی فون 16 میں کون سے نئے ڈیزائن متعارف کیے جائیں گے؟

    معروف امریکی کمپنی ایپل کے آئی فون 16 کے نئے ماڈل متعارف کرانے میں کم از کم نو ماہ کا عرصہ باقی ہے  تاہم اس حوالے سے کچھ معلومات زیرگردش ہیں کہ یہ ماڈلز دیکھنے میں کیسے ہوں گے؟ 

    اطلاعات کے مطابق ایپل کے نئے آئی فونز تو آئندہ سال ستمبر میں متعارف کرائے جائیں گے تاہم ابھی یہ واضح نہیں ہوا کہ آئی فون 16 سیریز کے ماڈلز دیکھنے میں کیسے ہوں گے؟۔

    ملنے والی تازہ معلومات کے مطابق آئی فون 16 بڑی تبدیلیاں لائے گا، جس میں ایپل کو آئی فون 16 پرو کے سائز کو 6.3 انچ تک اور آئی فون 16پرو کے سائز کو 6.9 انچ تک بڑھانے کی توقع ہے، سائز کی تبدیلیاں صرف آئی فون 16 پرو ماڈلز تک محدود ہوں گی، تاہم آئی فون 16 ماڈلز کا سائز آئی فون 15 ماڈلز جیسا ہی رہے گا۔

    iPhone 16

    اس حوالے سے میک ریومرز کی رپورٹ میں آئی فون 16 کے ممکنہ ڈیزائن کے پروٹو ٹائپ خاکے جاری کیے گئے ہیں جس میں بتایا گیا کہ اگلے سال کے بیسک آئی فون ماڈل کے لیے ایپل کی جانب سے بیک ڈیزائن اور بٹنوں میں تبدیلیاں کیے جانے کا امکان ہے۔

    اس کے لیے کمپنی کی جانب سے 3 ڈیزائنز پر غور کیا جا رہا ہے جن کے خاکے رپورٹ میں جاری کیے گئے ہیں۔

    سبزی مائل پیلے رنگ کے پہلے ڈیزائن میں بیک پر آئی فون ایکس جیسا کیمرا سیٹ اپ نظر آرہا ہے۔

    گلابی اور سیاہ رنگ کے ڈیزائنز میں کیمرا سیٹ اپ دیکھنے میں ایک جیسا ہی لگ رہا ہے، مگر تینوں ڈیزائنز میں والیوم کنٹرولز کے ساتھ ساتھ ایکشن بٹن کا اضافہ بھی نظر آرہا ہے۔

    آئی فون

    خیال رہے کہ آئی فون 15 سیریز میں ایکشن بٹن صرف پرو ماڈلز میں دیا گیا تھا مگر اگلے سال یہ تمام ڈیوائسز کا حصہ بن سکتا ہے۔

    سیاہ رنگ کے ڈیزائن میں ایک نیا کیپچر بٹن بھی پاور بٹن کے نیچے نظر آ رہا ہے۔ یہ نیا بٹن ممکنہ طور پر کیمرے کے لیے استعمال ہوگا۔

    Header

    آئی فون 16 سیریز کے چاروں ماڈلز میں ایپل کے اے 18 پراسیسر کو دیے جانے کا امکان ہے جبکہ آئی او ایس 18 بھی اس کا حصہ ہوگا۔ البتہ اس سیریز کے فونز میں بڑی ہارڈ وئیر تبدیلیاں کیے جانے کا امکان نہیں۔