کراچی: گورنر سندھ نے اعلان کیا ہے کہ آئی ٹی طلبہ کو آرٹیفیشل انٹیلیجنس کورسز کرا کر امریکا بھیجیں گے۔
جدید ٹیکنالوجی کی جانب اہم قدم کے طور پر گورنر سندھ کامران ٹیسوری نے نوجوانوں کے تاب ناک مستقبل کے لیے بڑی خوش خبری سنا دی، اب لاکھوں ڈالر کمانا خواب نہیں رہا۔
گورنر سندھ کامران ٹیسوری کہتے ہیں آنے والے دنوں میں آئی ٹی طلبہ امریکا میں نوکریاں کر کے ملک کے لیے زرمبادلہ بھیجیں گے، امریکی کمپنی سائبر رینج سلوشن سے آئی ٹی انیشیٹیو کے تحت معاہدہ طے ہو گیا۔
نوجوانوں کو صحت، تعلیم، سائبر سیکیورٹی سمیت مختلف شعبوں میں آرٹیفیشل انٹیلیجنس کے کورسز کرا کر ملازمتوں کے لیے امریکا بھیجا جائے گا، جہاں وہ 90 ہزار سے ڈیڑھ لاکھ ڈالر کما سکیں گے۔
گورنر سندھ نے کہا کہ اب نوجوانوں کو ہتھیار نہیں قلم دینا ہے، مافیا کو لگام ڈالنی ہے، لاوارث شہر کا وارث بنانا ہے، انھوں نے کہا ملک اپنی اڑان اڑنا شروع ہو گیا ہے، کراچی کے نوجوانوں کو بااختیار بنانے کا 3 سال پہلے دیکھا جانے والا خواب اب پورا ہونے جا رہا ہے، اب کراچی کا نوجوان امریکا میں بیٹھ کر پاکستان کے لیے اربوں ڈالر زرمبادلہ بھیجے گا۔
