Tag: آرمی چیف کی شرکت

پشاور : خیبر پختونخوا کی اپیکس کمیٹی کا اجلاس پشاور میں منعقد ہوا، اجلاس میں افغان مہاجرین کی واپسی، صوبے میں امن و امان اور سیکیورٹی کی صورت حال اور آپریشن ردالفساد کے حوالے سے غور خوض کیا گیا۔

تفصیلات کے مطابق پشاور میں خیبرپختونخوا کی خصوصی ایپکس کمیٹی کے اجلاس میں دہشت گردی اور عسکریت پسندی کو جڑ سے اکھاڑنے کے لیے کوششیں جاری رکھنے کا عزم کیا گیا،افغان مہاجرین کی واپسی، بارڈرمنیجمنٹ کے معاملات پرغور کیا گیا۔

اجلاس میں آرمی چیف جنرل قمر جاوید باجوہ نے خصوصی شرکت کی۔ اس کے علاوہ گورنر اور وزیراعلیٰ خیبر پختونخوا، کور کمانڈر پشاور سمیت دیگر اعلیٰ حکام بھی موجود تھے۔

پاک فوج کے شعبہ تعلقات عامہ (آئی ایس پی آر ) کے مطابق اجلاس میں نیشنل ایکشن پلان پرمؤثرعمل درآمد یقینی بنانے کا فیصلہ کیا گیا۔

آپریشن ردالفساد کے تحت سیکیورٹی صورتحال اور کارکردگی کے حوالے سے شرکاء کا کہنا تھا کہ فوج،انٹیلی جنس اور سیکیورٹی اداروں کی کوششیں قابل تحسین ہیں۔

اس موقع پر شدت پسندی کے خاتمے کے لیے مشترکہ کوششیں جاری رکھنے پر اتفاق کیا گیا۔ اجلاس میں شرکاء کو بریفنگ دیتے ہوئے بتایا گیا کہ 89 فیصد آئی ڈی پیز اپنے علاقوں کو واپس جا چکے ہیں۔