Tag: آرمی چیف

لندن: وزیر اعظم شہباز شریف کا کہنا ہے کہ سوشل میڈیا پر افواج پاکستان، آرمی چیف جنرل عاصم منیر اور ان کی فیملی کے خلاف غلیظ زبان استعمال کی جا رہی ہے۔

پریس کانفرنس کرتے ہوئے وزیر اعظم شہباز شریف نے کہا کہ غزہ میں انسانیت سوز مظالم ڈھائے جا رہے ہیں، میں نے فلسطین میں فوری جنگ بندی کا مطالبہ کیا، فلسطین کی آزاد ریاست کا فی الفور قیام ضروری ہے اور فلسطینیوں کو اقوام متحدہ کی نمائندگی ملنی چاہیے۔

بیروت میں اسرائیلی حملوں پر شہباز شریف نے کہا کہ لبنان میں ہونے والے واقعات کی بھرپور مذمت کی۔ انہوں نے کہا کہ میں نے اقوام متحدہ میں برہان وانی کا نام لیا اور مطالبہ کیا کہ کشمیریوں کو حق خودارادیت دیا جائے۔

شہباز شریف نے مزید کہا کہ پاکستان کو ڈیفالٹ کے دہانے پر سے بچا کر واپس لائے، آئی ایم ایف نمائندے نے لکھا کہ پاکستان ترقی کی راہ پر گامزن ہے جبکہ بدترین مہنگائی کا بوجھ کم ہو رہا ہے، ہم معاشی ترقی کی طرف بڑھ رہے ہیں۔

انہوں نے کہا کہ ٹیکس بیس بڑھانا ہوگا عام آدمی 70 سال سے قربانیاں دے رہا ہے، معیشت کیلیے اشرافیہ کے قربانی دینے کا وقت ہے۔

ان کا کہنا تھا کہ سعودی عرب، متحدہ عرب امارات اور چین کی مدد کے بغیر آئی ایم ایف قرض پروگرام نہ ملتا، آرمی چیف جنرل عاصم منیر نے معاشی ترقی کیلیے ذاتی کوششیں کیں اور انہوں نے برادر ملک کا دورہ کر کے آئی ایم ایف قرض پروگرام سے متعلق بات کی۔

وزیر اعظم نے کہا کہ امید ہے یہ آئی ایم ایف کا آخری پروگرام ہوگا لیکن سیاسی استحکام کے بغیر معاشی استحکام نہیں آ سکتا، 9 مئی ناقابل معافی جرم ہے، گزشتہ حکومت نے چین کے ساتھ تعلقات تباہ کرنے میں کوئی کسر نہیں چھوڑی اور مجھ پر الزام لگایا گیا کہ چین کے ساتھ معاہدے میں 45 فیصد کمیشن لیا لیکن برطانوی این سی اے نے 2 سال چھان بین کے بعد کلین چٹ دی۔

شہباز شریف نے کہا کہ کون وزیر تھا جس نے پارلیمنٹ میں کہا کہ پی آئی اے پائلٹس کے لائسنس جعلی ہیں۔ انہوں نے یہ بھی بتایا کہ پی آئی اے کی نجکاری شفاف طریقے سے کریں گے۔

راولپنڈی: آرمی چیف جنرل عاصم منیر کا کہنا ہے کہ عزم استحکام نیشنل ایکشن پلان کی کڑی ہے، بے یقینی اور مایوسی پھیلانے والے عوامل کو ہم آہنگی کے ساتھ شکست دیں گے۔

جی ایچ کیو میں یومِ دفاع و شہدا کی مرکزی تقریب میں آرمی چیف جنرل عاصم منیر وطن عظیم کے بہادر شہدا اور غازیوں کو خراج تحسین پیش کیا۔

آرمی چیف نے کہا کہ دہشتگردی کے خلاف جنگ میں قربانیوں کا سلسلہ آج بھی جاری ہے اور یہ سلسلہ دہشتگردوں کے خاتمے تک جاری رہے گا، افواجِ پاکستان، قانون نافذ کرنے والے اداروں اور غیور عوام نے بے مثال قربانیاں دیں، خیبر پختونخوا اور بلوچستان کے بہادر لوگوں نے بالخصوص بے مثال قربانیاں دیں۔

اس موقع پر آرمی چیف نے شہدا کو خراجِ تحسین پیش کرتے ہوئے سورۃ آل عمران کی آیت 169 کا حوالہ دیا کہ جو لوگ اللہ کی راہ میں شہید ہوں ہرگز انہیں مردہ نہ سمجھو وہ زندہ اپنے رب کے پاس رزق پاتے ہیں۔

سپہ سالار نے کہا کہ فتنہ الخوارج کے خلاف متحد آواز، پیغام پاکستان اور مغربی سرحدوں کا باضابطہ انتظام کامیابیاں ہیں، قبائلی علاقہ جات کی صوبے میں شمولیت فتنہ الخواج کے خلاف کامیابیاں ہیں، خیبر پختونخوا اور بلوچستان میں معاشی و سماجی ترقی کے اقدامات کامیابیاں ہیں، یہ کامیابیاں ریاست پاکستان کے عزم اور شہدا اور غازیوں کی قربانی کا ثمر ہیں، افواج اور عوام کا رشتہ اور دل کا رشتہ ہے جو پاکستان کے دشمنوں کی شکست کا ضامن ہے۔

جنرل عاصم منیر نے کہا کہ قومی یکجہتی کو کمزور کرنے کے مذموم مقاصد کبھی کامیاب نہیں ہوں گے، غیر ملکی شہ پر فساد فی الارض برپا کرنے والوں پر آئندہ بھی زمین تنگ رہے گی، افواج اور عوام سالمیت کا دفاع جانتے ہیں اور مذموم ارادوں کو کامیاب نہیں ہونے دیں گے، پاکستان کے روشن مستقبل پر کامل یقین پاکستانیت کا ناگزیر حصہ ہے۔

انہوں نے اپنے خطاب میں اتحاد اور یگانگت کی صفات اپنانے پر زور دیتے ہوئے کہا کہ معاشرتی و سماجی معاملات میں اخوت، ہم آہنگی، برداشت اور بردباری کا مظاہرہ کریں، مذہبی عدم برداشت سے بالاتر رہ کر آئین کے مطابق اقلیتوں کے حقوق کا تحفظ کریں، سیاسی نقطہ نظر میں اختلاف کو نفرتوں میں نہ ڈھلنے دیں۔

آرمی چیف نے کشمیری عوام کی جدوجہد آزادی کو سلام کرتے ہوئے کہا کہ بھارت کے ناجائز زیر قبضہ جموں و کشمیر نہ صرف ملکی بلکہ خطے اور عالمی سطح کا مسئلہ ہے، جنوبی ایشیا میں پائیدار امن کا قیام مسئلہ کشمیر کے حل میں ہے، پاکستانی قوم مقبوضہ کشمیر کے شہدا کو خراجِ عقیدت پیش کرتی ہے۔

ان کا کہنا تھا کہ فلسطین کا تنازع دنیا کیلیے انتہائی قابل فکر سوالیہ نشان ہے، اسرائیلی جارحیت اور فلسطینیوں کا استحصال انسانیت اور عالمی قوانین کی خلاف ورزی ہے، سفارتی سطح پر پاکستان غزہ میں فوری جنگ بندی اور فلسطینیوں پر بربریت کی روک تھام کیلیے سرگرم عمل رہے گا۔

رسالپور: آرمی چیف جنرل سید عاصم منیر کا کہنا ہے کہ ہم آئینی حدود جانتے ہیں دوسروں سے بھی آئین کی پاسداری کومقدم رکھنےکی توقع رکھتےہیں۔

تفصیلات کے مطابق آرمی چیف جنرل سید عاصم منیر نشان امتیاز(ملٹری) نے پاکستان ائیر فورس کی پاسنگ آؤٹ پریڈ سے خطاب کرتے ہوئے آپ ہماری امیدوں کا مرکز اور آسمانوں کے محافظ اور علاقائی یکجہتی کے ضامن ہیں، توقع ہے آپ کردار،ہمت اورقابلیت کی خوبیوں سے مُزیّن زندگی گزاریں گے۔

آرمی چیف کا کہنا تھا کہ آپ کا طرز عمل نہ صرف ذاتی اخلاقیات بلکہ قابل احترام ادارےکیلئےبھی غیر معمولی ہوگا، آپ مادر وطن کےدفاع،عزت و وقار کیلئےقربانی دینے سے کبھی دریغ نہیں کریں گے، توقع ہے آپ بہترین پیشہ ورانہ مہارت اور بہادری کی لازوال روایت قائم رکھیں گے۔

جنرل سید عاصم منیر نے کہا کہ آرٹیکل 19میں واضح طور پر آزادی اظہار اور اظہار رائے کی حدود متعین کی گئی ہیں، آئین میں دی گئی آزادی رائے پرعائدقیود کی برملا پامالی کرنیوالےدوسروں پرانگلیاں نہیں اٹھاسکتے، ہم آئینی حدود جانتے ہیں دوسروں سے بھی آئین کی پاسداری کومقدم رکھنےکی توقع رکھتےہیں۔

ان کا کہنا تھا کہ اسلحے کی دوڑ سے ہمارےخطےمیں طاقت کاتوازن بھی بگڑنےکاامکان ہے، جدیدٹیکنالوجیز فضائی طاقت کے استعمال کو تبدیل کرنے کے ساتھ دائرہ کار کووسعت دے رہی ہیں۔

چیف آف آرمی اسٹاف نے مزید کہا کہ ایک مضبوط فضائیہ کے بغیر ملک کسی بھی جارح کےرحم و کرم پر ہوتاہے، پاک فضائیہ ہمیشہ قوم کی توقعات پر پورا اتری ہے، پاک فضائیہ نےبہادری،پیشہ ورانہ مہارت سےمشکلات میں فضائی حدودکی نگرانی کی، جس کی بڑی مثال فروری 2019 ہم سب کے سامنے ہے۔

غزہ کی صورتحال کے حوالے ان کا کہنا تھا کہ غزہ جنگ اس بات کی تازہ مثال ہےکہ جنگیں کیاکیا مصائب سامنے لاسکتی ہیں، غزہ میں بزرگوں، خواتین،بچوں کا اندھادھند قتل اس بات کا ثبوت ہے کہ دنیا میں تشددبڑھ رہا ہے۔

مقبوضہ کشمیر سے متعلق جنرل سید عاصم منیر نے کہا کہ مقبوضہ کشمیر پر بھارت نے اپنا ناجائز قبضہ کررکھا ہے، کشمیر میں بھارتی جارحیت پر دنیا کی خاموشی وہاں گونجنے والی آزادی کی آوازدبا نہیں سکتی، ہم اپنے کشمیری بھائیوں کی اخلاقی، سیاسی ،سفارتی حمایت جاری رکھیں گے، ہمیشہ یاد رکھیں کہ حق طاقت ہے جبکہ باطل کبھی طاقتور نہیں ہوسکتا۔

ان کا مزید کہنا تھا کہ راشدمنہاس، سرفراز رفیقی،ایم ایم عالم جیسےبنیں جنہوں نےوطن کیلئےزندگیاں پیش کیں، آپ کوجوذمہ داری سونپی ہےاس کیلئےپرعزم اورریاست پاکستان کیساتھ وفاداررہیں۔