Tag: آرمی چیف

اسلام آباد: صدر مملکت آصف علی زرداری سے پاک فوج کے سربراہ جنرل سید عاصم منیر نے ملاقات کی۔

تفصیلات کے مطابق صدر مملکت آصف علی زرداری سے چیف آف آرمی اسٹاف جنرل سید عاصم منیر  نے ملاقات کی ہے، ملاقات میں پاکستان میں امن، سلامتی اور ترقی کی اقدار برقرار رکھنے کیلئے یکجہتی اور عزم کا بھی اظہار کیا گیا۔

ملاقات میں آرمی چیف نے آصف زرداری کو صدر اور مسلح افواج کے کمانڈر کا عہدہ سنبھالنے پر مبارکباد دی، چیف آف آرمی اسٹاف جنرل عاصم منیر نے صدرمملکت کی کامیاب مدت کیلئے نیک خواہشات کا اظہار کیا جبکہ دوسری جانب آرمی چیف نے صدر مملکت کو دہشت گردی کے خلاف جاری فوجی آپریشنز سے آگاہ کیا۔

آرمی چیف جنرل عاصم منیر نے ملاقات میں روایتی خطرات کیخلاف آپریشنل تیاریوں پر بھی روشنی ڈالی اور صدر مملکت کو بلوچستان، کے پی سمیت ترقیاتی منصوبوں میں فوج کے کردار سے بھی آگاہ کیا۔

صدر مملکت نے پاکستان کی مسلح افواج کے مثالی کردار کو سراہاتے ہوئے کہا کہ ریاست کی خودمختاری اور علاقائی سالمیت کے تحفظ میں فوج کی خدمات کلیدی حیثیت کی حامل رہی ہیں۔

صدر مملکت کا کہنا تھا کہ شہداء کا خون ہمیشہ پاکستانی قوم کی استقامت اور طاقت کی علامت رہے گا، صدر مملکت نے شہداء اور ان کے خاندانوں کی قربانیوں کو بھی خراج تحسین پیش کیا۔

صدر مملکت نے مخصوص جماعت، اسکے چند افراد کی ادارے اور قیادت کیخلاف بے بنیاد الزامات پر تشویش کا اظہار کیا، صدر مملکت نے رخنہ ڈالنے والے عناصر سے آہنی ہاتھوں سے نمٹنے کے عزم کا اظہار بھی کیا۔

اسلام آباد: آرمی چیف جرنل عاصم منیر نے کہا ہے کہ پاکستان، عوام اور ان کے مہمانوں پر بری نظر ڈالنے والے ہر دہشتگرد کے خاتمے تک لڑیں گے۔

تفصیلات کے مطابق داسو ہائیڈل پاور پراجیکٹ پر کام کرنے والے چینی شہریوں پر بشام میں دہشت گردوں کے حملے کے بعد وزیراعظم محمد شہباز شریف کی زیر صدارت ہنگامی اجلاس ہوا۔

اجلاس میں وفاقی وزراء، چیف آف آرمی اسٹاف، وزرائے اعلیٰ، متعلقہ صوبوں کے چیف سیکرٹریز اور انسپکٹر جنرلز آف پولیس نے شرکت کی۔

اجلاس میں ترقیاتی منصوبے پر کام کرنے والے معصوم شہریوں پر ہونے والے گھناؤنے حملے پر تبادلہ خیال کیا گیا، وزیر اعظم نے حملے کے بے گناہ متاثرین کے اہل خانہ سے دلی تعزیت کی۔

وزیراعظم نے کہا اس وحشیانہ فعل کے مرتکب افراد کو جلد انصاف کے کٹہرے میں لایا جائے گا، انہوں نے پاکستان اور چین کے عوام کے درمیان بھائی چارے کے پائیدار رشتے پر زور دیا اور کہا کہ پوری قوم چینی جانوں کے ضیاع پر غمزدہ ہے۔

وزیر اعظم شہباز شریف نے ریاست کے تمام وسائل کو بروئے کار لاتے ہوئے مکمل مشترکہ تحقیقات کرنے کی ہدایت کی، وزیراعظم نے کہا دہشت گردی ایک بین الاقوامی خطرہ ہے جسے پاکستان کے دشمنوں نے پاکستان کی ترقی اور ترقی کو روکنے کے لیے آلہ کار بنایا ہے۔

انہوں نے مزید کہا کہ پاک چین دوستی کو نشانہ بنانے والی کارروائیوں کا مقصد خاص طور پر دونوں آہنی بھائیوں کے درمیان بداعتمادی پیدا کرنا ہے۔

اجلاس کے شرکاء نے ملک سے دہشت گردی کے مکمل خاتمے کے عزم کا اظہار کیا شرکاء نے سرحدوں کے پار دہشت گردوں کے لیے دستیاب پناہ گاہوں پر شدید تحفظات کا اظہار کیا۔

اجلاس کے دوران آرمی چیف نے ملک سے دہشت گردی کی لعنت کے خاتمے کے لیے مسلح افواج کے عزم کا اعادہ کیا، آرمی چیف نے کہا قوم نے پچھلی دو دہائیوں سے ثابت قدمی سے دہشت گردی کے خلاف جنگ لڑی ہے پاکستان کے مخالفین کے مذموم عزائم کو ناکام بنایا ہے۔

آرمی چیف جنرل عاصم منیر نے کہا کہ پاکستان کے دشمنوں نے ایک بار پھر ریاست اور پاکستانی عوام کی لچک اور حوصلہ کو کم سمجھا ہے، ہم دہشت گردی سے اس وقت تک لڑیں گے جب تک پاکستان، اس کے عوام اور ان کے مہمانوں پر بری نظر ڈالنے والے ہر دہشت گرد کا خاتمہ نہیں ہو جاتا۔

انہوں نے کہا کہ ہم اس بات کو یقینی بنانے میں کوئی کسر نہیں چھوڑیں گے کہ پاکستان کی خوشحالی میں کردار ادا کرنے والا ہر غیر ملکی شہری خصوصاً چینی شہری پاکستان میں محفوظ رہے۔ ہم آخری دم تک دہشت گردی کا مقابلہ اپنی پوری طاقت سے کریں گے۔

اس کے علاوہ شرکاء نے ریاست کو دستیاب تمام وسائل کو بروئے کار لاتے ہوئے دہشت گردی سے جامع طور پر نمٹنے کے عزم کا اعادہ کیا۔

راولپنڈی : آرمی چیف جنرل سیدعاصم منیر نے رحیم یارخان میں شمشیر صحرا مشقوں کا مشاہدہ کیا اور کہا مسلح افواج کو دشمن کی کسی بھی مہم جوئی کے لیے ہمہ وقت تیار رہنا چاہیے۔

تفصیلات کے مطابق مسلح افواج کے شعبۂ تعلقاتِ عامہ (آئی ایس پی آر) کی جانب سے بیان میں کہا گیا ہے کہ آرمی چیف جنرل سید عاصم منیر نے رحیم یارخان کادورہ کیا ، فیلڈ ایریا پہنچنے پر کورکمانڈر کراچی اور انسپکٹر جنرل ٹریننگ اینڈایویلیوایشن نے آرمی چیف کا استقبال کیا۔

آئی ایس پی آر کا کہنا تھا کہ آرمی چیف جنرل سید عاصم منیر نے شمشیرصحرامشقوں کامشاہدہ کیا،ا مشقوں کامقصدجنگی ماحول میں پیشہ ورانہ صلاحیتوں میں بہتری لانا ہے۔

ترجمان نے بتایا کہ آرمی چیف جنرل سیدعاصم منیر نے مختلف جنگی مشقوں کامشاہدہ کیا ساتھ ہی آرمرڈانفنٹری مشینی دستوں، آرٹلری ، ایئر ڈیفنس اور اینٹی ٹینکس گائیڈڈمیزائل مشقیں دیکھیں۔

پاک فضائیہ کے لڑاکا طیاروں نے بھی مشقوں میں حصہ لیا، مشق میں الیکٹرانک وارفیئرکی صلاحیتوں اورمعلوماتی آپریشنز کو بھی شامل کیا گیا، الیکٹرانک وارفئیر کی مشق دشمن کی مواصلاتی صلاحیتوں،ڈس انفارمیشن مہم کودبانےکے لیے درکار تھی۔

آرمی چیف جنرل سید عاصم منیر نے مشق کے علاقے میں فوجیوں کے ساتھ پورا دن گزارا اور مشق میں شریک فوجیوں کے ساتھ بات چیت بھی کی۔

آرمی چیف نے تربیتی معیار،آپریشنل تیاریوں اورتمام رینک کے اعلیٰ حوصلےکی تعریف کرتے ہوئے کہا کہ مسلح افواج کو دشمن کی کسی بھی مہم جوئی کے لیے ہمہ وقت تیار رہنا چاہیے۔

جنرل سیدعاصم منیر نے واضح کیا کہ مسلح افواج مادر وطن کی علاقائی سالمیت،خودمختاری کےدفاع کیلئے پوری طرح تیارہیں۔

آرمی چیف جنرل سید عاصم منیر نے کہا ہے کہ پاک فوج مادر وطن کے ایک ایک انچ کی حفاظت کا بےلوث اور مقدس فریضہ خون کے آخری قطرے تک ادا کرتی رہے گی۔

آئی ایس پی آر کے مطابق آرمی چیف جنرل سید عاصم منیر نے پشاور کا دورہ کیا۔ کور کمانڈر پشاور نے ان کا استقبال کیا۔ اس موقع پر انہیں سیکیورٹی کی مجموعی صورتحال، انسداد دہشتگردی کے خلاف کارروائیوں اور غیر قانونی مقیم تارکین وطن کی واپسی اور نئے ضم شدہ اضلاع میں سماجی واقتصادی ترقی کی پیش رفت سے متعلق بھی تفصیلی بریفنگ دی گئی۔

آرمی چیف نے مختلف کارروائیوں میں بہادری اور شجاعت کا مظاہرہ کرنے والے افسران وجوانوں سے ملاقات کی اور پہلی بار منعقد ہونے والی قومی ورکشاپ این ڈبلیو کے پی ون کے شرکا سے بھی خطاب کیا۔

اس موقع پر خطاب کرتے ہوئے آرمی چیف جنرل عاصم منیر نے کہا کہ قوم کو مسلح افواج کی کارکردگی پر فخر ہے اور پاک فوج مادر وطن کے ایک ایک انچ کی حفاظت کا بےلوث ومقدس فریضہ خون کے آخری قطرے تک ادا کرتی رہے گی۔

جنرل عاصم منیر نے مزید کہا کہ پاکستان کے امن واستحکام کے لیے دشمن قوتوں کے مذموم عزائم کو ہم آہنگی اور جامع حکمت عملی کے ذریعے ناکام بنایا جا رہا ہے، کامیابی پاکستان کا مقدر ہے۔

ان کا کہنا تھا کہ سیکیورٹی فورسز کو خیبر پختونخوا کے غیور عوام کی پُرعزم حمایت کے باعث ہی سماجی واقتصادی ترقی کے منصوبوں پرپیشرفت حاصل ہوئی۔

آرمی چیف نے کہا کہ غیر قانونی مقیم تارکین وطن ملکی سلامتی اور معیشت کو بُری طرح متاثر کر رہے ہیں۔ ان کی وطن واپسی کا فیصلہ حکومت نے پاکستان کے وسیع تر مفاد میں کیا ہے اور انہیں طے شدہ اصولوں کے مطابق باعزت طریقے سے ان کے ملکوں میں واپس بھیجا جا رہا ہے۔

اس موقع پر آرمی چیف جنرل عاصم منیر نے نئے ضم شدہ اضلاع میں اقتصادی ترقی کی اہمیت کو بھی اجاگر کیا۔