ARYNews.tv | Urdu – Har Lamha Bakhabar

Tag: آرمی چیف

  • فٹبال ورلڈ کپ کے لیے افرادی قوت چاہتے ہیں،قطری وزیراعظم

    فٹبال ورلڈ کپ کے لیے افرادی قوت چاہتے ہیں،قطری وزیراعظم

    راولپنڈی: آرمی چیف جنرل قمر جاوید باجوہ نے قطری وزیر اعظم شیخ عبداللہ بن نصر بن خلیفہ الثانی سے ملاقات کی جس میں سیکیورٹی اور دفاع سمیت دیگر اہم امور پر تبادلہ خیال کیا گیا، قطری وزیراعظم نے کہا کہ فٹ بال ورلڈ کپ کے لیے پاکستانی کے سیکیورٹی تجربات سے استفادہ اور افراد قوت چاہتے ہیں۔ 

    پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے قطری وزیر اعظم شیخ عبداللہ بن نصر بن خلیفہ الثانی سے دوحا میں ملاقات کی جس میں دفاعی تعاون سمیت علاقائی سیکیورٹی کےامورپربات چیت کی گئی۔

    قطری وزیر اعظم نے قطر کی ترقی میں پاکستان کے کردار کو سراہا، قطری وزیر اعظم نے علاقائی امن کے لیے پاک فوج کے کردار کی بھی تعریف کی۔

    قطری وزیر اعظم کا کہنا تھا کہ پاکستان قطر کا قابل اعتبار دوست ملک ہے، قطر کے عوام پاکستان کے عوام کو بہت اہمیت دیتے ہیں اور ہر مشکل میں ان کی قطر کے لیے مدد پر اعتماد کرتے ہیں۔

    مزید پڑھیں : قطر کے ساتھ دفاعی تعاون کو خصوصی اہمیت دیتے ہیں، آرمی چیف

    شیخ عبداللہ بن نصر بن خلیفہ الثانی نے مزید کہا کہ قطرپاکستان کو ہر سطح پرخصوصی اہمیت دیتا ہے، انہوں نے پاکستان آرمی سے سیکیورٹی کے حوالے سے تجربات سے استفادہ کرنے اور قطر میں آئندہ فٹ بال ورلڈ کپ کے حوالے سے افرادی قوت کی خواہش کا اظہارکیا۔

    آرمی چیف جنرل قمر جاوید باجوہ نے قطری وزیراعظم کے اظہار خیال پر ان کا شکریہ ادا کیا اور انہیں تمام شعبوں میں تعاون کی یقین دہانی کرائی۔

    واضح رہے کہ فٹ بال ورلڈ کپ 2022ء قطر میں منعقد ہونا ہے جس کے لیے قطری حکومت نے کئی برس سے انتظامات شروع کررکھے ہیں، یہ کپ 21 نومبر تا 18 دسمبر قطر میں منعقد ہوا جس کے لیے دنیا کا پہلا منفرد اسٹیڈیم تیار کیا جارہا ہے جو اوپر سے بند اور مکمل ایئرکنڈیشنڈ ہوگا۔

  • آرمی چیف کا حملہ آوروں کا بھر پور مقابلہ کرنے پر خراج تحسین

    آرمی چیف کا حملہ آوروں کا بھر پور مقابلہ کرنے پر خراج تحسین

    راولپنڈی: پاک فوج کے سربراہ جنرل قمر جاوید باجوہ نے مہمند ایجنسی میں دہشت گردوں کا حملہ ناکام بنانے پر پاک فوج کے جوانوں اور شہیدوں کو زبردست انداز میں خراج تحسین پیش کیا۔

    آئی ایس پی آر کے ایک ترجمان کے مطابق پاک فوج کے سربراہ جنرل قمر جاوید باجوہ نے گزشتہ رات شہید ہونے والے پاک فوج کے جوانوں کو خراج عقیدت پیش کرتے ہوئے ان کے اہلخانہ سے اظہار تعزیت کیا ہے۔

    آرمی چیف نے پاک افغان بارڈر پر چوکنے ہو کر نگرانی کرنے اور اسی کے نتیجے میں دہشت گردوں کا حملہ ناکام بنانے پر پاک فوج کے جوانوں کی تعریف کی۔

    آرمی چیف نے افغان حکام پر بھی زور دیا کہ وہ اپنی طرف سرحد کی نگرانی کا مؤثر نظام وضع کریں تاکہ مربوط سیکیورٹی کے ساتھ ساتھ بارڈر پر دہشت گردوں کی آزادانہ نقل و حرکت روکی جاسکے۔ ان کا کہنا تھا کہ دہشت گرد مشترکہ دشمن ہیں جس کے خلاف مل کر لڑنا ہوگا اور ان کی آزادانہ نقل و حرکت روکنی ہوگی۔

    واضح رہے کہ گزشتہ رات قبائلی علاقے مہمند ایجنسی میں افغانستان سے دہشت گردوں نے 3 پاکستانی چیک پوسٹوں پر حملہ کیا جس میں 5 اہلکار شہید جبکہ 10 دہشت گرد مارے گئے تھے۔

  • مہمند ایجنسی: پاکستانی چیک پوسٹوں پرحملہ‘ 5اہلکار شہید‘ 10دہشت گردہلاک

    مہمند ایجنسی: پاکستانی چیک پوسٹوں پرحملہ‘ 5اہلکار شہید‘ 10دہشت گردہلاک

    مہمند ایجنسی :قبائلی علاقے مہمندایجنسی میں دہشت گردوں نے 3 پاکستانی چیک پوسٹوں پرحملے کی کوشش کی، فائرنگ کےتبادلےمیں 5 جوان شہید ہوئے۔ پاک فوج نے جوابی کارروائی میں 10دہشت گردوں کوہلاک کردیا۔

    تفصیلات کےمطابق پاکستان میں وفاق کے زیرانتظام قبائلی علاقے مہمند ایجنسی میں گزشتہ رات افغانستان سے دہشت گردوں کے3پاکستانی چیک پوسٹوں پرحملےمیں 5اہلکار شہید جبکہ 10دہشت گرد مارے گئے۔

    پاک فوج کےشعبہ تعلقات عامہ کاکہناہےکہ دہشت گردوں کی جانب کیے جانے والے حملے میں پاک فوج کے جوان نائیک ثنااللہ،نائیک صفدر،سپاہی الطاف ،سپاہی انور،سپاہی نیک محمد شہید ہوئے۔

    آرمی چیف جنرل قمرجاوید نے دہشت گردوں کے خلاف موثر جوابی کارروائی کوسراہا اوروطن کی خاطر جانوں کا نذرانہ پیش کرنے والےجوانوں کو خراج عقیدت پیش کیا۔

    پاک فوج کےسربراہ نےکہاکہ دہشت گرد پاکستان اور افغانستان دونوں ممالک کے مشترکہ دشمن ہیں اور سرحد پر افغانستان کی جانب سےموثرسیکورٹی کی ضرورت ہے تاکہ دہشت گردوں کی آزادانہ آمدورفت کو روکاجاسکے۔

    مزید پڑھیں:بلوچستان میں پاک فوج کی کارروائی، بھاری تعداد میں‌ گولہ بارود برآمد

    یاد رہےکہ دوروز قبل بلوچستان میں پاک فوج کے جوانوں نے کامیاب کارروائی کرتے ہوئے بھاری تعداد میں‌ گولہ بارود سمیت دیگر تخریب کاری کا سامان تحویل میں لے لیاتھا۔

    مزید پڑھیں:بنوں میں کارروائی: لیفٹیننٹ اور نائیک شہید، 4 دہشت گرد ہلاک

    واضح رہےکہ رواں ماہ 2مارچ کو سیکیورٹی فورسز کی ایک کارروائی میں دو طرفہ فائرنگ کے نتیجے میں 4 دہشت گرد ہلاک اور پاک فوج کے لیفٹیننٹ خاور اور نائیک شہزاد شہید ہوگئے تھے۔

  • آرمی چیف سے ایرانی سفیر کی ملاقات

    آرمی چیف سے ایرانی سفیر کی ملاقات

    اسلام آباد: آرمی چیف جنرل قمر جاوید باجوہ سے پاکستان میں ایرانی سفیر مہدی ہنر دوست نے ملاقات کی۔ ملاقات میں علاقائی سیکیورٹی امور پر خاص طور پر تبادلہ خیال کیا گیا۔

    پاک فوج کے شعبہ تعلقات عامہ آئی ایس پی آر کے مطابق آرمی چیف جنرل قمر جاوید باجوہ سے پاکستان میں ایرانی سفیر مہدی ہنر دوست نے ملاقات کی۔ جی ایچ کیو میں ہونے والی اس ملاقات میں باہمی دلچسپی اور علاقائی سیکیورٹی کے امور پر تبادلہ خیال ہوا۔

    اس موقع پر آرمی چیف جنرل قمر جاوید باجوہ کا کہنا تھا کہ پاک فوج ایران کے ساتھ تعلقات پر کوئی سمجھوتہ نہیں کرے گی۔ پاک ایران فوجی تعاون سے علاقے میں امن کو فروغ ملے گا۔

    ایرانی سفیر نے کہا کہ خطے میں امن و استحکام کے لیے پاک فوج کا کردار قابل قدر ہے۔ مہدی ہنر دوست نے کہا کہ دہشت گردی کے خاتمے کے لیے آپریشن رد الفساد قابل تعریف اقدام ہے۔

    مزید پڑھیں:سندھپاک ایران دفاعی شعبوں میں تعاون بڑھایا جائے، ایرانی سفیر

    یاد رہے کہ گذشتہ سال ایرانی سفیر مہدی ہنر دوست نے کہا تھا کہ ایران نے کہا ہے کہ امید ہے کہ پاک ایران فوجی شعبوں میں تعاون بڑھایا جائے گا، دونوں ممالک میں فوجی تعاون کے فروغ کیلیے بات چیت بے حد ضروری ہے۔

  • پی ایس ایل فائنل: آرمی چیف اور وزیر اعلیٰ پنجاب کا ٹیلی فونک رابطہ

    پی ایس ایل فائنل: آرمی چیف اور وزیر اعلیٰ پنجاب کا ٹیلی فونک رابطہ

    راولپنڈی: آرمی چیف جنرل قمر جاوید باجوہ اور وزیر اعلیٰ پنجاب شہباز شریف کے درمیان ٹیلی فونک گفتگو ہوئی۔ پاک فوج کی جانب سے پاکستان سپر لیگ کے فائنل کے لیے بھرپور تعاون کی یقین دہانی کروائی گئی۔

    تفصیلات کے مطابق آرمی چیف اور وزیر اعلیٰ پنجاب کے درمیان ٹیلی فونک گفتگو ہوئی۔ گفتگو کا موضوع پاکستان سپر لیگ کا فائنل رہا۔

    پاک فوج کی جانب سے پی ایس ایل کے فائنل کے لیے بھرپور تعاون کی یقین دہانی کروائی گئی۔

    مزید پڑھیں: پی ایس ایل فائنل کے ٹکٹوں کی فروخت

    ذرائع کے مطابق آرمی چیف جنرل قمر جاوید باجوہ نے کہا کہ پاک فوج اور انٹیلی جنس ادارے پنجاب پولیس کی مدد کے لیے تیار ہیں۔ وزیر اعلیٰ پنجاب نے بھرپور حمایت اور تعاون پر آرمی چیف کا شکریہ ادا کیا۔

    واضح رہے کہ پاکستان سپر لیگ کا فائنل 5 مارچ کو لاہور میں کھیلا جارہا ہے جس کے لیے سخت سیکیورٹی انتظامات کیے جارہے ہیں۔ میچ کے لیے قذافی اسٹیڈیم کی تزئین و آرائش کا کام بھی جاری ہے۔

  • لاہور: آرمی چیف کی زیر صدارت اہم اجلاس

    لاہور: آرمی چیف کی زیر صدارت اہم اجلاس

    لاہور: صوبہ پنجاب کے دارالحکومت لاہور میں آرمی چیف جنرل قمر جاوید باجوہ کی زیر صدارت پاک فوج کی اعلیٰ قیادت کا اجلاس ہوا۔ اجلاس میں رینجرز آپریشن اور پی ایس ایل کی سیکیورٹی کے معاملات پر غور کیا گیا۔

    آرمی چیف کی زیر صدارت یہ اجلاس پنجاب میں رینجرز کی تعیناتی کی منظوری اور لاہور میں پی ایس ایل کے فائنل کے انعقاد کے فیصلے کے تناظر میں ہوا ہے۔

    ڈی جی آئی ایس پی آر کے مطابق اجلاس میں پنجاب کے کور کمانڈرز، ڈی جی رینجرز اور انٹیلی جنس اداروں کے سربراہان نے شرکت کی۔ ڈی جی آئی ایس پی آر میجر جنرل آصف غفور کا کہنا ہے کہ اجلاس میں اہم فیصلے کیے گئے جن کے بارے میں جلد آگاہ کیا جائے گا۔

    یاد رہے کہ چند روز قبل ہونے والے اجلاس میں آرمی چیف جنرل قمر جاوید باجوہ نے دہشت گردوں کے خلاف جنوبی پنجاب میں آپریشن کی ہدایت کی تھی۔

    انہوں نے کہا تھا کہ لاہور دھماکے کا مقصد پی ایس ایل کے فائنل کو سبوتاژ کرنا ہے، فائنل کا لاہور میں انعقاد یقینی بنایا جائے گا جس کے لیے پاک فوج مکمل تعاون کرے گی۔

  • ملک بھرمیں 100 دہشت گرد ہلاک، پاک فوج عوام کی محافظ ہے، آرمی چیف

    ملک بھرمیں 100 دہشت گرد ہلاک، پاک فوج عوام کی محافظ ہے، آرمی چیف

    راولپنڈی: سیہون شریف میں ہونے والے سانحے کے بعد 24 گھنٹے میں ملک بھر میں آپریشن کے دوران 100 سے زائد دہشت گردوں کو ہلاک کردیا گیا، آرمی چیف نے کہا ہے کہ پاک فوج عوام کی محافظ ہے ہرقسم کے خطرات کا سامنا کرنے کے لیے تیارہیں۔

    یہ بات پاک فوج کے شعبہ تعلقات عامہ (آئی ایس پی آر) کے ڈائریکٹر جنرل میجرجنرل آصف غفور نے سماجی رابطے کی ویب سائٹ ٹوئیٹر پر جاری اپنے پیغام میں کہی۔

    آئی ایس پی آر کے مطابق گزشتہ روز سندھ کے شہر سہون شریف میں درگاہ لعل شہباز قلندرؒ کی درگاہ پر ہونے والے حود کش دھماکے کے بعد آرمی چیف نے فوری اور سخت کارروائی کا حکم جاری کیا تھا۔

    آرمی چیف جنرل قمر جاوید باجوہ نے کہا ہے پاک فوج عوام کی محافظ ہے ملک کو درپیش ہرقسم کے خطرات کا سامنا کرینگے، قوم متحد ہے اورمسلح افواج پر یقین رکھیں، کسی کا مذموم ایجنڈا کامیاب نہیں ہونے دیا جائے گا۔

    آرمی چیف کی ہدایت کے بعد پنجاب سمیت ملک بھر میں انٹیلی جنس بیس اور کومبنگ آپریشن جاری ہیں، 24 گھنٹوں کے دوران 100 سے زائد دہشت گردوں کو ان کے منطقی انجام تک پہنچا دیا گیا جبکہ کارروائیوں میں بڑی تعداد میں دہشت گردوں کو گرفتار بھی کیا گیا ہے۔

    ڈی جی آئی ایس پی آر کا کہنا ہے کہ انٹیلی جنس ادارے حالیہ واقعات کے پیچھے نیٹ ورکس بے نقاب کرنے میں پیش رفت کررہے ہیں، مارے گئے دہشت گردوں کا تعلق مختلف تنظیموں سے ہے، ملزمان سے تفتیش کے بعد اہم انکشافات جلد منظرعام پر لائے جائیں گے۔

    انہوں نے کہا کہ حالیہ دہشت گردی کے تانےبانے سرحد پار سے ملے ہیں، افغان سرحد سےغیرقانونی آمدورفت ہرگز نہیں ہونے دی جائے گی۔

    مزید پڑھیں : ملک بھرمیں دہشت گردوں کیخلاف گھیرا تنگ، 40 ہلاک

    افغان بارڈرسیکیورٹی وجوہات کی بنا پربند کردیا گیا ہے، پاک افغان سرحد پر دہشت گردوں کے ٹھکانوں کو مؤثر طور پرنشانہ بنایا گیا ہے۔

    افغانستان سے کسی کوغیرقانونی طور پر داخل نہیں ہونے دیں گے۔ اس حوالے سے سرحدی نگرانی پرسیکیورٹی فورسز کوخصوصی ہدایات جاری کردی گئیں ہیں۔

  • سیہون دھماکہ: وزیر اعظم اور آرمی چیف کی زخمیوں کی عیادت

    سیہون دھماکہ: وزیر اعظم اور آرمی چیف کی زخمیوں کی عیادت

    نواب شاہ: وزیر اعظم میاں محمد نواز شریف اور آرمی چیف جنرل قمر جاوید باجوہ نے نواب شاہ پہنچ گئے۔ وزیر اعظم اور آرمی چیف نے سیہون دھماکے کے زخمیوں کی عیادت کی۔ بعد ازاں وزیر اعظم سیہون پہنچے۔

    تفصیلات کے مطابق وزیر اعظم نواز شریف سیہون میں حضرت لعل شہباز قلندر کی درگاہ پر ہونے والے خودکش دھماکے کے زخمیوں کی عیادت کے لیے پیپلز میڈیکل اسپتال پہنچے۔ آرمی چیف جنرل قمر جاوید باجوہ بھی وزیر اعظم کے ہمراہ تھے۔

    اس موقع پر وزیر اعظم نے کہا کہ دشمن ہمارے ارادے پسپا نہیں‌ کرسکتا ہے۔ ہم جناح کے پاکستان کی رونقیں بحال کریں گے۔ انہوں نے کہا کہ دہشت گردوں نے ترقی کی جانب تیزی سے بڑھتے ہوئے پاکستان پر حملہ کیا ہے۔ نا عاقبت اندیش دہشت گرد جلد ہی نشانہ عبرت بنیں گے۔

    آرمی چیف نے زخمیوں کی عیادت کرتے ہوئے کہا کہ مشکل کی اس گھڑی میں قوم کے ساتھ کھڑے ہیں۔ دشمن کے گرد گھیرا تنگ ہے، جلد ہی گرفت میں آئے گا۔

    اس موقع پر وزیر داخلہ چوہدری نثار، وزیر خزانہ اسحٰق ڈار، مشیر قومی سلامتی ناصر جنجوعہ، گورنر سندھ محمد زبیر اور وزیر اعلیٰ سندھ مراد علی شاہ بھی وزیراعظم کے ہمراہ تھے۔

    گورنر سندھ محمد زبیر اور وزیر اعلیٰ سندھ مراد علی شاہ نے بھی زخمیوں کی عیادت کی اور لواحقین سے اظہار ہمدردی کیا۔

    یاد رہے کہ گزشتہ روز سیہون میں حضرت لعل شہباز قلندر کی درگاہ پر دھمال کے دوران خودکش حملہ ہوا تھا جس میں شہدا کی تعداد 80 ہوچکی ہے۔

    دھماکے کے بعد وزیر اعلیٰ سندھ مراد علی شاہ کی جانب سے 3 روزہ سوگ کے اعلان کے بعد سندھ کی تمام اہم عمارتوں پر قومی پرچم سرنگوں ہے۔

  • قومی رہنماؤں کی بزدلانہ کارروائی پر مذمت، عزم جواں ہیں

    قومی رہنماؤں کی بزدلانہ کارروائی پر مذمت، عزم جواں ہیں

    اسلام آباد : وزیراعظم نواز شریف اور آرمی چیف جنرل قمر باجوہ نے سیہون واقعے کی مذمت کرتے ہوئے متاثرین کو ہر ممکن تعاون فراہم کی ہدایت کی ہے۔

    تفصیلات کے مطابق وزیر اعظم نواز شریف نے لعل شہباز قلندر کی درگاہ پر خود کش دھماکے میں قیمتی جانوں کے نقصان پر افسوس کا اظہار کرتے ہوئے کہا ہے کہ میرادل متاثرین کےساتھ دھڑکتا ہے جانتا ہوں کچھ دن انتہائی سخت اور افسوسناک رہے۔

    ،وزیراعظم نوازشریف نے کہا کہ ملک کےایک شہری پر بھی حملہ پوری قوم پر حملہ سمجھا جائے گا ہے اور اس عزم کا اعادہ کرتا ہوں کہ ملک کی حفاظت کے لیے آخری حد تک جاؤں گا۔

    آرمی چیف جنرل قمر باجوہ نے خود کش دھماکے کی شدید الفاظ میں مذمت کرتے ہوئے متاثرین کی ہر ممکن تعاون فراہم کرنے کی ہدایات جاری کردی ہیں جس کے بعد حیدر آباد سی ایم ایچ میں زخمیوں کے لیے تمام انتظامات مکمل کر لیے گئے ہیں جب کہ آرمی ، رینجرز اور میڈیکل ٹیمیں امدادی کاموں کے لیے سیہون روانہ ہو چکی ہیں۔

    تحریک انصاف کے چیئرمین عمران خان نے لعل شہباز قلندر کے مزار پر خود کش دھماکے کو افسوسناک قرار دیتے ہوئے واقعہ کی شدید الفاظ میں مذمت کی ہے اور کہا کہ خواتین اور بچوں سمیت قیمتی جانوں کے نقصان پر دل گرفتہ ہوں۔

    سابق صدر آصف علی زرداری نے کہا کہ دہشت گرد، ان کے سرپرست ، منصوبہ ساز اور سہولت کار بچ نہیں پائیں گے انہوں نے حادثے کی مذمت کرتے ہوئے حکومت سندھ کو ہدایت کی ہے کہ اعلیٰ سطحی طور پر تحقیقات کرے کہ حفاظتی امور میں غفلت کیسے ہوئی؟ جب کہ پارٹی کے منتخب نمائندے، عہدیدار اور کارکنان کو فوری طور پر ہسپتالوں میں پہنچ کرخون کے عطیات دینے کی ہدایت دی۔

    پاکستان پیپلز پارٹی کے چیئرمین بلاول بھٹو نے درگاہ سیہون شریف پر خود کش دھماکے کو سندھ کی ثقافت، تاریخ اور تمدن پر حملہ قرار دیتے ہوئے متاثرین سے ہمدردی اور یکجہتی کا اظہارکیا اور حکومت سندھ کو ہدایات جاری کیں کہ جائے وقوعہ پر فوری ریسکیو آپریشن شروع کرکے زخمیوں کا بہتر علاج کیا جائے۔

    وزیر اعلیٰ سندھ سید مراد علی شاہ نے لعل شہباز قلندر کے مزار پر خود کش حملے کو بزدلانہ کارروائی قرار دیتے ہوئے متاثرین کو ہر قسم کی امداد پہنچانے کی ہدایت جاری کردی ہیں اور جان بحق افراد کے اہل خانہ سے تعزیت کرتے ہوئے دلی ہمدردی کا اظہار کیا اور درجات کی بلندی کے لیے دعا کی۔

    گورنر سندھ محمد زبیر نے واقعہ کی مذمت کرتے ہوئے آئی جی سندھ سے رپورٹ طلب کر لی ہے جب کہ قریبی اسپتالوں میں ایمرجنسی عائد کرنے کی ہدایت دیتے ہوئے متاثرین کو ہر قسم کی طبی امداد مہیا کرنے کی ضرورت ہر ذور دیا۔

    پاکستان عوامی تحریک کے سربراہ ڈاکٹرعلامہ طاہر القادری نے سہیون دھماکے کی سخت الفاظ میں مذمت کرتے ہوئے کہا کہ ایک ہفتے میں چاروں صوبوں میں دہشت گردی کی کارروائیاں کر کے دہشے گردوں نے واضح پپیغام دے دیا گیا ہے وہ کتنے مضبوط ہو چکے ہیں۔

  • وزیر اعظم کی زیر صدارت اعلیٰ سطح کا اجلاس

    وزیر اعظم کی زیر صدارت اعلیٰ سطح کا اجلاس

    اسلام آباد: ملک میں پے در پے ہونے والے دہشت گردی کے واقعات کے بعد اعلیٰ سیاسی و عسکری قیادت نے سر جوڑ لیے۔ وزیر اعظم کی زیر صدارت اعلیٰ سطح کا اجلاس شروع ہوگیا۔

    تفصیلات کے مطابق وفاقی دارالحکومت اسلام آباد میں وزیر اعظم نواز شریف کی زیر صدارت اعلیٰ سطح کا اجلاس شروع ہوگیا۔ اجلاس میں آرمی چیف جنرل قمر جاوید باجوہ، وزیر داخلہ چوہدری نثار، وزیر خزانہ اور مشیر قومی سلامتی شریک ہیں۔

    اجلاس میں لاہور، کوئٹہ، پشاور اور مہمند ایجنسی میں ہونے والے دہشت گردی کے واقعات کی شدید مذمت کی گئی۔

    وزیر اعظم کی صدارت میں ہونے والے اجلاس کے شرکا نے دہشت گردی کے خاتمے کے عزم کا اعادہ کرتے ہوئے اتفاق کیا کہ ریاست کسی بھی قیمت پر دہشت گردوں کو سر نہیں اٹھانے دے گی۔

    اجلاس میں شرکا کا کہنا تھا کہ دہشت گردی کے خلاف جنگ میں حاصل اہداف کو ضائع نہیں ہونے دیں گے۔ اداروں اور شہریوں نے دہشت گردی کے خلاف بہت قربانیاں دی ہیں۔

    اجلاس میں فیصلہ کیا گیا کہ دہشت گردی اور انتہاپسندی کا بھرپور مقابلہ کیا جائےگا، دہشت گردی کے خاتمے کےلیے تمام وسائل بروئے کارلائے جائیں گے،اعلیٰ سطح کے اجلاس میں جانوں کا نذرانہ دینے والے قومی ہیروز کو خراج عقیدت بھی پیش کیا گیا۔

    یاد رہے کہ گزشتہ دو روز میں دہشت گردی کی نئی لہر نے ملک بھر کو اپنی لپیٹ میں لے لیا ہے۔ دو روز قبل لاہور کے مال روڈ پر چیئرنگ کراس کے مقام پر ہونے والے خودکش بم دھماکے میں ڈی آئی جی ٹریفک اور ایس ایس پی سمیت 14 افراد شہید اور 70 سے زائد زخمی ہوگئے تھے۔

    اسی روز کوئٹہ میں سریاب روڈ پر بم ناکارہ بنانے کے دوران پھٹ گیا جس کے باعث بم ڈسپوزل اسکواڈ کے 2 اہلکار شہید ہوگئے۔

    آج صبح مہمند ایجنسی میں لیویز ہیڈ کوارٹر کے مین گیٹ پر خود کش حملے میں 3 سیکیورٹی اہلکاروں سمیت 5 افراد شہید ہوگئے جبکہ کچھ دیر قبل پشاور میں حیات آباد کے علاقے میں زوردار دھماکے میں‌ ایک شخص جاں بحق اور 4 افراد زخمی ہوگئے۔