اسلام آباد: آرمی چیف جنرل راحیل شریف نے کہا کہ آپریشن ضرب عضب نے فاٹا سے دہشت گرد نیٹ ورک کا ہمیشہ کے لیے  خاتمہ کردیا،ہم اپنے مستقبل کی نسلوں کوایک محفوظ اور خوشحال پاکستان دیں گے۔

پاک فوج کے شعبہ تعلقات عامہ کے ادارے (آئی ایس پی آر) کے ترجمان کے مطابق آرمی چیف جنرل راحیل شریف نے آج شمالی وزیرستان اور جنوبی وزیرستان کا دورہ کیا اور پاک فوج کے تحت مکمل کیے گئے مختلف ترقیاتی منصوبوں کا افتتاح کیا۔

اے آر وائی نیوز کے نمائندے لئیق الرحمان کے مطابق آرمی چیف کو آپریشن ضرب عضب اور متاثرین کی بحالی کے آپریشن پر بریفنگ کے دوران بتایا گیا کہ متاثرین کی واپسی رواں سال مکمل کرلی جائے گی جس پر آرمی چیف نے متاثرین کی واپسی اور بحالی کے عمل پر اطمینان کا اظہار کیا۔

آرمی چیف نے کہا کہ دہشت گردوں کے نیٹ ورک کا فاٹا سےخاتمہ کردیا ہے اور ضرب عضب سے دہشت گردی کے خلاف آپریشن کے خاطر خواہ نتائج برآمد ہوئے۔

آرمی چیف نے اپنے خطاب کے دوران اس عزم کا اظہار کیا کہ آئندہ نسلوں کو محفوظ اورمستحکم پاکستان دیں گے جہاں دہشت گردی کے بجائے تعلیم اور مہارت عام ہو گئی۔

قبل ازیں آرمی چیف نے فاٹا میں پاک فوج کی جانب سے مکمل کرائے گئے مختلف ترقیقاتی کاموں کا بھی افتتاح کیا اور اہلِ علاقہ کو تعمیراتی پروجیکٹس کی تکمیل پر مبارک باد دی۔

نمائندہ اے آر وائی نیوز احسان خٹک نے بتایا کہ آرمی چیف نے غلام خان تا افغانستان تجارتی شاہراہ اور یونس خان اسٹیڈیم کا افتتاح کیا جہاں دو مقامی کرکٹ ٹیموں کے درمیان میچ بھی کھیلا گیا،اس موقع پرآرمی چیف نے قبائلی عمائدین سے بھی ملاقات کی۔

راولپنڈی : چیف آف آرمی اسٹاف جنرل راحیل شریف نے فوجی عدالتوں سے سزائے موت پانے والے 9 دہشت گردوں کی سزائے موت کی توثیق  کر دی ہے۔

پاک فوج کے تعلقات عامہ کے ادارے (آئی ایس پی آر) کی جانب سے جاری ہونے والے بیان میں بتایا گیا ہے کہ آرمی چیف جنرل راحیل شریف نے 9 دہشت گردوں کی سزائے موت کی توثیق کردی ہے،ان ملزمان کے مقدمات فوجی عدالتوں میں چلائے گئے تھے جہاں انہیں پھانسی کی سزا دی گئی تھی۔

ترجمان کے مطابق ان دہشت گردوں کو سیکیورٹی اہلکاروں، عام شہریوں اور ملکی اداروں پر حملے اور دہشت گردانہ کارروائیاں ثابت ہونے پر فوجی عدالت سے سزائے موت سنائی گئی تھی۔

آئی ایس پی آر کے ترجمان کے مطابق سزائے موت پانے والوں میں ساجد ولد ابراہیم خان،فضل الحق ولد شہداد خان،عمر سعید ولد حضرت سعید،نذیر احمد ولد اللہ داد،جاوید خان ولد فقیر گل،فضل الرحمان ولد فضلکریم،رحمت ولد اسماعیل خان اور بخت والی ولد عمل خان شامل ہیں۔

ترجمان کے مطابق سزا پانے والے 9 دہشت گردوں میں بخت والی، رحمت اور زاہد خان کا تعلق لشکر اسلام سے ہے جب کہ بقیہ 6 دہشت گرد تحریک طالبان پاکستان کے اہم رکن ہیں۔

آئی ایس پی آر کے مطابق سزائے موت پانے والے دہشت گرد پشاور ائیرپورٹ پر پی آئی اے کے طیارے میں فائرنگ کر کے ایک خاتون کو ہلاک اور 2 مسافروں کو زخمی کرنے، سیکیورٹی پولیس اہلکاروں کے ہاتھ اور پاؤں کاٹنے والے اور عام شہریوں اور فوجی افسران کو شہید کرنے جیسے سنگین جرائم میں ملوث تھے۔