اسلام آباد: آرمی چیف جنرل راحیل شریف سے امریکا کے نمائندہ خصوصی رچرڈ اولسن نے ملاقات کی اور پاک امریکا تعلقات پر تبادلہ خیال کیا۔
اطلاعات کے مطابق آرمی چیف جنرل راحیل شریف سے امریکا کے نمائندہ خصوصی رچرڈ اولسن نے ملاقات کی۔ آرمی چیف سے ہونے والی اس ملاقات میں افغانستان میں امریکی فوج کے کمانڈر جنرل جان نکلسن بھی موجود تھے۔
آئی ایس پی آر کے مطابق ملاقات میں علاقائی سیکیورٹی، باہمی دلچسپی کے امور،بارڈرمینجمنٹ پرتبادلہ خیال کیا گیا ۔اس موقع پر امریکی وفد نے دہشت گردی کے خلاف جنگ میں پاکستان کی کوششوں کوسراہا اور دہشت گردی کی جنگ میں پاکستان کے اقدامات اور اس کی قربانیوں کو سراہا۔
یہ بھی پڑھیں: جان مکین بھی اسلام آباد پہنچ گئے، رچرڈ اولسن پہلے ہی موجود
قبل ازیں رچرڈ اولسن نے دو جولائی کو بھی اسلام آباد کا دورہ کیا تھا جہاں انہوں نے افغان مہاجرین کی اپنے وطن واپسی کے معاملات پر پاکستانی حکومت کی سول اور عسکری قیادت سے ملاقات کی تھی۔
