Tag: آزادی مارچ

اسلام آباد: وفاقی حکومت نے مولانا فضل الرحمان کے آزادی مارچ کا معاملہ پارلیمنٹ میں اٹھانے کا فیصلہ کیا ہے اور اس سلسلے میں قومی اسمبلی کا اجلاس کل ہوگا۔

تفصیلات کے مطابق مولانافضل الرحمان کے آزادی مارچ کے پرامن حل کے لیےوفاقی حکومت کی جانب سے پیش قدمی جاری ہے، ایک جانب اپوزیشن سے بات چیت کے لیے مذاکراتی کمیٹی اپنا کام کررہی ہے تو دوسری جانب حکومت سیاسی معاملے کو پارلیمان میں زیر بحث لانے کو تیار ہے۔

ذرائع کا کہنا ہے کہ وفاق نےقومی اسمبلی کااجلاس سات نومبر کی شام چار بجے طلب کرلیا ہے جس میں مولانا فضل الرحمان کے آزادی مارچ کا معاملہ اٹھایا جائے گا۔

یہ بھی پڑھیں: مولانا فضل الرحمان کو گرفتار کیا جائے، درخواست دائر

ذرائع کے مطابق اجلاس سےوزیر اعظم عمران خان بھی خطاب کریں گے جب کہ اجلاس میں اپوزیشن کوبات کرنے کاموقع فراہم کیاجائےگا۔

دوسری جانب وزیراعظم عمران خان نے موجودہ سیاسی صورتحال کے پیش نظر تحریک انصاف کی پارلیمانی کمیٹی کا اجلاس طلب کرلیا ہے جو آج ہوگا۔

اجلاس میں آزادی مارچ کا معاملہ پارلیمنٹ میں لانے کے لیے حکمت عملی طے کی جائے گی اور اس حوالے سے اتحادی جماعتوں کے اعتماد میں لینے کے لیے پارلیمانی رہنماؤں کو ٹاسک دیا جائے گا۔

لاہور: مسلم لیگ (ن) کے صدر میاں شہباز شریف کی زیر صدارت پارٹی کا اعلیٰ سطح اجلا س آج ہورہا ہے جس میں مولانا فضل الرحمان کی جانب سے اپوزیشن کی بلائی گئی اے پی سی کے حوالے سے مشاورت کی جائے گی۔

تفصیلات کے مطابق اپوزیشن لیڈر میاں شہبازشریف کی زیرصدارت (ن) لیگ کا اہم اجلاس اب سے کچھ دیر بعد لاہور میں ان کی رہائش گاہ ماڈل ٹاؤن میں ہوگا جس میں شرکت کے لیے پارٹی رہنماؤں کی آمد کا سلسلہ شروع ہوگیا ہے۔

اجلاس میں مولانا فضل الرحمان کی جانب سے اپوزیشن کی اے پی سی کے حوالے سے مشاورت کی جائے گی جب کہ آزادی مارچ سے پیدا ہونے والی صورتحال اور آئندہ کا لائحہ عمل طے کرنے کے لیے حکمت عملی ترتیب دی جائےگی۔

اجلاس میں شرکت کے لیے سابق گورنر سندھ محمد زبیر ، امیر مقام ، رانا تنویر حسین سمیت متعدد رہنما پہنچ چکے ہیں۔

اجلا س میں آمد کے موقع پر سابق گورنر سندھ محمد زبیر عمر کا کہنا تھا کہ (ن) لیگ نےپہلے ہی کہا تھا کہ مارچ میں جائیں گےلیکن دھرنےمیں نہیں، دعاگوہیں حکومت اور مولانا کےمعاملات احسن طریقےسےطےہوجائیں۔

محمد زبیر نے کہا کہ تشدد اور غیر یقینی کی صورتحال پیدا نہیں ہونی چاہیے،(ن) لیگ آج دھرنےکے حوالے سےغور اورحکمت عملی طےکرے گی۔

واضح رہے کہ گزشتہ روز دھرنے کے شرکاء سے خطاب کرتے ہوئے مولانا فضل الرحمان کا کہنا تھا کہ وہ آئندہ کی حکمت عملی بنانے کے لیے اپوزیشن کی اے پی سی بلارہے ہیں جس میں مشاورت کے بعد حتمی اقدام اٹھانے کے فیصلے کیے جائیں گے۔

اسلام آباد: زیرو پوائنٹ اور ریڈ زون جانے والے راستوں پر نفری الرٹ کر دی گئی ہے، دوسرے صوبوں سے بھی پولیس کی مزید نفری اسلام آباد پہنچ گئی۔

تفصیلات کے مطابق جے یو آئی ف کے آزادی مارچ کے پیش نظر سیکورٹی معاملات کو کنٹرول کرنے کے لیے دیگر صوبوں کی پولیس نفری بھی اسلام آباد پہنچ گئی ہے، ریڈ زون جانے والے راستوں پر نفری الرٹ کر دی گئی۔

ذرایع کا کہنا ہے کہ تمام نفری کو ٹیئر گیس اور دیگر سامان بھی فراہم کر دیا گیا، پولیس کے ساتھ ایف سی کی بھی بھاری نفری تعینات کر دی گئی ہے، ہجوم کو کسی صورت جلسہ گاہ سے آگے نہیں جانے دیا جائے گا۔

تازہ ترین خبریں:  مولانا نے مثبت اشارہ دے دیا، ڈیڈ لائن میں توسیع کا امکان

ڈی جی رینجرز اور آئی جی، ڈی آئی جی آپریشنز بھی موقع پر موجود ہیں، فیض آباد پل کو پھر ٹریفک کے لیے بند کر دیا گیا ہے۔

مولانا کے مارچ کے سلسلے میں ریلوے پولیس اہل کار بھی تعینات کیے جا رہے ہیں، لاہور سے 500 ریلوے پولیس ملازمین کو اسلام آباد بھجوا دیا گیا ہے، ان اہل کاروں کا تعلق ریلوے کے تمام ڈویژنز سے ہے۔

ریلوے پولیس اہل کاروں کی بڑی تعداد سندھ، بلوچستان اور پنجاب سے طلب کی گئی ہے، کراچی، ملتان، کوئٹہ اور سکھر ڈویژن سے 300 سو سے زائد اہل کار اسلام آباد روانہ ہو گئے ہیں، اہل کاروں کی روانگی سے ملک میں چلنے والی مسافرٹرینوں، پٹریوں اور اسٹیشنوں کی سیکورٹی سوالیہ نشان بن گئی۔

ادھر یہ مسئلہ بھی پیدا ہو گیا ہے کہ ریلوے پولیس اہل کاروں کی تعداد پہلے ہی کم ہے، مسافروں کے سامان کی چیکنگ، ٹریک کی نگرانی اور اسٹیشنوں کی حفاظت کے مسائل کون حل کرے گا۔

اسلام آباد: وفاقی دارالحکومت میں رہبر کمیٹی کی مشاورت اور رابطے جاری ہیں، ذرایع کا کہنا ہے کہ پیپلز پارٹی اور ن لیگ کے بیک ڈور رابطے کام کر گئے ہیں، مولانا کا مہم جویانہ موڈ دیکھ کر دونوں بڑی جماعتوں نے اتحاد چھوڑنے کی دھمکی دے دی ہے۔

ذرایع کے مطابق حکومتی مذاکراتی کمیٹی کے سربراہ پرویز خٹک دونوں بڑی جماعتوں کے رہنماؤں سے رابطے میں رہے، صادق سنجرانی نے اپوزیشن کی جماعتوں کو تعاون کی درخواست کی، جس کے بعد پی پی اور ن لیگ نے مولانا کو اتحاد چھوڑنے کی دھمکی دی، کہا جا رہا ہے کہ مولانا کو اتحادیوں نے نا امید کر دیا ہے۔

ذرایع کا کہنا ہے کہ پیپلز پارٹی اور مسلم لیگ ن نے فضل الرحمان کو صاف جواب دے دیا کہ اتحاد جلسے تک تھا، مزید اقدام کے لیے قیادت سے مشاورت ہوگی، دونوں جماعتوں نے مولانا کو کسی بھی مہم جوئی سے باز رہنے اور پر امن طور پر واپس جانے کا مشورہ بھی دیا۔

تازہ ترین:  مولانا کی ہرزہ سرائی، وزیر اعظم کی جانب سے پاک فوج کا بھرپور دفاع

ذرایع کے مطابق اپوزیشن نے یہ مشورہ بھی دیا ہے کہ احتجاج کو تحریک میں بھی بدلا جا سکتا ہے، جیل بھرو تحریک، استعفوں اور ملک گیر احتجاج کے آپشن بھی زیر غور آئے، دونوں بڑی جماعتیں رہبر کمیٹی برقرار رکھنے پر مشکل سے رضا مند ہوئیں۔

ذرایع کا یہ بھی کہنا ہے کہ 20 نومبر کو ملک گیر شٹر ڈاؤن اور بڑی شاہراہیں بلاک کرنے کا فیصلہ کیا گیا ہے، رہبر کمیٹی اجلاس میں ضلعی ہیڈ کوارٹرز پر احتجاج کی تجویز پر بھی اتفاق کیا گیا۔

واضح رہے کہ حکومت کی جانب سے وزیر اعظم کی گرفتاری کے بیان پر مولانا فضل الرحمان کے خلاف عدالت جانے کا فیصلہ کیا گیا ہے، مولانا نے اداروں کے خلاف بھی ہرزہ سرائی کی، جس پر وزیر اعظم نے واضح مؤقف اختیار کرتے ہوئے کہا ہے کہ اداروں کا دفاع سیاست سے بالاتر ہو کر کریں گے۔