Tag: آزادی مارچ

ایبٹ آباد: پشاور ہائیکورٹ کے ایبٹ آبا بینج نے جمعیت علماء اسلام (ف) کے مرکزی رہنما مفتی کفایت اللہ کی ضمانت منظور کرتے ہوئے انہیں کرنے کا حکم دے دیا ہے۔

تفصیلات کے مطابق اشتعال انگیز تقریر کے مقدمے میں گرفتار مفتی کفایت اللہ کی درخواست ضمانت پر سماعت ہوئی تو عدالت نے فریقین کے دلائل سننے کے بعد درخواست پر فیصلہ سنا دیا۔

عدالت نے مفتی کفایت اللہ کی ضمانت منظور کرتے ہوئے انہیں فوری طور پر رہا کرنے کا حکم جاری کردیا۔

یاد رہے کہ مفتی کفایت اللہ کو 27 اکتوبر کی صبح ساڑھے 4 بجے گرفتار کیا گیا تھا، مانسہرہ اور اسلام آباد پولیس کی مشترکہ کارروائی میں یہ گرفتاری عمل میں آئی تھی۔

یہ بھی پڑھیں: جےیوآئی (ف) کے رہنما مفتی کفایت اللہ کی گرفتاری چیلنج

مفتی کفایت اللہ کو نفرت انگیز تقریر اور اشتعال پھیلانے کے الزام پر گرفتار کر کے سینٹرل جیل ہری پور میں منتقل کیا گیاتھا۔

29 اکتوبر کو مفتی کفایت اللہ نے اپنی گرفتاری کو چیلنج کرتے ہوئے پشاور ہائیکورٹ کے ایبٹ آباد بینج میں درخواست دائر کی تھی۔

بینچ نے درخواست پر ڈپٹی کمشنر سمیت دیگر فریقین کو نوٹس جاری کرتے ہوئے جواب طلب کیا تھا۔

اسلام آباد:‌وفاقی وزیر داخلہ بریگیڈیئر (ر) اعجاز شاہ نے کہا ہے کہ وزیراعظم نے فیصلہ کیا تھا کہ جمہوری روایت کے تحت مولانا فضل الرحمان کے مارچ کو نہیں روکیں گےاور وزیراعظم کی اجازت کے بعد انتشار پھیلانےوالوں کے منہ بند ہوگئے۔

تفصیلات کے مطابق اسلام آباد میں پریس کانفرنس کرتے ہوئے وفاقی وزیر داخلہ بریگیڈیئر (ر) اعجاز شاہ نے کہا کہ مولاناصاحب عدالتی فیصلوں کی روشنی میں ہی اسلام آباد آسکتےہیں، مولاناصاحب مارچ کریں مگر عدالتی فیصلوں کا بھی احترام کریں۔

وزیر داخلہ نے کہا کہ ہم نے بھی احتجاج کئے ہیں اس لیے مولاناصاحب کونہیں روکیں گےمگر یہ نہیں پتہ کہ مولانا فضل الرحمان مارچ کریں گے یا دھرنا دیں گے۔

اعجاز شاہ نے بتایا کہ مولاناصاحب نےتین اکتوبر کو لانگ مارچ کافیصلہ کیاتو حکومت نے پرویز خٹک کی سربراہی میں مذاکراتی کمیٹی تشکیل دے دی، کمیٹی سے کہا جا کر اپوزیشن سے مذاکرات کریں کہ وہ چاہتےکیا ہیں؟

ان کا کہنا تھا کہ رہبر اور مذاکراتی کمیٹی نے مل کر ایک مقام کا فیصلہ کیا مگر مولانا کےمطالبےایک سے دو اور پھر 3 ہوگئے۔

انہوں نے کہا کہ سواں پل کےراستےکو بندکرنامعاہدےکی خلاف ورزی ہے اس لیے سواں پل کا راستہ فوری طور پر کھول دیا جائے۔

یہ بھی پڑھیں: یہ پاکستان کو غیر مستحکم کرنے کا مارچ ہے، مقابلہ کیا جائے: عمران خان

وزیر داخلہ نے کہا کہ مارچ ملک اوراسلام آباد میں ہوتے رہے ہیں، ماضی میں سپریم کورٹ کے اوپر بھی یلغار ہوئی تھی اور وکلا کی تحریک کے دوران بھی یلغار ہوئی تھی۔

اعجاز شاہ کا کہنا تھا کہ وزیراعظم نے فیصلہ کیا تھا کہ جمہوری روایت کے تحت مولانا فضل الرحمان کے مارچ کو نہیں روکیں گےاور جیسے ہی وزیراعظم نے اجازت دی تو انتشار پھیلانےوالوں کے منہ بند ہوگئے۔

اسلام آباد: ڈپٹی کمشنر نے کہا ہے کہ کل وفاقی دارالحکومت کی تمام یونی ورسٹیاں معمول کے مطابق کھلی رہیں گی، سیاسی احتجاج اور دھرنوں کے باعث بچوں کا مستقبل داؤ پر نہیں لگا سکتے۔

تفصیلات کے مطابق ڈپٹی کمشنر اسلام آباد محمد حمزہ شفقات نے کل یونی ورسٹیاں معمول کے مطابق کھلی رکھنے کا اعلان کر دیا ہے، انھوں نے کہا کہ احتجاج اور دھرنوں کے باعث تعلیمی ادارے بند کرنا غلط روایت ہے۔

ڈپٹی کمشنر نے مزید کہا کہ میٹرو بس سروس بھی کل معمول کے مطابق چلے گی، میٹرو کے اطراف اہل کار ڈیوٹی انجام دیں گے، اسلام آباد کے شہری کل میٹرو بس سروس استعمال کر سکتے ہیں۔

یہ بھی پڑھیں:  اسلام آباد کے پرائیویٹ اسکولز کل بند رکھنے کا اعلان

دریں اثنا، پرائیویٹ اسکولز نیٹ ورک (پی ایس این) نے بھی کل اسلام آباد کے تمام ممبر پرائیویٹ اسکولز کھلے رکھنے کا فیصلہ کر لیا ہے، پی ایس این کے صدر نے کہا کہ ہم وزارت تعلیم، وزارت داخلہ اور ضلعی انتظامیہ کے احکامات تسلیم کریں گے۔

انھوں نے کہا کل کے بعد بھی اسکول کھلے رکھنے کا فیصلہ انتظامیہ کے احکامات کی روشنی میں کیا جائے گا، تعلیمی اداروں میں وسط مدتی امتحانات ہو رہے ہیں، بچوں کا نقصان نہ کیا جائے۔

واضح رہے کہ پرائیویٹ اسکولز ایسوسی ایشن نے آزادی مارچ کے پیش نظر کل وفاقی دارالحکومت اسلام آباد کے تمام نجی اسکولز بند رکھنے کا اعلان کیا ہے۔

خیال رہے کہ آزادی مارچ کے باعث اسلام آباد کی مختلف جامعات میں پیپرز منسوخ کیے گئے ہیں، نمل یونی ورسٹی میں یکم نومبر کا پیپر 8 نومبر تک ملتوی کیا گیا ہے، نمل یونی ورسٹی کل سے 7 نومبر تک بند رہے گی۔

اسلام آباد: پرائیویٹ اسکولز ایسوسی ایشن نے آزادی مارچ کے پیش نظر کل وفاقی دارالحکومت اسلام آباد کے تمام نجی اسکولز بند رکھنے کا اعلان کردیا۔

تفصیلات کے مطابق پرائیویٹ اسکولز ایسوسی ایشن کے سیکرٹری عبدالوحید خان کا کہنا ہے کہ دھرنے کے باعث کسی بھی ناخوشگوار واقع کے پیش نظر کل بروز جمعرات اسلام آباد کے تمام نجی اسکولز بند رکھے جائیں گے۔

سیکریٹری پرائیویٹ اسکولزایسوسی ایشن کا کہنا ہے کہ بچوں کی سیکیورٹی ہم سب کی بنیادی ذمہ داری ہے اس لیے دھرنےکی وجہ سے بچوں کی سیفٹی کی خاطر اسکول میں چھٹی کافیصلہ کیا گیا۔

سیکریٹری کا مزید کہنا تھا کہ پرسوں یعنی جمعہ کے روز اسکولزکھولنے کا فیصلہ صورتحال کو مدنظر رکھتے ہوئے کل شام تک کیا جائے گا۔

دوسری جانب آئی جی اسلام آبادنے آزادی مارچ کے حوالے سے مختص جگہ کا دورہ کیا اور سیکیورٹی انتظامات کاجائزہ لیا۔

آئی جی نے آزادی مارچ ریلی کے منتظمین سےملاقات بھی کی اور فول پروف سیکیورٹی مہیا کرنے کی یقین دہانی کرائی۔

اسلام آباد: وزیراعظم عمران خان نے جمعیت علماء اسلام (ف) کے آزادی مارچ کے سلسلے میں پارٹی ترجمانوں کا اہم اجلاس آج طلب کرلیا، عمران خان موجودہ صورتحال پرترجمانوں کونئی گائیڈلائن دیں گے۔

تفصیلات کے مطابق وزیراعظم عمران خان کی زیر صدارت پارٹی ترجمانوں کا اجلاس آج اسلام آباد میں ہوگا جس میں مولانافضل الرحمان کےآزادی مارچ پرتبادلہ خیال کیا جائے گا۔

اجلاس میں وزیراعظم عمران خان آزادی مارچ کے حوالے سے موجودہ صورتحال پرترجمانوں کونئی گائیڈلائن دیں گے۔

یہ بھی پڑھیں: وزیر اعظم نے نواز شریف کی صحت پر وزرا کو بیان بازی سے روک دیا

اجلاس میں وزیراعظم کی جانب سے پارٹی ترجمانوں کو آزادی مارچ کے حوالے سے میڈیا پر موقف پیش کرنے اور بیانات جاری کرنے سے متعلق پارٹی پالیسی سے آگاہ کریں گے اور آئندہ کے لائحہ عمل کے حوالے سے ہدایات دیں گے۔

گزشتہ روز وزیر اعظم عمران خان کی زیر صدارت ہونےوالے وفاقی کابینہ کے اجلاس میں وزیر اعظم نے وزرا کو نواز شریف کی صحت پر بیان بازی سے روک دیا تھا اور کہا تھا کہ نواز شریف کی صحت پر غیر سنجیدہ بیانات نہ دیے جائیں۔

پشاور: ہائیکورٹ نے آزادی مارچ کے لیے شاہرائیں بند نہ کرنے کا حکم دیتے ہوئے حکومت کو سڑکوں پر کنٹینرز لگانے سے روک دیا۔چیف جسٹس نےکہا کہ خبروں میں سنا ہے حکومت اور اپوزیشن میں کوئی معاہدہ طےپایا ہے۔

تفصیلات کے مطابق پشاور ہائیکورٹ میں آزادی مارچ کے قافلوں کو روکنے کے لیے سڑکوں کی بندش کے خلاف درخواست پر سماعت ہوئی تو چیف جسٹس نے اٹارنی جنرل آفس کا نمائندہ پیش نہ ہونے پر سختی برہمی کا اظہار کیا۔

عدالت نے درخواست گزار کاموقف سننے کے بعد شاہراؤں کو بند نہ کرنے کے احکامات جاری کردیے۔ عدالتی حکم میں کہا گیا ہے کہ صوبائی حکومت اٹک تک کوئی روڈ کنٹینرلگا کربندنہ کرے۔

عدالت نے ہدایت جاری کی کہ آزادی مارچ کے شرکاء بھی پرامن رہیں۔

درخواست گزار نے عدالت کو بتایا کہ حکومت نے مولانا فضل الرحمان کی تقاریر ٹی وی چینلز پر نشر کرنے پر پابندی لگا رکھی ہے جس پر چیف جسٹس نے کہا کہ ٹی وی چینلز پر جتنا وقت حکومت کودیا جاتا ہے اتناہی اپوزیشن کوبھی دیا جائے۔

چیف جسٹس نے یہ بھی کہا کہ خبروں میں سنا ہے حکومت اور اپوزیشن میں کوئی معاہدہ طے پایاہے۔