مظفر آباد : موسمی صورتحال کے پیش نظر تمام تعلیمی ادارے 5 روز کیلئے بند رکھنے کا اعلان کردیا گیا۔
تفصیلات کے مطابق آزاد کشمیر کے ضلع باغ میں محکمہ موسمیات کی جانب سے جاری کیے گئے شدید سیلابی الرٹ کے پیشِ نظر تمام تعلیمی ادارے عارضی طور پر بند کرنے کا اعلان کر دیا گیا ہے۔
سرکاری اعلامیے میں کہا گیا کہ تمام سرکاری ونجی تعلیمی اداروں کو 19 سے 23 اگست تک بند رکھنے کا فیصلہ کیا ہے، اس اقدام کا مقصد طلبا اور عملے کی حفاظت کو یقینی بنانا ہے کیونکہ خطے میں مسلسل اور متوقع شدید بارشوں کے باعث سیلابی صورتحال کا خدشہ بڑھ گیا ہے۔
محکمہ موسمیات کی پیشگوئی
محکمہ موسمیات نے آئندہ دنوں میں مظفرآباد، راولا کوٹ، باغ، حویلی، کوٹلی، میرپور اور بھمبر میں موسلادھار بارش اور گرج چمک کے ساتھ طوفانی بارشوں کی پیش گوئی کی ہے۔
محکمے نے خبردار کیا کہ ان حالات کے باعث پہاڑی علاقوں میں لینڈ سلائیڈنگ اور فلیش فلڈنگ کے امکانات زیادہ ہیں۔
اسلام آباد اور پنجاب
محکمہ موسمیات کے مطابق اسلام آباد میں آئندہ 24 گھنٹوں کے دوران شدید سے انتہائی شدید بارشیں اور گرج چمک متوقع ہیں۔
پنجاب کے بیشتر اضلاع میں بھی گرج چمک کے ساتھ بارشیں ہوں گی۔ راولپنڈی، اٹک، جہلم، چکوال، لاہور، گوجرانوالہ، سیالکوٹ، گجرات، نارووال، حافظ آباد اور منڈی بہاؤالدین میں شہری سیلاب (Urban Flooding) کے امکانات ہیں۔
ملتان، ڈیرہ غازی خان، راجن پور، لیہ، بھکر اور ساہیوال میں وقفے وقفے سے بارشیں ہوں گی جبکہ بہاولپور، بہاولنگر اور رحیم یار خان میں ہلکی بارش کا امکان ظاہر کیا گیا ہے۔
خیبر پختونخوا
خیبر پختونخوا کے شمالی اور بالائی اضلاع سوات، بونیر، شانگلہ، دیر، مانسہرہ، بٹگرام، ایبٹ آباد اور مالاکنڈ میں شدید بارشوں کے نتیجے میں پہاڑی علاقوں میں لینڈ سلائیڈنگ اور فلیش فلڈنگ کا خطرہ ہے۔
پشاور ویلی (پشاور، چارسدہ، نوشہرہ، مردان اور صوابی) میں وقفے وقفے سے گرج چمک کے ساتھ بارش جبکہ جنوبی اضلاع ڈیرہ اسماعیل خان، ٹانک، بنوں، لکی مروت، کرک اور کوہاٹ میں کہیں کہیں شدید بارشوں کا امکان ہے۔
