Tag: آزاد کشمیر

میرپور: آزاد کشمیر میں کرونا وائرس میں مبتلا 3 خواتین انتقال کر گئیں۔

ڈسٹرکٹ ہیلتھ آفیسر کے مطابق میرپور آزاد کشمیر میں کرونا کی دوسری لہر شدید ہے، اس لیے عوام احتیاط کریں، آج تین خواتین کا کو وِڈ نائنٹین کے باعث انتقال ہو گیا ہے۔

ڈی ایچ او کا کہنا تھا کہ 2 علاقوں میں اسمارٹ لاک ڈاؤن، جب کہ 100 علاقوں میں مائیکرو لاک ڈاؤن نافذ کیا گیا ہے۔

دریں اثنا، میرپور آزاد کشمیر میں کرونا صورت حال کے پیش نظر ضلعی انتظامیہ کی جانب سے نئی ٹریول ایڈوائزری جاری کی گئی ہے، جس میں ڈپٹی کمشنر کا کہنا ہے کہ ضلع میرپور میں داخل ہونے اور باہر جانے کے لیے معقول وجہ بتاناہوگی۔

ملک میں 24 گھنٹوں کے دوران کرونا وائرس کے 25 مریض جاں بحق

ڈپٹی کمشنر کے مطابق میرپور ضلع کے داخلی و خارجی راستوں پر چیکنگ کی جائیگی، جس کے لیے پولیس افسران اور مجسٹریٹ تعینات کر دیے گئے ہیں۔

یاد رہے کہ میرپور میں کرونا کی پہلی لہر کے دوران پہلا کیس  مارچ میں سامنے آیا تھا، جب کہ پہلے مریض کا انتقال 23 مارچ کو ہوا تھا۔ تاہم اب دوسری لہر کے دوران ایک بار پھر کرونا نے شدت پکڑ لی ہے، چند دن قبل 2 ماہر ڈاکٹروں اور 2 حقیقی بھائیوں سمیت 5 افراد جان سے ہاتھ دھو بیٹھے تھے۔

میرپور: آزاد کشمیر، میرپور کا سب سے بڑا شادی ہال اچانک زمیں بوس ہو گیا، حادثے میں مالک اور بیٹا جاں بحق ہو گئے۔

تفصیلات کے مطابق ضلع میرپور کے علاقے چکسواڑی میں سب سے بڑا میرج ہال، روپیال میرج ہال مکمل طور پر زمین بوس ہو گیا، دیکھتے ہی دیکھتے اچانک پوری 3 منزلہ عمارت اپنی بنیادیوں پر ڈھیر ہو گئی۔

ملبے تلے آ کر میرج ہال کا مالک اور ان کا بیٹا جاں بحق ہو گئے، ریسکیو ذرایع کا کہنا ہے کہ 19 افراد کو ملبے سے نکال لیا گیا، ریسکیوآپریشن میں پاک فوج کی مدد بھی حاصل کر لی گئی ہے، چکسواری بازار حادثے کے بعد سوگ میں بند کر دیا گیا۔

جائے حادثہ پر ریسکیو آپریشن جاری ہے، ملبے میں پھنسے دیگر افراد کو نکالنے کے لیے امدادی کارروائیاں کی جا رہی ہیں، ریسکیو کا کہنا ہے کہ ابھی کچھ اندازہ نہیں کہ حادثے کے وقت میرج ہال کے اندر کتنے لوگ تھے، تاہم کہا جا رہا ہے کہ تیس سے چالیس کے درمیان افراد اندر موجود تھے۔

حادثے کے بعد لوگ بڑی تعداد میں جائے وقوعہ پر جمع ہو گئے، لوگوں نے امدادی کارروائیوں میں بھی حصہ لیا۔

واضح رہے کہ اس وقت ملک کے دیگر حصوں میں لوگوں میں خوشیاں بانٹنے والے لاک ڈاؤن کے باعث غموں کی تصویر بن چکے ہیں، لاک ڈاؤن کی وجہ سے ملک بھر کے میرج ہال بند پڑے ہوئے ہیں، حکومت سے شادی ہال کھلوانے کے لیے مذاکرات بھی کیے گئے ہیں لیکن ہال نہیں کھل سکے، جس پر اب شادی ہال ایسوسی ایشن نے احتجاج کا راستہ اپنا لیا ہے۔

مظفرآباد: آزاد کشمیر حکومت نے کروناوائرس کے مریضوں کو ہوم آئسولیشن کی اجازت دے دی، فی الحال تمام مریضوں کو اسپتال یا طبی مراکز کے خصوصی قرنطینہ میں رکھا گیا ہے۔

تفصیلات کے مطابق تمام صوبوں کی طرح آزادکشمیر میں بھی کرونامریضوں کی تعداد میں اضافہ ریکارڈ کیا گیا ہے، یہ بھی خدشہ ظاہر کیا جارہا ہے کہ آزاد کشمیر کے طبی مراکز میں کرونامریضوں کو رکھنے کی جگہ کم پڑگئی ہے۔

اسی کے پیش نظر حکومت نے مریضوں کو ہوم آئسولیشن کی اجازت دی ہے، ہوم آئسولیشن کی اجازت مریض کے گھر کا جائزہ لینے کے بعد دی جائے گی۔ ہوم آئسولیشن کے خواہش مند مریضوں کے گھر کا جائزہ لینے کے لیے کمیٹی تشکیل دے دی گئی ہے۔ کمیٹی گھر کا معائنہ کرے گی۔

کورونا 24گھنٹے کے دوران مزید 101 پاکستانیوں کی جان لے گیا

کمیٹی کی سفارشات کے بعد ہی مریض کو ہوم آئسولیشن کی اجازت دی جائے گئی۔ جبکہ ہدایت کی خلاف ورزی پر ہوم آئسولیشن ختم اور 50ہزار روپے جرمانہ عائد کیا جائے گا۔

خیال رہے کہ ملک بھر میں کرونا وائرس کے کیسز کی تعداد ایک لاکھ19ہزار536ہوگئی ہے، 24 گھنٹوں میں مزید 101 افراد انتقال کرگئے، تعداد2356 تک جا پہنچی ہے، پاکستان میں کرونا وائرس کے تصدیق شدہ مریضوں کی تعداد ایک لاکھ19ہزار536ہوگئی، ملک میں گزشتہ 24گھنٹوں کے دوران5834نئے کیسز رپورٹ ہوئے ہیں۔

مظفرآباد: وزیراعظم آزاد کشمیر راجہ فاروق حیدر کا کہنا ہے کہ نئے وزیراعظم ہاؤس کو قرنطینہ سینٹر بنا دیا ہے۔

تفصیلات کے مطابق وزیراعظم آزاد کشمیر راجہ فاروق حیدر نے کہا کہ نئے وزیراعظم ہاؤس کو قرنطینہ سینٹر بنا دیا ہے، آفیسرز کلب، ہوٹلز، ریسٹ ہاوسز کو آئیسولیشن سینٹرز، قرنطینہ میں بدل دیا۔

راجہ فاروق حیدر کا کہنا تھا کہ کوٹلی، مظفرآباد میں ٹیسٹنگ لیبارٹریاں بنا چکے ہیں، راولاکوٹ میں بھی کل تک لیبارٹری بن جائےگی۔ وزیراعظم آزاد کشمیر نے کہا کہ ڈاکٹرز، طبی عملے کو حفاظتی لباس، ماسک ،سینیٹائزرز مہیا کرچکے ہیں ۔

خیال رہے کہ گزشتہ ہفتے 23 مارچ کو آزاد کشمیر حکومت نے تین ہفتوں کے لیے لاک ڈاؤن کا اعلان کیا تھا۔

وزیراعظم آزاد کشمیر کا کہنا تھا کہ ناگزیر حالات میں سفر کرنے کے لیے خصوصی پاس جاری کیے جائیں گے، کھانے پینے کا سامان لانے کے لیے گھر کے ایک فرد کو اجازت ہوگی، یہ کرفیو نہیں ہے بلکہ حفاظتی انتظامات ہیں، عوام گھروں سے باہر نہ نکلیں، انتہائی ضروری ہو تو شناختی کارڈ ساتھ رکھیں۔

واضح رہے کہ پاکستان میں بھی کورونا وائرس کی وبا تیزی سے پھیل رہی ہے اور متاثر افراد کی تعداد 1526 تک جا پہنچی ہے ،وائرس سے اب تک 14 افراد جاں بحق اور 29 مریض صحت یاب ہوچکے ہیں۔