سڈنی: آسٹریلیا کا ایک مقامی جانور کوالا ایک جیپ کے پہیوں میں جا پھنسا اور جیپ کے 10 میل تک سفر کے باوجود معجزاتی طور پر زندہ بچ گیا۔
یہ مادہ کوالا کسی طرح جیپ کے پہیوں کے درمیان خالی جگہ میں جا بیٹھی تھی اور سفر کے دوران جھٹکوں اور پہیوں کی رگڑ سے مسلسل اذیت کا شکار تھی حتیٰ کہ ڈرائیور نے اس کی کراہنے کی آوازیں سنیں۔
جیپ کے ڈرائیور نے گاڑی روک کر جب کوالا کو وہاں پھنسا ہوا پایا تو اس نے پہلے فائر بریگیڈ کو مدد کے لیے طلب کیا۔
تاہم بعد ازاں جنگلی حیات کے اہلکار بھی وہاں آ پہنچے اور جیپ سے مذکورہ پہیہ نکال کر مادہ کوالا کو آزاد کیا گیا۔
ایک وائلڈ لائف اہلکار کے مطابق مادہ کوالا کے بالوں سے جلنے کی بو بھی آرہی تھی۔
گو کہ کوالا کو فوری طور پر طبی امداد دے دی گئی اور اس کی جان بچ گئی، تاہم وائلڈ لائف کا کہنا ہے کہ یہ کوالا دودھ پلانے والی مادہ ہے اور نہایت افسوس کی بات ہے کہ ہم بالکل بے خبر ہیں کہ اب اس کے بچے کہاں اور کس حال میں ہیں۔
مادہ کوالا کی کچھ دن دیکھ بھال کرنے کے بعد اسے جنگل میں چھوڑ دیا گیا۔
ماہرین کے مطابق کوالا کو بھالو کی نسل سے سمجھا جاتا ہے لیکن یہ ایک کیسہ دار (جھولی والا) جانور ہے اور کینگرو کی طرح اس کے پیٹ پر بھی ایک جھولی موجود ہوتی ہے جہاں اس کے نومولود بچے پرورش پاتے ہیں۔
صرف آسٹریلیا میں پایا جانے والا یہ ممالیہ جانور معدومی کے خطرے کا شکار بھی ہے اور گزشتہ چند سالوں میں ان کی آبادی میں تیزی سے کمی واقع ہوئی ہے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
